“အာဂတနူဏံ ပေါဲဗတိုက် သ္ကာတ်မြဟ်ကၠုၚ်ဏောၚ် တော်ကေတ်လဝ်ရ။ ဟိုတ်နူပရေၚ်ပြံၚ်သၠာဲဥက္ကဋ္ဌတုဲ ပေါဲဗတိုက် ဒှ်ကၠုၚ် ဏောၚ် ပိုဲတော်လဝ်ဟွံဂွံ။ တော်ချရံၚ်ကဵု အကာဲအရာကံၚ်ဇြဳပၞာန် အခိၚ်လၟုဟ်ရ။ ပရေၚ်ကြေပ်ဂြတ် သာတုဲဂၠိုၚ်တိုန်ကၠုၚ်ဗက် ပေါဲဗတိုက်တအ်လေဝ် နူလ္ပာ်ဍေံတအ် သာကၠောန်သ္ပကၠုၚ်ဏောၚ် အဲတော်ကေတ်လဝ် ဗီုဏံရ”

ဟိုတ်နူအကာဲအရာယဲကပ်ဂိုဝ်ဝေတ် ကဵုအကာဲအရာပရေၚ်ဍုၚ်ကွာန် အကာဲအရာပၞာန်အကာဲအရာနာနာသာ်တုဲ ကောံဓရီုသဳကၠဳ ဗော်သွးကောန်ဂကူကရေၚ် KNU မရနုက်ကဵု(၁၇) ဝါ ဒးဒုၚ်ပဆုဲပြံၚ်လဝ်ဂှ် နူဂိတုဨဗြဴ တုဲကၠုၚ်စၟတ်တ္ၚဲ (၂၄) စဵုကဵုဂိတုမေ စၟတ်တ္ၚဲ (၄) ကၠောန်ဗဒှ်လဝ် ပွိုၚ် (၁၁)တ္ၚဲရ။ ကြဴနူကောံဓရီုသဳကၠဳတုဲ ဗတိုက်သရိုဟ်အာ ဝါဒမဟာဂကူ ကေုာံ သၞောတ်တၠအဝဵုပၞာန်တုဲ ပံၚ်တောဲကဵု ဂကောံဇြဟတ်ပၠန်ဂတးကောန်ဍုၚ်အရၚ်၊ ဂကောံဇြဟတ်ဒဳမဝ်ကရေဇြဳ၊ အကွပ်ကဆံၚ်မၞိဟ်နာနာတုဲ လုပ်ဒၟံၚ်ပေါဲဗတိုက် သွက်ကၟိန်ဍုၚ်ပံၚ်ကောံဖေတ်ဒရေဝ်ဒဳမဝ်ကရေဇြဳ ဂွံမံက်ဂတဝ်တိုန်ကၠုၚ်ကီု၊ သွက်ပရေၚ်ဒဳမဝ်ကရေဇြဳကီု၊ သွက်ကဆံၚ်ကောန်ဂကူတုပ်သၟဟ် ကေုာံ သွက်သ္ဂောံက္လိဂွံ အခေါၚ်ပျးဌာန်ဇကုဇကုမာန်တအ်တုဲ ပ္တိတ်ဇြဟတ်ရေၚ်တၠုၚ်အာရောၚ်ဂှ် နူလ္ပာ် KNU လလောၚ်တြးကၠုၚ်လဝ်ရ။

ဟိုတ်ဂှ်ရ စပ်ကဵုလၟေၚ်ကမၠောန်နဗော်သွးကောန်ဂကူကရေၚ် KNU ဆက်ရေၚ်တၠုၚ်အာ ဂတဏံဂမၠိုၚ်ကီု၊ ဟိုတ်နူသွာၚ်က္ဍိုပ်သ္ကိုပ်ကဆံၚ်လတူ ပြံၚ်သၠာဲကၠုၚ်တုဲ ပရေၚ်ဍုၚ်ကွာန် ဗီုပြၚ်လဵု က္တဵုဒှ်ကၠုၚ်ရောကီု၊ စပ်ကဵုအကာဲအရာပၞာန်တုဲ ဆက်စၠောံသၟာန်လဝ် ပဒိုဝ်သဝ်ကလေဝ်ဇြေ ညးလုပ်ဂကောံကဝ်မတဳဗဟဵု KNU ရ။

