မၞိဟ်ကဵုပရိုၚ်လ္ပာ်ကံၚ်ဇြဳပၞာန် (၄)တၠ ပ္ဍဲပရေၚ်ဒဒှ်ကွာန်ပဇြဳကျဳဂှ် ရပ်ဂွံလဝ်ရောၚ် NUG လလောၚ်ပ္တိတ်

ကဗလူ၊ ဨပရဴ (၃၀)
ပ္ဍဲကဵုလၟေၚ်ဒဒှ် ကွာန်ပဇြဳကျဳ၊ ပွိုၚ်ဍုၚ်ကဗလူ၊ ရးသက်ကိုၚ် ဒးဒုၚ်ဗ္တိုက်ကဵုတရဴကျာဂှ် ရပ်ဂွံလဝ် မၞိဟ်ကဵုပရိုၚ် ကုကံၚ်ဇြဳပၞာန် (၄) တၠရောၚ်ဂှ် ဌာနဝန်ဇၞော်ကာအပ္ဍဲဍုၚ် ကေုာံ ဌာနဝန်ဇၞော်ကောပ်ကာဲပရေၚ်မၞိဟ်လုပ် အလဵုအသဳညဳသၟဟ်ဂကူ လလောၚ်ပ္တိတ်လဝ်ရ။
မၞိဟ်မရပ်ဂွံဂမၠိုၚ်ဂှ် ဒှ်ဥူတုၚ်ယှိုဲ အာယုက် (၅၃) သၞာံ၊ ဥူချဵု (၆၁) သၞာံ၊ ဥူဇြဝ်မေန် (၃၆) သၞာံ ကေုာံ ဒဝ်ယေန်န်ဝေန် (၃၀) သၞာံတံတုဲ ပံက်လဝ်ဂဗုတ် ကုညးတံ နကဵုသၞောဝ်ဗ္တိုက်သ္အးပကီုပရာပ် ၝောံပိုဒ် (၅၄) ရောၚ်ဂှ် သ္ဂးလဝ်ရ။
ဂကောံဒပ်ဗၠာဲသၟိၚ်ညးဍုၚ်ကွာန် မၞုံသၟဝ်ဌာနဝန်ဇၞော်ကောပ်ကာဲပရေၚ်မၞိဟ်လုပ် ကေုာံ ဌာနကာအပ္ဍဲဍုၚ် အလဵုအသဳညဳသၟဟ်ဂကူဂှ် နကဵုအရီုဗၚ် ဂကောံဒပ်စဵုဒၞါညးဍုၚ်ကွာန်တံဂှ် ရပ်ဂွံလဝ် ညးတံရောၚ် သာ်ဝွံ ထ္မံက်ထ္ၜးလဝ်ရ။
အတိုၚ်မစၟဳစၟတ်ဂွံလဝ် မၞိဟ်ရပ်ဂွံလဝ်တံဂှ်မ္ဂး က္ဍိုပ်သ္ကိုပ်ပျူသဝ်ထဳ သၟဝ်တဲကံၚ်ဇြဳပၞာန် ဥူဝါသဝ ကေုာံ ညးကဵုပရိုၚ် ဒဝ်ဏိယေန်တံ (၂) တၠလေဝ် ပါကီုတုဲ နူကဵုဂကောံဒပ်ဗၠာဲသၟိၚ်ညးဍုၚ်ကွာန် ပွိုၚ်ဍုၚ်ကဗလူဂှ် ပံက်လဝ်အမှု ကုညးတံ နကဵုၝောံပိုဒ် သၞောဝ်ဗ္တိုက်သ္အးပွပကီုပရာပ်−၅၄ရောၚ်ဂှ် ဂွံတီကေတ်ရ။
သ္အာၚ်နူဂှ်ပၠန် ညးတၠဒုဟ် (၆) တၠ သီုကဵုပါလုပ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ်လေဝ် နူကဵုဗ္ဒိုပ်ဂကောံဒပ်ဗၠာဲသၟိၚ်ညးဍုၚ်ကွာန် ပွိုၚ်ဍုၚ်ကဗလူ ပံက်လဝ်အမှု နကဵုၝောံပိုဒ် ၅၄ သၞောဝ်ဗ္တိုက်သ္အးပကီုပရာပ် (ပ) ၂/၂၀၂၃ ဂှ်တုဲ ရေၚ်တၠုၚ်လဝ်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
တုဲကၠုၚ် ပ္ဍဲဂိတုဨပရဴ (၁၁) တေံ ဟိုတ်နူပရေၚ်ဗ္တိုက်တရဴကျာ ကံၚ်ဇြဳပၞာန် ပ္ဍဲကဵုကွာန်ပဇြဳကျဳ ပွိုၚ်ဍုၚ်ကဗလူတံဂှ်တုဲ သီုကောန်ၚာ်သၟတ်၊ သီုညးဗြဴတံပါလုပ်ဂှ် ညးဍုၚ်ကွာန် (၁၆၈) တၠ ဒးချိုတ်အာလဝ်ရောၚ် NUG လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOHI