ပခုက္ကူ – မေ (၉)
ရးဒေသမဂွေ၊ ပ္ဍဲပွိုၚ်ဍုၚ်ပခုက္ကူကဵု ပွိုၚ်ဍုၚ်ပေါက်တအ်ဂှ် ကောန်ဒပ်ကံၚ်ဇြဳပၞာန် ဒးဒုၚ်ဗတိုက်တံၚ်ခတိုဟ်လဝ်မာၚ်တုဲ ဒးချိုတ်လဝ် (၇)တၠ ဇီုကပိုက်ဒးလဝ်ဝပ် ဟွံအောန်နူ(၁၅)တၠရဂှ် (ပ.က.ဖ)မျာၚ် လလောၚ်တြးလဝ်ပရိုၚ်ရ။
ပ္ဍဲဂိတုမေ စၟတ်တ္ၚဲ (၇) တုဲကၠုၚ်တေံ ရေၚ်ယာဉ်ကွဳစက်ကံၚ်ဇြဳပၞာန် တတ်ကၠောံကၠုၚ် ပ္ဍဲကွာန်ကာန်တဝ်ဂှ် ဂကောံဒပ်စဵုဒၞာဒေသတအ် တံၚ်ခတိုဟ်လဝ်မာၚ်တုဲ ကွဳစက်ဂှ်လေဝ် တူအာပၟတ် ပ္ဍဲအရာပ် ဂျိုဝ်ပျာန်ကမ္မနဳဂှ်ရ။
တ္ၚဲတုဲကၠုၚ်ဏံ ပွိုၚ်မွဲတ္ၚဲဓဝ်ဂှ် ဂကောံကံၚ်ဇြဳပၞာန်ကဵု ဂကောံပျူသဝ်ထဳပံၚ်တောဲ ဂေတ်ဒၟံၚ်ကၚ် ပ္ဍဲဗ္ဒာဲကွာန်အုမ်တဝ် ပွိုၚ်ဍုၚ်ပေါက်ဂှ် ဂကောံဗိုလ်တေတ်ဇြေ(ဗိုလ်တစ္ဆေ) ကဵု ဂကောံစဵုဒၞာကွာန်ပေါက်၊ (ပ.က.ဖ)မျာၚ်တအ် ပံၚ်တောဲဗတိုက်လဝ် နွံဏီရ။
“အခိၚ်ကံၚ်ဇြဳပၞာန်ကဵု ပျူသဝ်ထဳ ၜိုတ်ပန်စှ်ေ ပါ်က္ဍိုပ် ကေတ်ဒၟံၚ်ပရေၚ်ဂီုကၠီု ဗ္ဒာဲကွာန်အုမ်တဝ် ပွိုၚ်ဍုၚ်ပေါက်ဂှ် ဗတိုက်လဝ်ကဵုမာၚ် (၁၆)မ ပ္ဍဲပလိုတ်မေဝ်ဇြလဳတာန် သ္ကဲဂၠံၚ်ဇၞော် ကွာန်အုမ်တဝ်ရ” ဂှ် ဗိုလ်လေတ်ကျာ နူ(ပ.က.ဖ)မျာၚ် တံဒပ်လၟိဟ်- ၁ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် ကရောၚ်ပၞာန်ဏံ ထပ်ဗပေၚ်လဝ်ဇြဟတ်တုဲ ဆက်ကြတ်ဗတိုက်လဝ် အခိၚ်မၚ်ဒၟံၚ်ကၚ်ရဂှ် ညးဟီုသ္ဂးလဝ်ဏီရ။
ဟိုတ်နူပရေၚ်ပန်ပှော်ဏံတုဲ လ္ပာ်ကံၚ်ဇြဳပၞာန် မ္ၚးနူဒးလဝ်ဝပ်သ္ကာတ်မြဟ် (၆) တၠ ဒးချိုတ်လဝ် (၃)တၠရဂှ် ၜိုန်ရဟီုလဝ်ကီုလေဝ် လၟိဟ်ချိုတ်တ်ပၠိုတ်တ်ဂှ်မ္ဂး ဂၠိုက်ဂၠာဲဟွံဂွံဏီရဂှ် ဟီုသ္ဂးလဝ်ရ။
ကောန်ဒပ်ကံၚ်ဇြဳပၞာန်ဂှ် ပ္ဍဲဂိတုမေ စၟတ်တ္ၚဲ(၈) တ္ၚဲဏံ အခိၚ်နူဂယးဂှ်လေဝ် သ္အာၚ်နူမဗုမ် (၄၀)မတုဲ ဗတိုက်လဝ်ကဵု ဗုမ်ပၟတ် ၜိုတ် (၂၀)မဂှ်ရ ဒးချိုတ်လဝ် (၁)တၠတုဲ ဇီုကပိုက်ဒးလဝ်ဝပ် (၁)တၠရဂှ် (ပ.က.ဖ)မျာၚ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai