တၞၚ်သြဳ၊ မေ(၄)
ဟိုတ်နူစိုပ်ကၠုၚ်အခိၚ်ကသီုဂှ်ရ သွက်ညးပါဲပၞာန် ပ္ဍဲရးဒေသဇၞော်တၞၚ်သြဳ ၃၀,၀၀၀ ပြၚ်တအ် နွံဒၟံၚ်ပၟိက် အရီုဗၚ်ကၟဳဗ္ဒၚ် နဒဒှ်ကာတၟေၚ်ရဂှ် ညးတာလျိုၚ်ဂကောံရီုဗၚ်ထံက်ပၚ် ညးပါဲဘဲပၞာန် ဒဵုဟနာတ်-တၞၚ်သြဳ ဟီုကဵု ဌာန်ပရိုၚ်သြၚ်လောန်တိုၚ်(မ်)။
ပ္ဍဲရးဒေသဇၞော်တၞၚ်သြဳဂှ် ကြဴနူဒပ်ပၞာန်သီအဝဵုတုဲ မ္ၚးနူပေါဲဗတိုက်ၜါလ္ပာ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်တအ်ဂှ်ရ ညးဒေသ ၃၀,၀၀၀ ပြၚ် ဒးဂြိပ်ဒဴဒၟံၚ် ပ္ဍဲဂြိုပ်ဒဵု ဒၞာဲဌာန်ဗၠးဘဲ ကေုာံ ပ္ဍဲဗဒိုပ်ပါဲပၞာန်တအ်ရ။
ညးဍုၚ်ကွာန်ပါဲပၞာန်တအ်ဂှ် ဟိုတ်နူကၟဳဗ္ဒၚ်တာဲယာယဳ ကၟဳလဝ် နူကဵုသၞာံတုဲကၠုၚ်တေံဂှ် ဟိုတ်နူအိုဟ်တြေံလီုလာ်ကၠုၚ်တုဲ သွက်အခိၚ်ကသီု ခြာဟွံလအ်ဏံ က္တဵုဒှ်ကၠုၚ်အခက်ခုဲ ဒၞာဲမံၚ်ညးသ္ကအ်အိုတ်ရ။
ညးတာလျိုၚ် ဂကောံရီုဗၚ်ထံက်ပၚ်ညးပါဲဘဲပၞာန် ဒဵုဟနာတ်-တၞၚ်သြဳဂှ်မ္ဂး ဗတိုက်ဖ္အောဝ်လဝ် ဂကောံမဆေၚ်စပ်ကီု သီုကဵုညးဍုၚ်ကွာန်တအ် သွက်ဂွံရီုဗၚ်ကဵု ညးပါဲပၞာန် ဒှ်ဒၟံၚ်အခက်ခုဲဒၞာဲဒၟံၚ်တအ် ၜိုတ်မာန်ကဵုမာန်ရ။
သ္အာၚ်နူဏံပၠန် ညးဍုၚ်ကွာန်ပါဲဘဲပၞာန်တအ်ဂှ် သ္အာၚ်နူဇွောံမဂဥုဲဇဗတုဲ ဆက်နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ် သွက်အခိၚ်ကသီုရဂှ် ဟီုသ္ဂးလဝ်ရ။
ညးဍုၚ်ကွာန်ပါဲပၞာန်တၞၚ်သြဳတအ်ဂှ် ဟိုတ်နူဒှ်ဂဝိၚ် ဂွိၚ်ကဵုဒပ်ကံၚ်ဇြဳပၞာန် ကၠုၚ်ပန်ပှော်လွဟ်ဇၞော် ကေုာံပရေၚ်ဗတိုက်ပန် ကဵုက္ၜၚ်ကျာတုဲ လ္တူဒးဒၟံၚ် ပ္ဍဲဗဒိုပ်ပါဲပၞာန်ဂှ် လၟိဟ်မၞိဟ်ပါဲပၞာန် မံၚ်တန်တဴဒၟံၚ် ပ္ဍဲကၠအ်ဥဒျာန် နကဵုအစဳဇန်ဇကုဇကု သာဂၠိုၚ်ဒၟံၚ်ရဂှ် ဂွံတီကေတ်ရ။
ပ္ဍဲရးဒေသဇၞော်တၞၚ်သြဳဂှ်မ္ဂး ပွိုၚ်ဍုၚ်ထဝါဲ၊ လံၚ်လုၚ်၊ ပလဝ်၊ တၞၚ်သြဳတအ်ဂှ် ညးဍုၚ်ကွာန်ပါဲပၞာန် ၃၀,၀၀၀ ပြၚ် သှ်ေဒၟံၚ်ဏီတုဲ ပ္ဍဲပွိုၚ်ဍုၚ်ပလဝ်ဂှ် ညးပါဲဘဲပၞာန် မၞုံဒၟံၚ်ဂၠိုၚ်အိုတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် -Social Media
sanlontai