သွက်သွာၚ်ကမၠောန်(၁၀) သာ် ဂွံဂေတ်ဂြိပ်မာန်ဂှ် စရေၚ်တၠုၚ်ဒၟံၚ်ယျ ကံၚ်ဇြဳဖေဝ်ဒရာဍုၚ်မန် ဟီု

မတ်မလီု၊ မေ (၃)

ကံၚ်ဇြဳဖေဝ်ဒရာဍုၚ်မန် (MSFC) မဒှ်ဂကောံပၠန်ဂတး ဒစဵုဒစး ကုသၞောတ်တၠအဝဵုပၞာန်ဂှ် နူကဵုသၟဝ်ကမ္မတဳပရေၚ်အုပ်ဓုပ်၊ ပရေၚ်ခၞံသၞောဝ် ကေုာံ ပရေၚ်စဳရေၚ်သၞောဝ်တံဂှ် သွက်သွာၚ်ကမၠောန် (၁၀) သာ် ဂွံဂေတ်ဂြိပ်မာန် စရေၚ်တၠုၚ်ဒၟံၚ်ယျ နာဲထဝ်ရတ် မဒှ်ညးလုပ်ဂကောံကံၚ်ဇြဳဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုကဏ္ဍကမၠောန် (၁၀) သာ်ဂှ် ပရေၚ်စဵုဒၞါ ကေုာံ ပရေၚ်စဳရေၚ်သၞောဝ်၊ ပရေၚ်အပ္ဍဲဍုၚ်၊ ပရေၚ်ထတ်ယုက်၊ ပရေၚ်ပညာ၊ ပရေၚ်ရီုဗၚ်ဗ္စာရဏာကောန်မၞိဟ်ရေၚ်သ္ကအ်၊ သယံဇာတ တိဗ္ၚ၊ ပရေၚ်လလောၚ်ပရိုၚ်၊ မၞိဟ်ဗြဴ ကေုာံ ကောန်ၚာ်သၟတ်၊ ပရေၚ်ဆက်ဆောံသွာၚ်မ္ၚး၊ ပရေၚ်ဘဏ္ဍာ ကေုာံ ပရေၚ်ကံက်အခေါန်ၚာၚ်တံ ပါလုပ်ရ။

ပ္ဍဲကဵုဏံ ပ္ဍဲကဵုပရေၚ်စဵုဒၞါ ကေုာံ ပရေၚ်စဳရေၚ်သၞောဝ်ဂှ် ဒဒှ်မပါလုပ်ဇြဟတ်ပၠန်ဂတး ပ္ဍဲတွဵုရးဍုၚ်မန်ဂှ်ဝွံ ဟိုတ်နူဟွံစိုပ်အကာဲအရာ ဇြဟတ်ခိုဟ်ဏီဂှ်ရ သွက်ဂွံထ္မံက်ရုပ်ရဴ အခက်အခုဲနွံမာန်ဂှ် နာဲထဝ်ရတ် သ္ဂးရ။

“ဌာနတံဏံဂှ် ဒှ်ဌာန​ဒးထ္မံက်အာရုပ်ရဴ သိုက်က်ဏောၚ်။ အခက်အခုဲဂှ်တှ်ေ နွံတွဵုဏောၚ်။ ဆ္ဂး တၚ်ကော်ချဴဂၠိုၚ်အိုတ်ဏောၚ် ဒးဟီုမ္ဂး အကာဲအရာဗလးတိပိုယ်တံဂှ် ဟွံတုပ်ကဵုတွဵုရးတၞဟ်ဟ်တံပုဟ်၊ တုဲတှ်ေ ဟွံတုပ်ကဵုရးဒေသတၞဟ်သ္အာၚ်ဂမၠိုၚ်ပုဟ်။ လ္ပာ်သက်ကိုၚ်၊ မဂွဵုဂှ်တှ်ေ ပရေၚ်ပါလုပ်ပ္ဍဲပၠန်ဂတးကီု ဇြဟတ်ပၠန်ဂတး စိုပ်ဒတုဲတံဂှ် ဇြဟတ်ခိုဟ်ဒၟံၚ်ကွေံကွေံဏောၚ်။ ပ္ဍဲကဵုပိုယ်ဂှ်တှ်ေ ဂကောံဇြဟတ်ပၠန်ဂတးဂမၠိုၚ် အကာဲအရာဇြဟတ်ခိုဟ်ဂှ် ဒဵုကဵုလၟုဟ် စိုပ်ဟွံမာန်ဏီပုဟ်လေဝ်။ သာ်လဵုဒှ်ဒှ် ဒှ်လၟေၚ်တရဴ ဂကောံဗော်သွးတံ၊ ကမၠောန်ဂမၠိုၚ်တံ ဒးထ္မံက်အာရုပ်ရဴဏောၚ်။ ကျာတ်ဝါတ်အိုတ် အဓိကဂှ်တှ်ေ ပ္ဍဲပရေၚ်စဳရေၚ်သၞောဝ်ဂှ် အကာဲအရာဗလးတိဂှ်လေဝ် ဒှ်ဒၟံၚ်အခိၚ်က္ဍဟွံစိုပ်ဏီဂှ်ရ နကဵုကမ္မတဳ ဒးဂဗဒၟံၚ်အခက်အခုဲတၟာဂလိုၚ်ရောၚ်” သာ်ဝွံ ညးသ္ဂးရ။

ပ္ဍဲကဵုကဏ္ဍကမၠောန် (၁၀) ဂှ် ကဏ္ဍလ္ၚဵုတံဂှ် ၜိုန်ရအကာဲအရာကောံကလောံတံနွံကီုလေဝ် သွက်ဂွံထ္မံက်ရုပ်ရဴဂှ် ခက်ခုဲဒၟံၚ်တုဲ သွက်ဂွံပကောံ ဂကောံဗော်သွး မဒစဵုဒစးဒၟံၚ် သၞောတ်တၠအဝဵုပၞာန်တံမာန်ဂှ် ကံၚ်ဇြဳဖေဝ်ဒရာဍုၚ်မန် ကော်ဘိက်ဒၟံၚ်ရောၚ် နာဲထဝ်ရတ် ဆက်ဟီုလဝ်ရ။

ပ္ဍဲကဵုကံၚ်ဇြဳဖေဝ်ဒရာဍုၚ်မန်ဂှ် ဂကောံပရေၚ်ဍုၚ်ကွာန်ဂမၠိုၚ်၊ ဂကောံဗော်သွးမှာဇန်ဂမၠိုၚ်၊ ဂကောံဇြဟတ်ညးဗြဴဂမၠိုၚ်၊ ဂကောံသွးမန် စိုပ်ဍုၚ်သ္အာၚ်ဂမၠိုၚ်၊ ဂကောံဇြဟတ်ကောန်ဍုၚ်အရၚ်တၞဟ်ဟ် မၞုံပ္ဍဲတွဵုရးတံ ပါလုပ်ဒၟံၚ်ရ။

တုဲကၠုၚ် ပ္ဍဲဂိတုဂျာန္နဝါရဳ (၂၂) တေံ ပ္ဍဲကဵုကောံဓရီု ကံၚ်ဇြဳဖေဝ်ဒရာဍုၚ်မန် MSFC အလန်ပထမ မကၠောန်ဗဒှ်လဝ်ဂှ် သွက်ဂွံဒ္ဂေတ်စကာ ပ္ဍဲအခိၚ်ပၠန်ဂတးကဵု အခိၚ်အကြာ အဝဵုပိတန်မတွံဂး ပရေၚ်ခၞံသၞောဝ်၊ ပရေၚ်စဳရေၚ်သၞောဝ် ကေုာံ ပရေၚ်အုပ်ဓုပ်တံဂှ် ဖျေံစၟတ်လဝ်ရ။

ကံၚ်ဇြဳဖေဝ်ဒရာဍုၚ်မန် (MSFC) ဝွံ ကြဴနူဒပ်ပၞာန်သီအဝဵုတုဲ နူကဵုကမ္မတဳပံၚ်ကောံ ရေၚ်တၠုၚ်ကေၚ်ကာဍုၚ်မန် (MSICC) မစဒက်ပ္တန်လဝ်တေံ ဒဵုကဵုအကာဲအရာပရေၚ်ဍုၚ်ကွာန်လၟုဟ်ဂှ်မ္ဂး ဟိုတ်နူနွံပၟိက်ဒၟံၚ် ဂကောံဗော်သွးဖေဝ်ဒရာယူနေတ်တွဵုရးဂှ်ရ တုဲကၠုၚ်ပ္ဍဲဂိတုဂျာန္နဝါရဳ (၁၅) တေံ သ္ဂုတ်သွာတ်လဝ် သွက်ဂွံပြံၚ်လှာဲဒက်ပ္တန်ဂှ်ရ။

ကံၚ်ဇြဳဖေဝ်ဒရာဍုၚ်မန် (MSFC) ဝွံ အခိၚ်လၟုဟ် ပ္ဍဲကဵုအလဵုအသဳညဳသၟဟ်ဂကူ (NUG) ဂှ် ဝန်ဇၞော်ပိတၠ ကေုာံ ပ္ဍဲကဵုကံၚ်ဇြဳကဵုကသပ် ပရေၚ်ညဳသၟဟ်ဂကူ (NUCC) ဂှ် ညးစၞးပိတၠ ပါလုပ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MSFC