သၠုၚ်ပ္တိုန်အသိၚ်ပရေၚ်ပၞာန် ပ္ဍဲပွိုၚ်ဍုၚ်ကျာ်ထဝ်ရောၚ် KRF လလောၚ်တြး

ကျာ်ထဝ်၊ မေ(၃)

တွဵုရးဍုၚ်မန်၊ ပ္ဍဲပွိုၚ်ဍုၚ်ကျာ်ထဝ်ဂှ် သ္ပတမ်နူဂိတုဏံတုဲ ညံၚ်တၠအဝဵုပၞာန် ဂွံဒေါံကၟိုၚ်စှ်ေ သၠုၚ်ပတိုန်အာ အသိၚ်ပၠန်ဂတး ပရေၚ်ပၞာန်ရောၚ်ဂှ် ဂကောံဇြဟတ်ပၠန်ဂတးကျာ်ထဝ် KRF ကဵုကၠုၚ်တၚ်သမ္တီ လလောၚ်တြးကၠုၚ် နကဵုစၟတ်တ္ၚဲ(၁) ဂိတုမေရ။

ဂကောံဇြဟတ်ပၠန်ဂတးကျာ်ထဝ် KRF ဂှ်မ္ဂး ဟိုတ်နူသၠုၚ်ပတိုန်အသိၚ် ပရေၚ်ဗတိုက်ပန်ပှော် ပ္ဍဲဒၞာဲဆေၚ်ဆက်ကဵု ကံၚ်ဇြဳပၞာန်ဂှ်ရ ညံၚ်ပရေၚ်ဂီုကၠီု၊ ပရေၚ်ဒးဒုၚ်ဂိ ညးဍုၚ်ကွာန်တအ် ဟွံဂွံဒှ် ကဵုကၠုၚ်သမ္တီသာ်ဏံရဂှ် ဟီုသ္ဂးလဝ်ရ။

နကဵုညးဍုၚ်ကွာန်တအ် ညံၚ်ဟွံဂွံသ္ပ ပရေၚ်အာကၠုၚ် ပ္ဍဲဗ္ဒာဲဂကောံရပ်လွဟ် သၟဝ်တဲကံၚ်ဇြဳပၞာန်၊ စမြိုၚ် ဌာနမဆေၚ်စပ်ကီု သီုကဵုသ္ဇိုၚ်ဝန်၊ ညးပလံၚ်ပရိုၚ်၊ ဒၞာဲကံၚ်ဇြဳပၞာန်ဖျေံလဝ်ဗဒိုပ်၊ ဗဒိုပ်ဇူဒီု၊ ဟဝ်တေဝ်၊ ဆေၚ်စသုၚ် ကံၚ်ဇြဳပၞာန်ကဵုလဝ်အခေါၚ်တအ်ဂှ် အာတ်လဝ်အခေါၚ် ဗွဲလၟေၚ်မေတ္တာရ။

ဟွံဒ္ဂေတ်ဗက်အတိုၚ်တၚ်လလောၚ်တြးတုဲ ယဝ်ရပရေၚ်အာကၠုၚ်ဆက်စပ် နွံကၠုၚ်မ္ဂး ဖိုလ်အဆက် က္တဵုဒှ်လကြဴတအ် နကဵု KRF ကေတ်လျိုၚ် သောၚ်ကလးကဵု ဟွံသေၚ်ရဂှ် ကဵုလဝ်သတိရ။

ဂကောံဇြတ်ပၠန်ဂတးကျာ်ထဝ် KRF ဂှ် ဒှ်ဂကောံပၠန်ဂတး ပံၚ်တောဲကဵု ဒပ် KNLA တုဲ ဒှ်ဂကောံလုပ်စိုပ်ဗတိုက်ဒၟံၚ် ဗဒိုပ်ဗၠာဲသၟိၚ်ကြုၚ်ကပေါဝ်၊ သၞေဟ်ကၚ်စၟဳစၟတ်မုဟ်ပြေၚ်(မုပ္ပလၚ်)ကီု သီုကဵုသၞေဟ်ကၚ်စၟဳစၟတ် ပွိုၚ်ဍုၚ်ၜဳကလေၚ်၊ ဗဒိုပ်BGF၊ ဒပ်ကံင်ဇြဳပၞာန်တအ် မွဲခနမွဲခနရ။

ပရိုၚ် – သြၚ်လောန်တိုၚ်(မ်)

ဗီုရုပ် – Thaton PDF