ဝဝ်၊ မေ (၁၃)
ဗ္ဒိုပ်ဗၠာဲသၟိၚ်ညံၚ်ခါယှေ ပွိုၚ်ဍုၚ်ဝဝ်၊ ရးဒေသဇၞော်ဗဂေါ ဒးဒုၚ်ဗ္တိုက်တုဲ အပ္ဍဲပွိုၚ် (၁၅) တ္ၚဲ နူကဵုဒပ်ကံၚ်ဇြဳပၞာန် ရပ်ဒက်စၟဳစၟတ်ဒၟံၚ် ညးဍုၚ်ကွာန်ကောန်အရာပ် (၅၀) ပြၚ်တုဲ ဗွဲမဂၠိုၚ်ဝွံ ဒဵုကဵုအခိၚ်လၟုဟ် ဟွံကလေၚ်ဗလးဏီပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဨပရဴ (၂၇) တေံ ဂကောံဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ညံၚ်ခါယှေရ။
ကြဴနူပရေၚ်ဗ္တိုက်ဏံတုဲ ဒပ်ကံၚ်ဇြဳပၞာန်ဝွံ နူဂိတုဨပရဴ (၂၈) စဵုကဵုဂိတုမေ (၁၁) အပ္ဍဲအကြာဏံဂှ် ရပ်ဒက်ဏာလဝ် သီုကဵုကောန်ၚာ်သၟတ် အာယုက်ဟွံပေၚ်တံပါလုပ်ဂှ် မၞိဟ်ဗြဴ၊ မၞိဟ်တြုံ ၅၀ ပြၚ် နူကဵုကွာန်ကဒေါတ်၊ ကွာန်ကျုံပါ၊ ညံၚ်ခါယှေ၊ ကွာန်ဖိုသဗာတံ မဒှ်ရ။
ညးဒေသမွဲတၠဂှ် ကြဴနူဗ္ဒိုပ်ဗၠာဲသၟိၚ်ညံၚ်ခါယှေ ဒးဒုၚ်ဗ္တိုက်တုဲဂှ် ဒပ်ကံၚ်ဇြဳပၞာန်ဝွံ အရိုဟ်ဒဒှ်တ္ၚဲ ရပ်ဒက်ဒၟံၚ်ကောန်အရာပ်ဂမၠိုၚ်တုဲ တုဲကၠုၚ်မွဲၜါတ္ၚဲဏံဂှ်လေဝ် ထပ်ရပ်ဒက်ဏာလဝ် ကောန်ဗော် NLD (၅) တၠပၠန်ရ။
ပ္ဍဲကဵုညးဒေသ မဒးဒုၚ်ရပ်ဒက်ဂမၠိုၚ်ဂှ် ဥူမျတုၚ် နူကွာန်ကျုံပါဝွံ ဒးချိုတ်အာလဝ် ပ္ဍဲဒၞါဲစၟဳစၟတ်ဂှ်ရောၚ် ပရိုၚ်ဂမၠိုၚ် မံက်တိတ်ဒၟံၚ်ကီုလေဝ် နူကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။
ဒပ်ကံၚ်ဇြဳပၞာန်ဝွံ ညးဒေသရပ်ဒက်လဝ်တံဂှ် ရပ်ထိၚ်လဝ် ပ္ဍဲကဵုဒပ်အမၠံက်ဖယျာကျဳ၊ ဗ္ဒိုပ်ဗၠာဲသၟိၚ်ၝောံဍုၚ်ဝဝ်ဂှ်တုဲ ကၠောန်သ္ပဒၟံၚ် ပရေၚ်စၟဳစၟတ်သၟာန်သၟုက်တံရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ အာတ်မိက်ဒၟံၚ်သြန် ဂၠိုၚ်ကဵုစှော်ကိုဋ် နူကဵုညးဒးရပ်ဒက်လဝ်တံဂှ်တုဲ ကုညးကဵုဟွံမာန်တံဂှ် တပ်စုတ်ၝောံပိုဒ်ပကီုပရာပ်တံရောၚ် ဘပဠဒၟံၚ်တံ နွံဒၟံၚ်ဂှ် ညးဒေသတံ သ္ဂးအိုတ်ရ။
ပ္ဍဲကဵုပရေၚ်ဗ္တိုက် ဗ္ဒိုပ်ဗၠာဲသၟိၚ်ညံၚ်ခါယှေဂှ် ကောန်ဒပ်ဗၠာဲသၟိၚ် နူလ္ပာ်ကံၚ်ဇြဳပၞာန် ၁ တၠ ချိုတ်အာလဝ်တုဲ ဟွံအောန်နူကဵု (၃) တၠ ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai