ဍာ်ဗု၊ မေ (၁၆)
ကြဴနူဗ္ဒိုပ်ဖျေံသ္ဇိုၚ် မၞုံဗ္ဒါဲဒေသအပိုၚ်အခြာပရေၚ်ပိုန်ဒြပ်ထဝါဲ ဒေသနဗုလာ ပွိုၚ်ဍုၚ်ဍာ်ဗု ရးဒေသဇၞော်တၞၚ်သဳ ဒးဒုၚ်ဗ္တိုက်တုဲဂှ် ကောန်ဒပ်ကံၚ်ဇြဳပၞာန်တံ စ္ဍးတိတ်အာနူကဵုဗ္ဒိုပ်အိုတ်ဂှ် ဂွံတီကေတ် ဇရေၚ်ဂကောံဒပ်စဵုဒၞါဒေသတံရ။
ပ္ဍဲဂိတုမေ (၁၄) တုဲကၠုၚ်တေံ ဂကောံဒပ်ပံၚ်ကောံစဵုဒၞါညးဍုၚ်ကွာန်တံ နကဵုဇြဟတ်လၟိဟ်ဗွဲမဂၠိုၚ်ဂၠေၚ် လုပ်စိုပ်ဗ္တိုက်လဝ် ဗ္ဒိုပ်နဗုလာ ဒၞါဲကောန်ဂကောံပၞာန်ညးဍုၚ်ကွာန် ကေုာံ ဗၠာဲသၟိၚ်၊ ဒပ်ကံၚ်ဇြဳပၞာန် (၂၀) ပြၚ် မဖျေံသ္ဇိုၚ်မံၚ်တန်တဴဒၟံၚ်ဂှ်ရ။
ပ္ဍဲကဵုပေါဲဗ္တိုက်ဏံဂှ် ဂကောံဒပ်ပံၚ်ကောံ PDF တံ ၜိုန်ရဂ္စါန်လဝ် သွက်ဂွံသီဗ္ဒိုပ်ကီုလေဝ် နူကဵုဒပ်ကံၚ်ဇြဳပၞာန် ဟိုတ်နူကၠုၚ်စိုပ်ဂြာတ်လဝ်မခတိုဟ် နကဵုက္ၜၚ်ကျာဂှ်ရ ဒးဆုတ်ကလေၚ်လဝ်ရောၚ်ဂှ် သ္ဂးရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ကံၚ်ဇြဳပၞာန် (၃) တၠဟွံအောန် ဇီုကပိုက်ချိုတ်မာန်တုဲ ဂကောံဒပ်စဵုဒၞါညးဍုၚ်ကွာန်တံဂှ် သီဂိုၚ်ဂွံလဝ် လွဟ်လက်နက်မကမ် ကေုာံ ကပေါတ်ဆက်စပ်လ္ၚဵုတံနွံရ။
ကြဴနူဗ္ဒိုပ်ကံၚ်ဇြဳပၞာန် ဒးဒုၚ်ဗ္တိုက်တုဲ တ္ၚဲယးဂတဂှ် ကောန်ဒပ်ကံၚ်ဇြဳပၞာန်တံ စ္ဍးတိတ်အာ နူဗ္ဒိုပ်တုဲ အာပံၚ်တောဲလဝ်ကဵု ဒပ်ကံၚ်ဇြဳပၞာန် မကၠုၚ်ဗပေၚ်ဇြဟတ်ဂှ်ရောၚ်ဂှ် ဂွံတီကေတ်ရ။
ကြဴနူဂှ်တုဲ ပ္ဍဲဂိတုမေ (၁၅) ဂှ် ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၜိုတ် (၆၀) ပြၚ်ပါဂှ်ဝွံ ထ္ပက်ဒၟံၚ်ကရောၚ်ပၞာန် ဗၞတ် (၅) ကွာန် သီုကဵုပါလုပ်ကွာန်နဗုလာ၊ ကွာန်မူဒူတံဂှ်တုဲ နူကဵုၝဲအကာသတေံဂှ်လေဝ် ကၠောန်သ္ပဒၟံၚ်ပရေၚ်ဗ္တိုက်တရဴကျာတံရောၚ် ဂကောံကောပ်ကာဲဒေသပၞာန်တၞၚ်သဳ လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန် မထ္ပက်ဒၟံၚ်ကရောၚ်ပၞာန် နူကဵုဗလးတိဏံဂှ်ဝွံ ကော်ဏာလဝ် ကောန်ကွာန် (၁၀) တၠဟွံအောန် မၞုံမွဲဒမြိပ် ဒၞါဲမဇက်တိုန်ကရောၚ်ပၞာန်တံ နဒဒှ်ဇွောံစဵုဒၞါပၞာန်ဂှ် ညးဒေသတံ သ္ဂးရ။
မ္ၚးနူဂၠးအကာသတေံဂှ် သီုနူဗလးတိဏံလေဝ် ဒပ်ကံၚ်ဇြဳပၞာန်တံ ထ္ပက်ဒၟံၚ်ကရောၚ်ပၞာန်တံဂှ်ရ ညးဒေသ နဗုလာ ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai