တၞၚ်သြဳ၊ မေ(၃)
နူသၞေဟ်ကၚ်စၟဳစၟတ်ဒဵုဗလဲ ပွိုၚ်ဍုၚ်ဍာ်ဗု ဒၞာဲလုပ်ရးဒေသဇၞော်တၞၚ်သြဳ စဵုကဵုဍုၚ်ဗိက် သၞေဟ်ကၚ်စၟဳစၟတ် ပ္ဍဲမွဲဒမြိပ်ဂၠံၚ်ကၟိန်ဍုၚ်ဂှ် ကောန်ဒပ်ကံၚ်ဇြဳပၞာန် အာတ်ကေတ်ဒၟံၚ်သြန် လောန်ၜက်နူသၞောတ်ဗ္ၜတ်ရဂှ် သၟာကွဳစက်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲမွဲဒမြိပ်ဂၠံၚ်ကၟိန်ဍုၚ်ဂှ် ကြဴနူဒပ်ပၞာန်သီအဝဵုတုဲ ပံက်စွံကၠုၚ် သၞေဟ်ကၚ်စၟဳစၟတ် ဟွံအောန်နူ (၂၀)သၞေဟ်နွံတုဲ ပ္ဍဲသၞာံ ၂၀၂၃ ပေါဲဗတိုက်သ္ကာတ်မြဟ်ကၠုၚ်ဂှ် နကဵုတၚ်ထ္ၜးဟိုတ်ပရေၚ်ဂီုကၠီု ထပ်ပံက်ကၠုၚ် သၞေဟ်ကၚ်စၟဳစၟတ် ဗ္ဒာဲ(၃၀)သၞေဟ်ကၚ် နွံကၠုၚ်ရ။
ပ္ဍဲသၞေဟ်ကၚ်စၟဳစၟတ် ကံၚ်ဇြဳပၞာန်ပံက်စွံကၠုၚ်လဝ် နကဵုတၚ်ထ္ၜးဟိုတ်ပရေၚ်ဂီုကၠီုတအ်ဂှ် တုဲတဴကဵုကပေါတ်ဗၞိက်တုဲ ကွဳစက်မွဲဖ္ဍိုက်မ္ဂး နူကဵု ၅၀၀၀ ဒ္ကေဝ် စဵုကဵု ၂၀၀၀၀ ဒ္ကေဝ် ကံက်ကေတ်ဒၟံၚ်သြန်ရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်တအ်ဂှ် ယဝ်ရဟွံကဵုသြန် အတိုၚ်ဍေံတအ်အာတ်မ္ဂး ဂၠိုက်ဂၠာဲစၟဳစၟတ်သောဲသောဲဗြောဲဗြောဲကီု၊ တံၚ်ဓဇက်ဖျေံ ကပေါတ်ကီု၊ ဟွံကဵုအခေါၚ် ကွဳစက်အာကီု ယဝ်ဟီုဂးဟွံပြေပြံၚ်မ္ဂး သီုၜုၚ်တက်ကၠုၚ် နွံဒၟံၚ်ရဂှ် သၟာဒဳကွဳစက်မွဲတၠ ဟီုသ္ဂးလဝ်ရ။
ဟိုတ်နူကောန်ဒပ်ကံၚ်ဇြဳပၞာန် အာတ်ကေတ်ဒၟံၚ်သြန် လောန်ၜက်နူသၞောတ်ဗ္ၜတ်တုဲ တော်စဟွံကိတ်ဂှ်ရ သၟာကွဳစက်လ္ၚဵု ဒေါံဇူကၠုၚ် နူပရေၚ်ဓရိပ်ဒဳ နွံဒၟံၚ်ရဂှ် ဟီုသ္ဂးလဝ်ရ။
မွဲလ္ပာ်ပၠန်ဂှ် ဟိုတ်နူၚုဟ်ကၠေၚ်စက် က္ဍၚ်တိုန်ကီု၊ ဟိုတ်နူပေါဲဗတိုက်တုဲ အာကၠုၚ်ဝါတ်ဂါတ်ကီု၊ ပ္ဍဲသၞေဟ်ကၚ်ကံၚ်ဇြဳပၞာန်တအ် ဟိုတ်နူအာတ်ကေတ်ဒၟံၚ်သြန်ကီုဂှ်ရ ပ္ဍဲဒေသလေဝ် ၚုဟ်ဗၞိက်ဗွဝ်ဖျာ က္ဍၚ်တိုန်ကၠုၚ် ဗ္ဒာဲ(၃)ချရဂှ် ဂွံတီတ်ကေတ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – Dawei Watch
sanlontai