လံၚ်လုၚ်၊ မေ (၂)
ကြဴနူညးယိုက်ဝန် နူဌာနက္ဍိုက်ပ်အုပ်ဓုပ်ကာနာနာမွဲတၠ မကၠုၚ်သ္ပကုသိုလ်ကဵုဒါန် ပ္ဍဲဘာလကျာ် ကွာန်(ပဉ္စသီမော်) ၊ ပွိုၚ်ဍုၚ်လံၚ်လုၚ်၊ ရးဒေသဇၞော်တၞၚ်သဳ ဒးဒုၚ်ပန်ဂစိုတ်တုဲဂှ် ဒပ်ကံၚ်ဇြဳပၞာန် ရပ်ဒက်ဏာ မၞိဟ်တြဴတၠ သီုကဵုခမဳသၚ် (၄) ဇကုပါလုပ်ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကိုဝ်မေန်ဝါ မဒှ်ညးဒဳယာန် ဌာနက္ဍိုက်ပ်အုပ်ဓုပ်ကာနာနာ ပွိုၚ်ဍုၚ်လံၚ်လုၚ် မကၠုၚ်သ္ပကုသိုလ်ကဵုဒါန် ပ္ဍဲဘာလကျာ် ကွာန်ပဉ္စသီမော် ပ္ဍဲဂိတုဨပရဴ တုဲကၠုၚ် (၂၉) တေံဂှ် သၟာသေနာတ်ဂမၠိုၚ် လုပ်စိုပ်ပန်ပှော်ဏာလဝ် ပ္ဍဲဘာလကျာ်ရ။
ကြဴနူညးယိုက်ဝန် နူဌာနအုပ်ဓုပ်ကာနာနာ ဒးဒုၚ်ပန်ပှော်တုဲဂှ် ဒပ်ကံၚ်ဇြဳပၞာန် ရပ်ကော်ဏာ ခမဳသၚ်မၞုံပ္ဍဲဘာ (၄) ဇကု သွက်ဂွံစၟဳစၟတ်တုဲဂှ် ပ္ဍဲဂိတုမေ (၁) ဂှ် ကလေၚ်ဗလးကဵုလဝ် နူကဵုဗ္ဒိုပ်ဗၠာဲသၟိၚ်လံၚ်လုၚ်ရောၚ် သ္ဂးရ။
ဆ္ဂး မၞိဟ်တြုံဒေသ (၂) တၠ အာဒုၚ်တၠုၚ် ခမဳသၚ် မကလေၚ်ဗလးကဵု (၄) တၠတံဂှ် ကံၚ်ဇြဳပၞာန် ထပ်ရပ်ဒက်လဝ်တုဲ စၟဳစၟတ်သၟာန်သၟုက်တံ ကၠောန်ၜိုတ်ဒၟံၚ်ရောၚ်ဂှ် ညးဒေသမွဲတၠ ဟီုရ။
လ္ပာ်ကံၚ်ဇြဳပၞာန်တံ ၜိုန်ရၜုၚ်တက် ကုခမဳသၚ် မရပ်ဒက်ဏာတံဟွံမွဲကီုလေဝ် ပွမသၟာန်သၟုက်လၟေၚ်ဒဒှ်ပရေၚ်ပန်ပှော် ဗွဲလစှ်ေတံ နွံလဝ်ဂှ် ဂွံတီကေတ်ရ။
ကိုဝ်မေန်ဝါ မဒှ်သၞာဲဒဴနူဌာနအုပ်ဓုပ်ကာနာနဂှ်ဝွံ ပ္ဍဲကရောၚ်ပၞာန်ကံၚ်ဇြဳပၞာန်တံ အာကၠုၚ်ဂှ် ဒးဒဳပလံၚ်ကဵုကွဳစက်တုဲ ဟိုတ်နူဒှ်ပျူသဝ်ထဳ မဗက်ထ္ၜးကဵု ဒၞါဲကောန်ဂကောံစဵုဒၞါဒေသတံ မွဲတၠဂှ်ရ ပန်ပှော်ပသောၚ်လဝ်ရောၚ်ဂှ် ဂကောံစဵုဒၞါဒေသထဝါဲ (DDT) လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MPA
sanlontai