အကာဲအရာကေတ်လဝ်အရေဝ်ကဵု ကောန်ဒပ်စဵုဒၞာချောၚ်ဥူလ္ၚဵု ပြိုက်ဂစိုတ်လဝ် သၟတ်(၇)တၠဂှ် NUG လလောၚ်တြး

ချောၚ်ဥူ- မေ(၅)

ရးဒေသသေတ်ဂါၚ်၊ ပွိုၚ်ဍုၚ်ချောၚ်ဥူဂှ် ကောန်စဵုဒၞာကွာန်လ္ၚဵုဂှ် ဟိုတ်နူပြိုက်ဂစိုတ်လဝ် သၟတ်(၇)တၠ နကဵုတၚ်စောတ်စောဲ ဒဒှ်ညးကဵုပရိုၚ်ကံၚ်ဇြဳပၞာန်ဂှ်ရ အကာဲအရာကေတ်အရေဝ် ရေၚ်တၠုၚ်ဒၟံၚ်ဂှ် NUG လလောၚ်တြးလဝ် ပရိုၚ်ရ။

ပ္ဍဲဂိတုအဝ်ဂေတ် စၟတ်တ္ၚဲ (၃၀) သၞာံတုဲကၠုၚ်တေံ ပ္ဍဲပွိုၚ်ဍုၚ်ချောၚ်ဥူ နကဵုတၚ်စောတ်စောဲ ဒဒှ်ညးကဵုပရိုၚ်ကဵုကံၚ်ဇြဳပၞာန် ပြိုက်ဂစိုတ်လဝ် သၟတ်(၇)တၠ မပါလုပ်သီုကောန်ၚာ်သၟတ် အာယုက်ဟွံပေၚ်ဏီ (၅)တၠတုဲ ညးက္လိလောန်လဝ်ဒုဟ်ဒဏ်တအ်ဂှ် ပ္ဍဲတ္ၚဲဂှ်ဟေၚ်ရပ်ဂွံလဝ်ကီု ဇွတအ်ဂှ် လော်န်ၜက်မွဲတ္ၚဲ ၜံက်ခါဲတုဲ ကၠောန်သ္ပလဝ် ပရေၚ်စၟဳစၟတ်ရ။

ဟိုတ်နူပရေၚ်ဒဒှ်ဏံတုဲ ညးဒးဒုၚ်ရပ်စပ်လဝ်တအ်ဂှ် ဒပ်စဵုဒၞာညးဍုၚ်ကွာန် ပွိုၚ်ဍုၚ်ချောၚ်ဥူ ပြံၚ်စၠောံကဵုလဝ် ဇရေၚ်ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်ချောၚ်ဥူ ပ္ဍဲဂိတုသေပ်တေမ်ဗာ စၟတ်တ္ၚဲ (၂၂)တုဲ ဒပ်ပရေၚ်ဂီုကၠီုပွိုၚ်ဍုၚ်ပံက်ဂဗုတ်တုဲ ထိၚ်ဒဝ်လဝ် ပ္ဍဲဒၞာဲတၞဟ်ခြာရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ဟိုတ်နူပြိုက်ဂစိုတ်ဒၟံၚ်ညးဍုၚ်ကွာန် တိတ်ဗၠးနူသၞောဝ် ဗီုလၟုဟ်ဏံတုဲ အခိၚ်စၟဳစၟတ် ညးတာလျိုၚ်ဂကောံစဵုဒၞာကွာန်ဂှ် ပရောဒဒှ်ဂြိုဟ်ပလီုအဓမ္မ ညးဗြဴတအ်တုဲ ပြိုက်ဂစိုတ်လဝ်ဂှ် ဒပ်စဵုဒၞာညးဍုၚ်ကွာန်ပွိုၚ်ဍုၚ် သ္ပလဝ်ဒ္တန်ကဵု ဌာန်ပရိုၚ် ပ္ဍဲဍုၚ်ဂမၠိုၚ်ရ။

ဆ္ဂးဂှ် စပ်ကဵုအကာဲအရာဏံတုဲ ဓမံက်ထ္ၜးလဝ် ပ္ဍဲတၚ်လလောၚ်တြး NUG ဟၟဲရ။

နကဵုအလဵုအသဳပရေၚ်ညဳသၟဟ်ကောန်ဂကူ ဟွံပါ်ခြာ ကောန်စး ကောန်သြိုဟ်တုဲ ညးက္လိလောန်ဒုဟ်ဒဏ်ညးလဵုဟွံဟီု သွက်ပရေၚ်အုပ်ဓုပ်သၞောဝ်ဓဝ် ကေတ်အာအရေဝ် ကဵုအာဒုဟ်ဒဏ် အတိုၚ်သၞောဝ်ဥပဒေ မၞုံတန်တဴဒၟံၚ်ရဂှ် ဓမံက်ထ္ၜးလဝ်ရ။

ပရေၚ်ဒဒှ်ဏံဂှ် သ္အာၚ်နူဟွံကိတ်ညဳကဵု ဒ္ဂေတ်ဝတ်ကောန်သ္ဂံၚ်တုဲ ဟိုတ်နူဖံက်ပ္ကဝ်ဒၟံၚ် အခေါၚ်အရာမၞိဟ်၊ အခေါၚ်အရာညးဗြဴ ကေုာံ အခေါၚ်အရာသၟတ်ဂှ်ရ နူကဵုလၟေၚ်ဂၠံၚ်တရဴစဳရေၚ်သၞောဝ်ဓဝ် သွာၚ်ပၞာန် သွာၚ်အရာပ် မွဲကဆံၚ် ကဵုအာသမ္တီ အကာဲအရာပရေၚ်ရေၚ်တၠုၚ် ကေတ်အရေဝ် အတိုၚ်သၞောဝ်ရောၚ်ဂှ် NUG ဟီုသ္ဂးလဝ်ရ။

ညးဒးဒုၚ်ပြိုက်ဂစိုတ်လဝ်ကဵု ဒပ်စဵုဒၞာကွာန်တအ်ဂှ် နူပွိုၚ်ဍုၚ်သေတ်ဂါၚ် ဒှ်ညးကၠုၚ်မံၚ်ချောၚ်ဥူတုဲ ညးဗြဴ(၄)တၠ ကေုာံ ညးတြုံ (၃)တၠဒှ်တုဲ ညးတအ်ဂှ် ဒှ်သၟတ် နူအာယုက်(၁၅) သၞာံ စဵုကဵု(၂၀)သၞာံပြၚ်ရဂှ် ညးဒေသတအ်ဟီုသ္ဂးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – NUG