နေပျဳဒဝ်၊ မေ (၁၃)
ညးလဵုမွဲဟွံဟီု ရပ်လွဟ်လက်နက်ဟၟဲကဵုသၞောဝ်တုဲ ဒဒှ်ရကလိလောန်ဖံက်ပ္ကဝ်တၚ်တာဒၞာ ယဝ်ရဒုဟ်ဒဏ်မံက်ဂတဝ်ပြာကတ်မ္ဂး သၞောဝ်ဥပဒေလွဟ်လက်နက်ဖျေံကဵုဒုဟ်ဒဏ် အောန်အိုတ် နူတြဴဂိတု သၠုၚ်အိုတ် ထံၚ်မွဲအာယုက်ကဵုဒှ် ဒဏ်ဂစိုတ်ကဵုဒှ်ဂှ် ကံၚ်ဇြဳပၞာန် ပျးဌာန်လဝ် ပ္ဍဲဂိတုမေ စၟတ်တ္ၚဲ (၁၁)ဏံ ရ။
သၞောဝ်ဥပဒေလွဟ်လက်နက်ဏံဂှ် က္ဍိုပ်သ္ကိုပ်ပၞာန်မေန်အံၚ်လှာၚ် ထ္ပက်စၟတ်တဲ ပျးဌာန်လဝ် အတိုၚ်သၞောဝ်သ္ဇိုၚ်ဒက်ပ္တန် ၝောံပိုဒ် ၄၁၉ တုဲ သၞောဝ်ဥပဒေ ပျးဌာန်လဝ် နူသၞာံ ၁၈၇၈ စဵုကဵု ၁၉၂၄ သီုဖအိုတ်ဂှ် ရုပ်သီလဝ်နကဵုသၞောဝ်ဏံရဂှ် ဓမံက်ထ္ၜးလဝ်ရ။
သၞောဝ်ဥပဒေလွဟ်လက်နက် အခန် (၉) အခန် ၝောံပိုဒ် ၄၄ ပါလုပ်ဒၟံၚ်ဂှ် သွက်ဂွံစဵုဒၞာပရေၚ်ဂီုကၠီုကၟိန်ဍုၚ်၊ ပရေၚ်အုပ်ဓုပ်သၞောဝ် ကေုာံ ဒုဟ်ဒဏ်ပရေၚ်ရပ်လွဟ် ဇီုကပိုက်ဒးဒၟံၚ် ပရေၚ်ဍုၚ်ကွာန်ၜိုဟ်လလံ ကေုာံ ဒုဟ်ဒဟ်က္လိလောန်တအ်ဂှ်ကီု သီုသွက်ဂွံစဵုဒၞာ တၚ်မပ္တံကဵု ပရေၚ်ကၠောန်ပ္တိတ်၊ တြးပ္တိတ်၊ ပၠုပ်နၚ်နူဍုၚ်သ္အာၚ် ဟွံလုပ်သၞောဝ်ဂှ် ရန်လဝ်တုဲ ပျးဌာန်လဝ်ရဂှ် ဟီုသ္ဂးလဝ်ရ။
ပ္ဍဲသၞောဝ်ဂှ်မ္ဂး ညးလဵုမွဲဟွံဟီု နကဵုကကသပ် သွက်ဂွံကလိလောန်ဒုဟ်ဒဏ် သပုန်ကဵုကၟိန်ဍုၚ် ယိုက်ဂၠေၚ်၊ စွံ၊ ရပ်စပ် လွဟ်လက်နက်မမိက်ကဵုမွဲမွဲ ဟွံဂွံကီု နကဵုကသပ် သွက်ကၟိန်ဍုၚ် ဂွံဟုတ်ယုတ်ဆောံဗြီုတုဲ ပလီုပလာ် လွဟ်လက်ကၟိန်ဍုၚ်ဟွံဂွံရောၚ်ဂှ် ဓမံက်ထ္ၜးလဝ်ရ။
ပွမကၠတ်၊ ပွမသွံ၊ ပွမပြံၚ်စၠောံကဵုညးမွဲသ္အာၚ် ကေုာံ ပွမပတိတ်ဇြဟတ် သွက်ဂွံပၠံၚ်ၜးကေတ် လွဟ်လက်နက်ကၟိန်ဍုၚ်ပိုၚ် ဟွံသေၚ်မ္ဂး လွဟ်လက်နက် ညးမၞုံအခေါၚ်ရပ် ဗွဲမလုပ်သၞောဝ်တအ် ကၠောန်သ္ပဟွံဂွံရောၚ်ဂှ် တာဒၞာလဝ်ရ။
သ္အာၚ်နူဂှ်ပၠန် နကဵုလွဟ်လက်နက်မွဲမွဲ က္တဵုဗဒှ်ကဵု ဘဲညးမမိက်ကဵုမွဲမွဲကီု၊ ဘပဠရန်လဝ်တုဲ ပ္ဍဲဌာန်ဆေၚ်စပ်ကဵု ညးဍုၚ်ကွာန်တအ်ဂှ် ကေတ်ဏာရပ်လဝ်ကီု စွံပ္တန်လဝ်ပ္ဍဲတဲတုဲ ထ္ၜးပျးလဝ် ဟွံဂွံရောၚ်ဂှ် ဓမံက်ထ္ၜးလဝ် ပ္ဍဲသၞောဝ်ဂှ်ရ။
ပ္ဍဲဒၞာဲဆေၚ်စပ်ကဵုညးဍုၚ်ကွာန်တအ်ဂှ် စှ်ေစးကဵုသၞောဝ်ဥပဒေတုဲ ပွမရပ်လွဟ်လက်နက်ကီု၊ စွံလဝ်လွဟ်လက်နက်ပ္ဍဲတဲကီု သီုကဵုကေတ်ဏာနၚ်လွဟ်လက်နက်ဂမၠိုၚ် ယဝ်ရဂဗဆဵုဒးမ္ဂး မၞိဟ်ဂှ် ညးလဵုမွဲဟွံဟီု ရပ်တုဲ သီကေတ်လွဟ်လက်နက်မာန်ဒၟံၚ်ရဂှ် ဟီုသ္ဂးလဝ်ရ။
အတိုၚ်သၞောဝ်ဥပဒေလွဟ်လက်နက်ဂှ်မ္ဂး ညးလဵုမွဲဟွံဟီု ရပ်လွဟ်ဟွံလုပ်ကဵုသၞောဝ်တုဲ ဒဒှ်ရဖံက်ပ္ကဝ်လဝ် တၚ်တာဒၞာမမိက်ကဵုမွဲမွဲ ယဝ်ရဒုဟ်ဒဏ်မံက်ပြာကတ်မ္ဂး ဒုဟ်ဒဏ်အောန်အိုတ် နူကဵုတြဴဂိတု သၠုၚ်အိုတ် စဵုကဵုဒဏ်ထံၚ် မွဲအာယုက်ကဵုဒှ်၊ စဵုကဵုဒဏ်ဂစိုတ် ဖျေံမာန်ရောၚ်ဂှ် ပျးဌာန်လဝ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ပျးဌာန် လလောၚ်တြးလဝ် မူအခေါၚ်ရပ်လွဟ် သွက်သၞာဲဒဴကၟိန်ဍုၚ် ကေုာံ ကောန်အရာပ် မၞုံဒၟံၚ်ပၟိက် သွက်ဂွံရပ်လွဟ် သွက်ပရေၚ်ဂီုကၠီုဍာံဇေတ် ပ္ဍဲဂိတု ဂျာန္နဝါရဳ စၟတ်တ္ၚဲ (၃၁) တေံရ။
ကြဴနူဂှ် သွက်ပရေၚ်ရပ်လွဟ်ဟွံလုပ်သၞောဝ် ဂွံအောန်ယအ်စှ်ေ ကေုာံ သွက်ပရေၚ်သုၚ်စောဲလွဟ်လက်နက် ဟွံသေၚ်ကဵုဒၞာဲ ဟွံဂွံက္တဵုဒှ်ကၠုၚ် သွက်ဂွံပ္တိုန်စရၚ်လာၚ်ဇြေန်အခေါၚ်ရပ်လွဟ် အတိုၚ်မူရပ်လွဟ်လက်နက်ဂှ်လေဝ် လလောၚ်တြးလဝ် ပ္ဍဲဂိတုမေ စၟတ်တ္ၚဲ (၈)ဏံရ။
ပရိုၚ်-သြၚ်လောန်တိုၚ်(မ်)
ဗီုရုပ်- ALP
sanlontai