ၜဳကလေၚ်၊ မေ (၁၄)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ဗဒိုပ်ကံၚ်ဇြဳပၞာန် BGF ပံၚ်တောဲ မၞုံပ္ဍဲကွာန်မေဝ်ပလဳဂှ် ပ္ဍဲဂိတုမေ စၟတ်တ္ၚဲ (၁၃) အခိၚ်ဒေါဝ်တ္ၚဲ ၁၂ နာဍဳ အာဗတိုက်လဝ်ကဵုဒရုမ်ရဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဗဒိုပ်ကံၚ်ဇြဳပၞာန် BGF ပံၚ်တောဲ ဇြဟတ်မၞုံ ဗ္ဒာဲ (၃၀) ဖျေံလဝ်ဗ္ဒပ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် ထောံဖျေံလဝ်ဗုမ် နကဵုဒရုမ် ၄ မတုဲ ဗတိုက်လဝ်ရ။
ပ္ဍဲပရေၚ်ပန်ပှ်ောဂှ် ဗုမ်တအ်ဒတုမ်စှ်ေလဝ် ပ္ဍဲဗဒိုပ် ပံၚ်တောဲ ကံၚ်ဇြဳပၞာန် BGF တုဲ ပါ်ခတိုဟ်လဝ်ကီု ပရေၚ်ဇီုကပိုက်ဒးလပါ်ကံၚ်ဇြဳပၞာန် ၜိုန်ရနွံမာန်ကီုလေဝ် ဆက်ဂၠိုက်ဂၠာဲဒၟံၚ် အကာဲအရာဗလးမုက်တိ သောဲသောဲဗြောဲဗြောဲရဂှ် ဟီုသ္ဂးလဝ်ရ။
ဟိုတ်နူဒးဒုၚ်ထောံဖျေံလဝ်ဗုမ် နကဵုဒရုမ်တုဲ ၜိုန်ရလ္ပာ်ကံၚ်ဇြဳပၞာန် ဗက်ပန်ဒၟံၚ် လ္ပာ်ဂၠံၚ်တရဴဒရုမ်ကၠုၚ်ကီုလေဝ် ပရေၚ်ဇီုကပိုက်လီုလာ်လဝ်ဟၟဲ ဆုတ်ကလေၚ်လဝ်မာန်ရဂှ် ဂွံတီကေတ် နူဂကောံဒပ်ပံၚ်ကောံတအ်ရ။
ဂိတုဨဗြဴ စၟတ်တ္ၚဲ (၉) တုဲကၠုၚ်တေံလေဝ် ဗဒိုပ် BGF မေဝ်လာန်ဂှ် ဒပ်ပံၚ်ကောံ KNLA အာစိုပ်ဗတိုက်လဝ်ကဵုဒရုမ်တုဲ သၞာဲဒဴ BGF (၂) တၠ ဒးချိုတ်လဝ်ရဂှ် ဂွံတီကေတ် အတိုၚ်လဟီုညးတာလျိုၚ် KNU ခရိုၚ်သဓီုရ။
ဗော်သွးကောန်ဂကူကရေၚ် KNU ဒပ်မဟာ(၁) ပ္ဍဲပွိုၚ်ဍုၚ်ၜဳကလေၚ်ဂှ်မ္ဂး သ္ကုတ်လကြဴဏံ ၜိုန်ရလ္ပာ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ဟၟဲကီုလေဝ် ဟိုတ်နူပန်ဖျေံဒၟံၚ်လွဟ်ဇၞော် ပ္ဍဲကွာန်ဂမၠိုၚ် ခြာဟွံလအ်ဟွံလအ်တုဲ ညးဒေသ ၇၀၀၀ ပြၚ် ဒးဂြိပ်ပါဲဓလေတ်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – TPDF
sanlontai