ပ္ဍဲကွာန်ညံၚ်ပေန်တာ ကောန်အရာပ် (၁၉) တၠဟွံအောန် ဒးဒုၚ်စံၚ်ယတ်ဂစိုတ်ဂယိုၚ် နကဵုဂအုံဗွဝ်

ညံၚ်လေဝ်ပေန်၊ မေ (၁၃)

ပ္ဍဲကွာန်ညံၚ်ပေန်တာ ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် ညးဍုၚ်ကွာန်ကောန်အရာပ် (၁၉) တၠ ဟွံအောန် ဒးဒုၚ်စံၚ်ယတ်ဂစိုတ်ဂယိုၚ်လဝ် နကဵုဂအုံဗွဝ်ရောၚ် ဂွံတီကေတ် နူကဵုဂကောံ Free Burma Rangers ကေုာံ ဂကောံအခေါၚ်အရာမၞိဟ်ကရေၚ် KRHG ရ။

ပ္ဍဲဂိတုမေ (၁၀) တုဲကၠုၚ်တေံ နူကဵုဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် အပ္ဍဲကွာန်ညံၚ်ပေန်တာ မၞုံအပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU ၊ ပွိုၚ်ဍုၚ်ထာန်တပေန်၊ ရးဗဂေါ နကဵုကရောၚ်ပၞာန်ပိတုဲဂှ် စံၚ်ယတ်ပြိုက်ဂစိုတ်လဝ် ညးဍုၚ်ကွာန်ကောန်အရာပ်တံ နကဵုဂအုံဗွဝ်ရ။

ဂကောံ Free Burma Rangers ဂှ် ဒပ်ကံၚ်ဇြဳပၞာန် စံၚ်ယတ်ပြိုက်ဂစိုတ်ဏာလဝ် ညးဍုၚ်ကွာန်ကောန်အရာပ် (၁၇) တၠ သီုကဵုပါလုပ်ကောန်ၚာ်အာယုက် (၁၀) သၞာံ (၇) တၠဂှ် လလောၚ်ပ္တိတ်လဝ် နကဵုစၟတ်တ္ၚဲ တ္ၚဲဏံ ဂိတုမေ (၁၂) ဂှ်ရ။

အတိုၚ်ဂလာန် ဂကောံအခေါၚ်အရာမၞိဟ်ကရေၚ် KHRG ဂှ်မ္ဂး ဒပ်ကံၚ်ဇြဳပၞာန် ဂစိုတ်ဂယိုၚ်ဏာလဝ် ညးဍုၚ်ကွာန်ဒေသ နူကဵုကွာန်ညံၚ်ပေန်တာ (၁၉) တၠ နဂအုံဗွဝ်တုဲ ပ္ဍဲကဵုဒၞါဲဗ္ဒါဲဗ္ဒါဲ ပွဳပွူတၞဟ်သ္အာၚ်တံဂှ်လေဝ် ဒၟါနူအကာဲအရာ ဒးဒုၚ်ဂစိုတ်တံနွံဒၟံၚ်ဂှ်ရ လၟိဟ်မၞိဟ်ချိုတ်အာဂှ် (၁၉) တၠဟွံက ဂၠိုၚ်မာန်ရောၚ် သ္ဂးရ။

“လၟေၚ်ဒဒှ်ပြိုက်ဂစိုတ် နဂအုံဗွဝ်ဂှ် က္တဵုဒှ်လဝ် ကြဴနူပေါဲဗ္တိုက်ဆေၚ်မုက်တံ ဒှ်တုဲဏောၚ်မဒှ်ရ။ ဟီုမ္ဂးတှ်ေ ဒှ်လၟေၚ်ဒဒှ် က္တဵုဒှ်စလေပ် ပ္ဍဲကဵုတွဵုရးကရေၚ်ဏံ မဒှ်ရ။ ကံၚ်ဇြဳပၞာန်ဝွံ အခိၚ်ဒးဒုၚ်ဗ္တိုက်သာ်ဏံကဵုဒှ်၊ အခိၚ်ဒှ်ပေါဲဗ္တိုက်တုဲကဵုဒှ်၊ နဒဒှ်ကလေၚ်ပၠန်ဂှ် ဍဵုဍိုက်ပျဲပျာံ ညးဍုၚ်ကွာန်ဟွံမွဲကဵုဒုဟ်ဒဏ်တံ၊ ရပ်ဒက် ဂစိုတ်ဂယိုၚ်တံဂှ် က္တဵုဒှ်ဒၟံၚ်မွဲဏှမွဲဏှရ။ နနဲသာ်ဏံကီု စံၚ်ကွာန်အလုံကွာန်မွဲတံလေဝ် နွံရ။ ပလီုပလာ်ကၟာတ်လဒဵုတံနွံရ။ ညအ်ဂှ် ဒှ်ဒုဟ်ဒဏ် ကံၚ်ဇြဳပၞာန်တံ ကၠောန်ဒၟံၚ်တွဵုရဏောၚ်။ ညအ်ဂှ် ဒှ်ပရေၚ်ဖံက်ပ္ကဝ်အခေါၚ်အရာမၞိဟ် ဇၞော်ဇၞော်မွဲဏောၚ်။ ဗွဲတၟေၚ် စိုန်ဒှ်အာသဘဴဖံက်ပ္ကဝ်အခေါၚ်ဂယိုၚ်လမျီု၊ အခေါၚ်ဗၠးဘဲဂီုကၠီုတံဂှ်တုဲ သီုကဵုဒှ်အမှုရာဇဝတ်ပၞာန်၊ သီုကဵုကလိလောန် ဓဝ်ဗ္စာရဏာမၞိဟ်တံရ။ လ္ဂောံကဵုပရေၚ်ကလိလောန်တံဏံဂှ်မ္ဂး သွက်ဂွံကေတ်ဒုဟ်မာန်ဂှ် နူကဵုညးမဆေၚ်စပ်တံ ဒးကၠောန်ဏောၚ်” သာ်ဝွံ ညးမၞုံအခေါၚ်ဟီုဂး ဂကောံအခေါၚ်အရာမၞိဟ်ကရေၚ် KHRG သဝ်နန္ဒသူ ဟီုရ။

အတိုၚ်တၚ်လလောၚ်တြး ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ထာန်တပေန် ခရိုၚ်တံၚ်ဥူ ဂိတုမေ (၁၂) တေံဂှ်မ္ဂး ပ္ဍဲဂိတုမေ (၁၀) တုဲကၠုၚ်တေံ နူကဵုဂကောံဒပ်ပံၚ်ကောံ KNU, PDF တံ ၜါလ္ပာ်ကြာပ်ပန်ပှော်ဗ္တိုက်လဝ် ဒပ်ကံၚ်ဇြဳပၞာန် ပ္ဍဲကဵုကွာန်ညံၚ်ပေန်တာ ပယျဵုကွာန်ထာန်တပေန် ကဵု ပွိုၚ်ဍုၚ်ကျံက်ကျဳ ရးဗဂေါဂှ်တုဲ ဒပ်ကံၚ်ဇြဳပၞာန် ကုတ်ကအ်စံၚ်ယတ်ပြိုက်ဂစိုတ်ဏာလဝ် ညးဍုၚ်ကွာန် ၁၈ တၠ သီုကဵုပါလုပ်ကောန်ၚာ် ၅ တၠရောၚ်ဂှ် လလောၚ်ပ္တိတ်လဝ်ရ။

အတိုၚ်ဂလာန် ပရိုၚ်တမ်ရိုဟ်အပ္ဍဲဒေသတံဂှ်မ္ဂး ပ္ဍဲကဵုဗ္ဒါဲလ္ပာ်သၟဝ်ကျာ ကွာန်ညံၚ်ပေန်တာ ပွိုၚ်ဍုၚ်ထာန်တပေန်ဂှ် အကြာဂကောံဒပ် KNU, PDF တံကဵု ဒပ်ကံၚ်ဇြဳပၞာန်တံဂှ် ပ္ဍဲဂိတုမေ (၁၀) တေံ ပေါဲဗ္တိုက်က္တဵုဒှ်လဝ်တုဲ လ္ပာ်ဒပ်ကံၚ်ဇြဳပၞာန် ဟိုတ်နူဇီုကပိုက်ချိုတ်ဂျိုၚ် ဂၠိုၚ်လဝ်ဂှ်ရ စံၚ်ယတ်ဂစိုတ်ဂယိုၚ်ဏာလဝ် ညးဍုၚ်ကွာန်ဒၟံၚ်ပ္ဍဲကွာန်တံဂှ်ရ။

ဂကောံဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ပၞာန် အပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် စွံပွန်လ္တူညးဍုၚ်ကွာန်ကောန်အရာပ်ဂမၠိုၚ်တုဲ ကၠောန်သ္ပဒၟံၚ်ပွဖံက်ပ္ကဝ်အခေါၚ်အရာမၞိဟ်ဂမၠိုၚ် မပ္တံကဵုရပ်ဒက်၊ ဂစိုတ်ဂယိုၚ်၊ ဍဵုဍိုက်ပျဲပျာံ၊ ရပ်စပ်နဒဒှ်ဇွောံစဵုဒၞါပၞာန်တံ ဗွဲမသ္ကာတ်မြဟ်တုဲ ပွမဗ္တိုက်ကဵုတရဴကျာ ကေုာံ လွဟ်ဇၞော်တံဂှ်လေဝ် မွဲဏှမွဲဏှ ကၠောန်သ္ပဒၟံၚ်ရောၚ် ဂွံတီကေတ် ဇရေၚ်ဂကောံအခေါၚ်အရာမၞိဟ်ကရေၚ်ရ။

ပရိုင်-ဩင်လောန်တိုင်(မ်)

ဗီုဓာတ်−ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ထာန်တပေန်