-ကိုပ်ကၠာအိုတ်ဏံ စပ်ကဵုကောန်ဂရေတ် KNU လလောၚ်တြးကၠုၚ်လဝ်တုဲ လၟေၚ်ကမၠောန်ဂတဏံ ဗီုပြၚ်လဵု ဆက်နွံကၠုၚ်ရော။

လၟေၚ်ကမၠောန် ဒးကၠောန်အာဂတဏံ ပွိုၚ်ပန်သၞာံတအ်ဂှ်လေဝ်။ သောဲသောဲဗြောဲဗြောဲဂှ် ဟွံဂွံလလောၚ်လဝ်ဏီ။ ကမၠောန်ဒးကၠောန်အာဂှ် အခိၚ်လၟုဟ်ဏံ က္ဍိုပ်သ္ကိုပ်ဒးကေတ်လဝ်တာလျိုၚ် ပရေၚ်ဇဳဇန်ဖန်ဖက်တအ်ဂှ် ပါ်ပရအ်တာလျိုၚ်တုဲ ကၠောန်ရေၚ်တၠုၚ်ဒၟံၚ်ရ။

-ပံၚ်တောဲရေၚ်တၠုၚ်အာကဵု ဂကောံဇြဟတ်ပၠန်ဂတးကောန်ဍုၚ်အရၚ် ဂကောံဇြဟတ်ဒဳမဝ်ကရေဇြဳ ဂကောံအကွပ်ညးဍုၚ်ကွာန်နာနာတအ်ဏောၚ်ဂှ် ပါလုပ်ဒၟံၚ်ရ။ ပံၚ်တောဲရေၚ်တၠုၚ်အာ ဗီုပြၚ်လဵုရော။

တုဲတဴကဵုအကွပ်ကဆံၚ်နာနာ ကၠောန်ရေၚ်တၠုၚ်ဒၟံၚ်တုဲ သွက်ဂွံပံၚ်တောဲ ရေၚ်တၠုၚ်အာဏောၚ်ဂှ် တၚ်ရန်တၟံဗီုဏံ နွံရ။ တၚ်ညးတအ်ရေၚ်တၠုၚ်ဟီုဂှ် အကြာမွဲဂကောံကဵု မွဲဂကောံ ဗီုပြၚ်သဏ္ဌာန်ပၠန်ဂတးဂှ် ဍေံဟွံတုပ်ညးသ္ကအ်ပုဟ်။ ဂကောံပၠန်ဂတး ဗီုပြၚ်ဟွံတုပ်သၟဟ်ညးသ္ကအ် ပံၚ်ပကောံအကွပ်နာနာတုဲ ဗီုပြၚ်လဵု ဂွံပံၚ်တောဲရေၚ်တၠုၚ်အာဂွံရောဟီုဂှ် ဒးဆဵုဂဗသဳကၠဳညးသ္ကအ်ကၠာတုဲမှ ဂွံဖျေံအာလၟေၚ်ကမၠောန်ဂတတေံတုဲ သွက်ဂွံရေၚ်တၠုၚ်အာ ရန်လဝ်ဗီုပြၚ်ဏံရ။

-ပ္ဍဲပရေၚ်ပြံၚ်သၠာဲဥက္ကဋ္ဌ KNU ဂှ် အကာဲအရာပရေၚ်ပၞာန်၊ ပရေၚ်ဍုၚ်ကွာန် ဗီုပြၚ်လဵု ဆက်နွံကၠုၚ်မာန်ရော၊ လ္တူဏံ သ္ၚဳဂၠိပ်ကဵုညိ။

