ကောန်ဂကူကြုက် က္လိလောန်လဝ်ဒုဟ်ဒဏ်ဂစိုတ်မၞိဟ် (၄)တၠ MNDAA ဖျေံဒဏ်ဂစိုတ်

လာယှိုဝ် – မေ (၅)

ကောန်ဂကူကြုက် (၄)တၠ က္လိလောန်လဝ်ဒုဟ်ရာဇဝတ်ဗွဲမဂၠိုၚ် မပါလုပ် သီုဂဗုတ်ဂစိုတ်လဝ်မၞိဟ် (၉)တၠ ပ္ဍဲဍုၚ်လာယှိုဝ် တွဵုရးသေံဇၞော်သၟဝ်ကျာတအ်ဂှ် ဂကောံအုပ်ဓုပ် ဒပ်မဟာမိတ်ဒဳမဝ်ကရေတ်တေတ်ကောန်ဂကူဗမာ (MNDAA) ဒေသတၟေၚ် လၟိဟ်(၁) ဖျေံလဝ်ဒဏ်ဂစိုတ်ရဂှ် လလောၚ်တြးလဝ် ပရိုၚ်ရ။

ဍေံတအ်ဂှ် ကလိလောန်လဝ်ဂဗုတ် မပ္တံကဵု ဂဗုတ်ပၠံၚ်ၜး၊ ဂဗုတ်တံၚ်ရပ်မၞိဟ်အာတ်သြန်၊ ဂဗုတ်ဂစိုတ်မၞိဟ် ပံၚ်(၂၅)ဂဗုတ်တုဲ ညးဒးဒုၚ်ဂစိုတ်လဝ်တအ်ဂှ် တြုံ (၇)တၠ၊ ဗြဴ (၂)တၠဒှ်တုဲ ပ္ဍဲကဵုဂှ် ကောန်ဍုၚ်ကြုက် (၁)တၠ ကောန်ဍုၚ်ဗၟာ (၈)တၠ ပါလုပ်ဒၟံၚ်ရဂှ် ဟီုသ္ဂးလဝ်ရ။

ပၞောဝ်ကဵုညးဒးဒုၚ်ဖျေံလဝ်ဒုဟ်ဒဏ် ကဵု MNDAA ဂှ် ဒှ်ယှိဝေအ်ယုမ် (၂၃)သၞာံ၊ ကဝ်ယှောက်ဝေ (၂၉)သၞာံ၊ ကဝ်ယှောက်ခွမ်(၂၁) သၞာံ၊ ယှိဝေအ်ချာန်(၁၈)သၞာံတအ်တုဲ ညးတအ်ဂှ် ဒှ်ညးမံၚ်ဒၟံၚ် ပ္ဍဲဍုၚ်လာယှိုဝ်တုဲ ယှိဝေအ်ယုမ် ကဵု ကဝ်ယှောက်ခွမ် ၜါတၠဏံ ဒှ်ကောန်ဒပ်ပၞာန်ညးဍုၚ်ကွာန်မာန်ပါန် သၟဝ်တဲကံၚ်ဇြဳပၞာန်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

အခိၚ်က္လိလောန်လဝ်ဒုဟ်ဒဏ် သြန်ညးတအ်ဂွံလဝ်ဂှ် ဒှ်သြန် ကေုာံၚုဟ်မးကပေါတ် သြန်ကြုက် (၄.၇၇) ပြကောဋိကိုတ် ကေုာံ သြန်ဗၟာ(၇၄၅၁) ပြကောဋိကိုတ်နွံတုဲ ကွဳစက် CROWN (၅) ဖ္ဍိုက်၊ VO – (၁)ဖ္ဍိုက်၊ Lexus (၁)ဖ္ဍိုက်၊ TOYOTA (၁)ဖ္ဍိုက်၊ ကံၚ်စိန် (၂)ဇြေဟ်၊ တအ်တုဲ ဆက်ဂၠိုက်ဂၠာဲဒၟံၚ် သြန်သှ်ေနူဍေံတအ် သုၚ်စောဲရပ်စပ်လဝ်ရဂှ် MNDAA ဟီုသ္ဂးလဝ်ရ။

သ္အာၚ်နူဂှ်ပၠန် အခိၚ်က္လိလောန်ဒုဟ်ဒဏ်ပါလုပ်ဒၟံၚ်တုဲ ညးဂြိပ်ဒၟံၚ်တအ်ဂှ် ဗ္ဒပ်ကောပ်ကာဲဂဗုတ် ဗက်ဂၠိုက်ဂၠာဲရပ်စပ်ဒၟံၚ်တုဲ ကြဴနူဒပ်ပၞာန်သီအဝဵုတုဲဂှ် ပရေၚ်ပရောပရေၚ်မၞိဟ် ပရေံဟုတ်ယုတ်စှ်ေ က္တဵုဒှ်ဒၟံၚ်မွဲခနမွဲခနတုဲ ဗွဲတၟေၚ်မ္ဂး ပ္ဍဲဒေသ မပ္တံကဵုလာယှိုဝ် မူသေဝ် တွဵုရးသေံသၟဝ်ကျာတအ်ဂှ် ဒက်ဂကောံ က္လိလောန်ဒၟံၚ်ဒုဟ်ရာဇဝတ် သၞောတ်စှ်ေစှ်ေဂှ် ဘပဠဒၟံၚ်ညးဍုၚ်ကွာန်တအ် ပရေံပရေံရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ဂိတုမေ ပ္ဍဲစၟတ်တ္ၚဲ(၁)တုဲကၠုၚ်တေံ ကၠောန်ဗဒှ်လဝ် ကောံဓရီုဆေၚ်စပ်ကဵု တၚ်စဳရေၚ် ရုၚ်သၞောဝ်ဓဝ်ယာယဳ ဂကောံပရေၚ်အုပ်ဓုပ်ဒေသတၟေၚ်(၁) တွဵုရးသေံ ပ္ဍဲခရိုၚ်မူပါန်မွဲဒၞာဲရဂှ် ဂွံတီကေတ်လဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – The Kokang