မတ်မလီု၊ မေ (၃)
နဒဒှ်ဥက္ကဌ ဗော်သွးကောန်ဂကူကရေၚ် KNU မရနုက်ကဵု (၁၀) တၠဂှ် ဗဒိုဝ်သဝ်ဂွါထူဝေန် ဂွံဒုၚ်ရုဲစှ်လဝ်ရောၚ် ညးမၞုံအခေါၚ်ဟီုဂး KNU ဗဒိုဝ်သဝ်တဝ်နဳ သ္ပဒတန်လဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
ပဒိုဝ်သဝ်ဂွါထူဝေန် သီုကဵုဒှ်ဒုဥက္ကဌ KNU ဂှ် ပ္ဍဲကဵုကောံဓရီုကောန်ကရိတ် KNU မရနုက်ကဵု (၁၇) ဝါ မကၠောန်ဗဒှ်လဝ်လၟုဟ်ဏံဂှ် ရုဲစှ်ပ္တိုန်လဝ် နကဵုသၞောတ်မာဲရ။
ပဒိုဝ်သဝ်ဂွါထူဝေန်ဝွံ ဒၟါနူသွဟ်မာဲ တုပ်ဒၟံၚ်ကဵု ပဒိုဝ်သဝ်သေဝ်ဂါ ဥက္ကဌ ဒပ်မဟာ (၃) ခရိုၚ်ညံၚ်လေဝ်ပေန်ဂှ်ရ ကြဴနူကလေၚ်ကဵုမာဲ (၂) ဝါကိတ်တ်တုဲဂှ် ဂွံဒုၚ်ရုဲစှ်လဝ် နဒဒှ်ဥက္ကဌ နကဵုမာဲမဂွံဇၞးကေတ်လဝ် (၂) မဂှ်ရ။
ပဒိုဝ်သဝ်ဂွါထူဝေန် မဒှ်ကွးဘာတြေံ တက္ကသိုလ်ပရေၚ်ပိုန်ဒြပ်လ္ဂုၚ်မွဲတၠဂှ်ဝွံ နူကဵုခရိုၚ်ဗိက်၊ ထဝါဲ KNU ဂှ်မွဲကဆံၚ် စိုပ်ကၠုၚ်ကဆံၚ်ဗဟဵုတုဲ အခါလၟုဟ်ဂှ် ဒှ်ကၠုၚ်ဥက္ကဌ KNU မရနုက်ကဵု (၁၀) တၠရ။
သဝ်မူတူသေဖိုဝ် ဥက္ကဌ KNU အာယုက်ပေၚ်အာ (၉၀) သၞာံတုဲဂှ် ၜိုန်ရတိုန်စိုပ်လဝ်ကောံဓရီုဂှ်ကီုလေဝ် ဒၟါနူပရေၚ်ထတ်ယုက်တုဲ ဂွံကလေၚ်ဂွံဒုၚ်ရုဲစှ်လဝ် ဟွံမွဲပုဟ်ဂှ် ဂွံတီကေတ်ရ။
ကောံဓရီုကောန်ကရိတ် KNU မရနုက်ကဵု (၁၇) ဝါ မစကၠောန်ဗဒှ်လဝ် နူကဵုဂိတုဨပရဴ (၂၄) တေံဂှ် နူကဵုဒပ်မဟာ (၅) ခရိုၚ်ဘာပန် တိုန်စိုပ်လဝ် ဟွံမွဲပုဟ်ဂှ် ပရိုၚ်ဂမၠိုၚ် မံက်တိတ်ဒၟံၚ်ကီုလေဝ် ညးမၞုံအခေါၚ်ဟီုဂး KNU ဂှ် စပ်ကဵုလ္တူဏံတုဲ ကလေၚ်ဟီုလဝ်မွဲမွဲဂှ် ဟွံမွဲရ။
ကောံဓရီုကောန်ကရိတ် KNU မကၠောန်ဗဒှ်လဝ်လက္ကရဴအိုတ် ပ္ဍဲသၞာံ ၂၀၁၇ တေံဂှ် (၄) သၞာံမွဲဝါ ၜိုန်ရဒးကၠောန်ဗဒှ်ကီုလေဝ် ဟိုတ်နူယဲကပ်ကဝ်ဝေဒ် ကေုာံ အကာဲအရာပရေၚ်ဍုၚ်ကွာန်၊ ပရေၚ်ပၞာန်တံဂှ်တုဲ ပရေၚ်ကၠောန်သ္ပကောံဓရီုဂှ် ဒးပဆုဲပြံၚ်လဝ် ဂၠိုၚ်ၚ်ကဵုဝါရ။
ဗီုဓာတ်−KNU
sanlontai