တုဲကၠုၚ်မွဲဂိတုပြၚ်တေံဂှ် ပိုဲကေၚ်ပ္တိတ်လဝ် လိက်ဒုၚ်စဳရေၚ် မွဲစံၚ်ရ။ အရာညးဍုၚ်ကွာန် မၞုံဒၟံၚ်ပ္ဍဲတိဍာ်ပိုဲ ဒးဒုၚ်စဒၟံၚ်သိုၚ် ပရေၚ်ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ်ဂှ်  တၚ်သ္ၚဳဂၠိပ် ပ္ဍဲလိက်ဒုၚ်စဳရေၚ်ဂှ် ပါလုပ်ဒၟံၚ်မွဲတၚ်ရ။ တော်လဝ်ဂှ်တှ်ေ ပရေၚ်အပြံၚ်သၠာဲ ဥက္ကဋ္ဌဒှ်ကီု ဟွံဒှ်ကီုဂှ် ဆက်စပ်ဒၟံၚ် နွံ ဟၟဲ ပိုဲဟွံတီကေတ်လဝ်ချိုတ်တ်ပၠိုတ်တ်ရ။ အာဂတနူဏံ ပေါဲဗတိုက် သ္ကာတ်မြဟ်ကၠုၚ်ဏောၚ် တော်ကေတ်လဝ်ရ။ ဟိုတ်နူပရေၚ်ပြံၚ်သၠာဲဥက္ကဋ္ဌတုဲ ပေါဲဗတိုက် ဒှ်ကၠုၚ်ဏောၚ် ပိုဲတော်လဝ်ဟွံဂွံ။ တော်ချရံၚ်ကဵု အကာဲအရာကံၚ်ဇြဳပၞာန် အခိၚ်လၟုဟ်ရ။ ပရေၚ်ကြေပ်ဂြတ် သာတုဲဂၠိုၚ်တိုန်ကၠုၚ်ဗက် ပေါဲဗတိုက်တအ်လေဝ် နူလ္ပာ်ဍေံတအ် သာကၠောန်သ္ပကၠုၚ်ဏောၚ် အဲတော်ကေတ်လဝ် ဗီုဏံရ

– ပ္ဍဲကောန်ဂရေတ် KNU ဂှ် စပ်ကဵု ပရေၚ်ကလေၚ်ဒက်ပ္တန်ပလေဝ်ပလေတ် ဌာနတအ် ကဵု ပရေၚ်မၞိဟ်သၟတ်တအ် ပါလုပ်ဒုၚ်ရုဲစှ်တုဲ ဟီုထ္ၜးကဵုညိ။

အခိၚ်ပိုဲကလေၚ်သ္ၚဳဂၠိပ် သၞောဝ်သ္ဇိုၚ်ဒက်ပ္တန်ဂှ် ဌာနစန္ဒက်ကဵု ဌာနလလောၚ်ပရိုၚ် ပိုဲစွံလဝ်ကီု၊ ဌာနပရေၚ်မိတ်ကီု ဌာနၜါဌာနဏံရ။ ဣဏံဂှ်မွဲ။ ဍေံဂှ် ဒၟာနူပါလုပ်ဒၟံၚ် ပ္ဍဲကမၠောန်က္ဍိုက်က္ဍိုပ်ပရေၚ်ဍုၚ်ကွာန်ဂှ်ရ။ ဌာနတအ်ဏံ ပိုဲပါဲစွံလဝ်ရ။ ပိုဲကလေၚ်စုတ်လဝ် ပ္ဍဲကဝ်မတဳတၞဟ် မွဲပၠန်ရ။ ကဝ်မတဳဟီုဂှ် ကလေၚ်ပၠုပ်စုတ်လဝ် ပ္ဍဲကဝ်မတဳ ပရေၚ်ဍုၚ်ကွာန်ကဵု ပရေၚ်စန္ဒက်တုဲ ကမၠောန်ကၠောန်ဒၟံၚ်လၟုဟ်ဏံ ဆက်ဂေတ်အာအတိုၚ်ပကတိတြေံပၠန်ရ။

ဒၟာနူသၟတ်တအ်ပါလုပ်ကၠုၚ်ဂှ်ရ ပ္ဍဲလ္တူလၟေၚ်ကမၠောန်ဂတဏံဂၠိုၚ်တိုန်ကၠုၚ်ဒၟံၚ်ဂှ် ပရေၚ်ဇီုကပိုက်ဒးဗွဲမဂၠိုၚ်နွံရ။ ပရေၚ်ဇီုကပိုက်ဒးဟီုဂှ် ဒၟာနူဒှ်မၞိဟ်ဍောတ်တ် မၞိဟ်အဇာလ္ဒောဝ်ဂှ်ရ အခိၚ်ပိုဲဓမံက်ရုပ်ရဴ လၟေၚ်ကမၠောန်အဓာန်ဂတဂှ် ကၠောန်အာကဵုအသိၚ်မာန်ကၠုၚ်ဏောၚ်။ သွာၚ်ညးဇၞော်သှ်ေဒၟံၚ်ဂှ်လေဝ် ထိၚ်ဒဝ် ပ္တပ်ကဵုဂၠံၚ်သၟတ်တအ်မာန်ဏောၚ်။ ပ္ဍဲလ္တူသၟတ်ပိုဲပါလုပ်ကၠုၚ်ဂှ် ပရေၚ်ချဳဒရာၚ် ကၠောန်ရေၚ်တၠုၚ်အာ ဇြဟတ်ခိုဟ်ကၠုၚ်ဏောၚ် ပတှ်ေကေတ်လဝ်ရ။

