မတ်မလီု၊ မေ(၅)
ကောံဓရီုသဳကၠဳ ဗော်သွးကောန်ဂကူကရေၚ် KNU ဗဟဵုဂှ် ဆက်ကၠောန်ဗဒှ်လဝ် ပ္ဍဲဂိတုမေ စၟတ်တ္ၚဲ (၄)ဂှ်တုဲ ပဒိုဝ်သဝ်သေဝ်ဂေ ညးဒးဒုၚ်ရုဲစှ်ပ္တိုန်လဝ် နဒဒှ်ဒုတိယဥက္ကဋ္ဌဂှ် ထပ်ဒးဒုၚ်ရုဲစှ်လဝ် သွက်ဂွံပံၚ်တောဲကေတ်အာတာလျိုၚ် နဒဒှ်ဝန်ဇၞော် ဌာနပရေၚ်စဵုဒၞာရဂှ် ဂွံတီကေတ် နူတမ်ရိုဟ်တၚ်ဂၞၚ်ပရိုၚ် KNU ရ။
ပ္ဍဲပေါဲရုဲစှ်ကောံဓရီုဗဟဵု KNU ဂှ် ဌာနန္တရ ဥက္ကဋ္ဌ KNU ကီု သီုကဵု ဒုတိယဥက္ကဋ္ဌ၊ ညးအုပ်ကာနာနာ၊ ဖက်ဆောညးအုပ်ကာ(၁)၊ ဖက်ဆောညးအုပ်ကာ(၂) ကေုာံ ဌာနန္တရဂအုပ်နာဲဗ္စာသၞောဝ်ဓဝ်တအ် ရုဲစှ်ပ္တိုန်လဝ် ပ္ဍဲတုဲကၠုၚ်မွဲၜါတ္ၚဲဏံတုဲဂှ် ဂိတုမေ စၟတ်တ္ၚဲ(၄) တ္ၚဲဏံမ္ဂး ဌာနန္တရဝန်ဇၞော် ဌာနသှ်ေသၟေဟ်ဒၟံၚ်လ္ၚဵုတအ်ဂှ် ဆက်ရုဲစှ်ပ္တိုန်လဝ် ပ္ဍဲပေါဲသဳကၠဳကောံဓရီုဂှ်ရ။
နဒဒှ်ဥက္ကဋ္ဌ KNU တၟိဂှ် ပဒိုဝ်သဝ်ဂွေဝ်ထူဝေန် ကေတ်လဝ်တာလျိုၚ်ဒုဥက္ကဋ္ဌအခိၚ်ကၠာတေံဂှ် ဒးဒုၚ်ရုဲစှ်ပတိုန်လဝ်တုဲ နဒဒှ်ဒုတိယဉက္ကဋ္ဌဂှ် ပဒိုဝ်သဝ်သေဝ်ဂေ၊ နဒဒှ်ညးအုပ်ကာ ပဒိုဝ်သဝ်တာဒိုဝ်မူ၊ နဒဒှ်ဖက်ဆောညးအုပ်ကာ (၁) ပဒိုဝ်သဝ်တဝ်တဳဘွဲ၊ နဒဒှ်ဖက်ဆောညးအုပ်ကာ(၂) ပဒိုဝ်သဝ်လှထောန် ကေုာံ နဒဒှ်ဂအုပ်နာဲဗ္စာသၞောဝ်ဓဝ်ဗဟိုဝ် ပဒိုဝ်နဝ်မျာၚ်ဖိုဝ်တအ် ဒးဒုၚ်ရုဲစှ်ပ္တိုန်လဝ်ရ။
နဒဒှ်ဝန်ဇၞော်ဌာနပရေၚ်စဵုဒၞာဂှ် ပဒိုဝ်သဝ်သေဝ်ဂေ ညးဒးဒုၚ်ရုဲစှ်ပ္တိုန်လဝ် နဒဒှ်ဒုတိယဥက္ကဋ္ဌဂှ် ဒးပံၚ်တောဲ ကေတ်အာတာလျိုၚ်ရောၚ်တုဲ ပဒိုဝ်သဝ်ကနေဝ်ဖဝ် နဒဒှ်ဝန်ဇၞော်ပရေၚ်အပ္ဍဲဍုၚ် ကေုာံပရေၚ်သာသနာ၊ ပဒိုဝ်သဝ်လေဝ်ဇြေဂှ် နဒဒှ်ဝန်ဇၞော်ပရေၚ်ဆက်စၠောံဂၠံၚ်ဍာန် ဒးဒုၚ်ရုဲစှ်ပ္တိုန်လဝ်ရ။
နဒဒှ်ဌာနဝန်ဇၞော်ပရေၚ်ဍုၚ်သ္အာၚ် KNU ဂှ် ၜိုန်ရပဒိုဝ်သဝ်တဝ်နဳ ဒးဒုၚ်ထပ်ရုဲစှ်လဝ်ကီုလေဝ် ဝန်ဇၞော်ဌာနဗွဲမဂၠိုၚ်ဂှ်မ္ဂး ရုဲစှ်ပတိုန်လဝ် မၞိဟ်တၟိရဂှ် ဂွံတီကေတ် နူတမ်ရိုဟ်တၚ်ဂၞၚ်ပရိုၚ် KNUရ။
ပ္ဍဲဗော်သွးကောန်ဂကူကရေၚ် KNU ဂှ် ဒက်ပ္တန်လဝ် နကဵုဌာနအပံၚ်လၟိဟ် (၁၄) ဌာန မပါလုပ် သီုဌာနပရေၚ်စဵုဒၞာ၊ ဌာနပရေၚ်ဍုၚ်သ္အာၚ်၊ ဌာနဝန်ဇၞော်ပရေၚ်အပ္ဍဲဍုၚ် ကေုာံပရေၚ်သာသနာ၊ ဌာနဂြိုပ်ဆု၊ ဌာနက္ဍိုက်က္ဍိုပ်ပရေၚ်ပညာ ကေုာံပရေၚ်ယေန်သၞာၚ်၊ ဌာနပရေၚ်ထတ်ယိုတ် ကေုာံပရေၚ်ရီုဗၚ်ဟံၚ်ပြာ်၊ ဌာနပရေၚ်ဆက်စၠောံဂၠံၚ်ဍာန်၊ ဌာနပရေၚ်စန္ဒက် ကေုာံလလောၚ်ပရိုၚ်ရ။
ပရိုၚ်သြၚ်လောန်တိုၚ်(မ်)
ဗီုရုပ် -KNU
sanlontai