-အလန်လကြဴအိုတ်ဏံ လလောၚ်တြးကၠုၚ် တၚ်လစွံစိုတ် ပ္ဍဲလ္တူကမၠောန်ပရေၚ်ပိုန်ဒြပ် ဆက်စပ်ဒၟံၚ်ကဵုဒုဟ်ရာဇဝတ်တအ် နွံဒၟံၚ်ရ။ စပ်ကဵုအကာဲအရာဏံတုဲ ဟီုထ္ၜးကဵုညိ။

တၚ်စောတ်စောဲ တၚ်ချူတြးပတိုန်ထ္ၜးဂှ် ပိုဲဒစဵုဒစးလဝ်ရ။ အလန်ကိုပ်ကၠာအိုတ်ဂှ် ပ္ဍဲကဵုလိက်စံၚ် ဂွံဆဵုကေတ်လဝ် လ္တူလာၚ်တအ်ဂှ် ယဝ်ရရံၚ်ကေတ်တှ်ေ က္ဍိုပ်သ္ကိုပ်တအ် ပါလုပ်ထ္ပက်လဝ်စၟတ်တဲ ပိုဲဂွံညာတ်ကေတ်ရ။ ဆ္ဂးအရာဏံဂှ် ဒုဟ်ဒဏ်နွံဏောၚ် ဗၠေတ်ဒၟံၚ်ဏောၚ် ပိုဲဒုၚ်ဂိုၚ်ကေတ် ဟွံဂွံပုဟ်။ ဟိုတ်ဂှ်ရ ဆက်ကၠောန်အာ ပရေၚ်ဂၠိုက်ဂၠာဲစၟဳစၟတ်ဏောၚ်ဂှ် ဟီုလဝ်နွံရ။ ပရေၚ်ဂၠိုက်ဂၠာဲစၟဳစၟတ်ဏံလေဝ် နွံပၟိက်မ္ဂး ဗီုနွံပၟိက် သွက်ဂွံလလောၚ်တြးကဵုအာ ဟီုသ္ဂးလဝ်ရ။ ပရေၚ်ဂၠိုက်ဂၠာဲစၟဳစၟတ်ဏံလေဝ် ပ္ဍဲအခိၚ်ဂၠေံဂၠေံဂှ် ဒှ်ဟွံမာန်ပုဟ်။ ဒၟာနူအခိၚ်နွံဒၟံၚ်ဂှ်ရ ဒးရေၚ်အတၠုၚ်အာ မွဲကဆံၚ်တုဲမွဲကဆံၚ်ဏောၚ်။ ပိုဲဆက်ကၠောန်အာ ပရေၚ်ဂၠိုက်ဂၠာဲစၟဳစၟတ်ဏောၚ်။ ယဝ်ရဆဵုညာတ်မ္ဂး အတိုၚ်ဂၠံၚ်တရဴ လၟေၚ်ကမၠောန်စဳရေၚ်သၞောဝ်ဓဝ်ကရေၚ်ပိုဲ ဒးရေၚ်တၠုၚ်အာရ။ ပြဟ်ဟ်ဏံဂှ် ပေါဲဆဂွံတုဲဒှ်ဂှ်ရတှ်ေ သွက်ဂွံစဆက်ဂၠိုက်ဂၠာဲစၟဳစၟတ် တၚ်ခက်ခုဲနွံဒၟံၚ်ဏီရ။ ဆ္ဂးဂှ်လေဝ် သွက်ဂွံစဒက်ပ္တန်အာ ပလေဝ်ပလေတ်ဒၟံၚ်ရ။ သွာၚ်လ္ၚဵုဂှ်လေဝ် ပရဟ်ဒုၚ်တုဲ ပကောံပကေဝ်ဒၟံၚ် တၚ်ဂၞၚ်လေဝ် နွံရ။