မတ်မလီု၊ မေ (၁၅)
ဟိုတ်နူလဗိုတ်ကျာမေလံၚ် ပ္တဝ်လဝ်ကဵုကၟိန်ဍုၚ်ဗၟာကပိုက်လွိၚ်ကၠုၚ်တုဲ ညးဒးချိုတ်လဝ် စဵုကဵု(၅)တၠ နွံကၠုၚ်ရဂှ် ဌာနဝန်ဇၞော်ဗ္စာရဏာပရေၚ်မၞိဟ် ကေုာံပရေၚ်ဇဳဇန်ဖန်ဖက် အန္တရာယ်ဘဲသဘာဝ အလဵုသဳပရေၚ်ညဳသၟဟ်ကောန်ဂကူ လလောၚ်တြးလဝ် ပရိုၚ်ရ။
ညးဒးချိုတ်လဝ်တအ်ဂှ် ဒှ်နူတွဵုရးရခေၚ်၊ တွဵုရးသေံဇၞော် ၊ ရးဒေသအၚ်ဝ ကေုာံရးဨရာဝတဳတအ်တုဲ ပရေၚ်ဇီုကပိုက်လီုလာ်လေဝ် နွံဒၟံၚ်ရဂှ် ဟီုသ္ဂးလဝ်ရ။
လဗိုတ်ကျာဇြိုၚ်ကလုမ်မိုဝ်ခါ ဇြဟတ်ဇၞော်ဒၟံၚ်ဂှ် တ္ၚဲဏံ ဂိတုမေ စၟတ်တ္ၚဲ (၁၄)အခိၚ်နူဂယး သ္ပတမ်နူ (၁၁)နာဍဳကဝက်တုဲ နကဵုဗ္ၜတ်ကျာလပိုက် မွဲနာဍဳ (၁၃၀)မိုၚ် စလုပ်စိုပ်ကၠုၚ် ပ္ဍဲဗ္ဒာဲဍုၚ်သေတ်တွေ ဒေသရေၚ်က္ၜဳရခေၚ်ရ။
ပ္ဍဲဍုၚ်သေတ်တွေဂှ် ဟိုတ်နူဗ္ၜတ်ကျာကပိုက် သ္ကာတ်မြဟ်လောန်ဂှ်ရ တိုၚ်တာဝါပရေၚ်ဆက်စၠောံ MPT ကဝ်စှ်ေလီုလာ်အာလဝ်ကီု တၞံဆုအာယုက်ဇမၠိၚ်တအ်လေဝ် ဒေါံကၟိုၚ်၊ ကၟဳသ္ၚိထိုက်ကယျာလီုလာ်အာရဂှ် ဟီုသ္ဂးလဝ်တုဲ ပ္ဍဲပွိုၚ်ဍုၚ်ဂွမ္ဂး လၟိဟ်သ္ၚိ ဗ္ဒာဲ(၅၀) ဒးလီုလာ်အာလဝ်ရဂှ် ဓမံက်ထ္ၜးလဝ် အခိၚ်ပြဟ်ဟ်လၟုဟ်ဏံရ။
လဗိုတ်ကျာလုပ်တုဲ ပ္ဍဲပွိုၚ်(၂၄)ဂှ် ပ္ဍဲပွိုၚ်ဍုၚ်ရခေၚ် လပှ်ဒဳလဗိုတ်ကျာ လုပ်စိုပ်ကၠုၚ်မာန်ဒၟံၚ်ကီု ဟိုတ်နူဗြဲဂူစှ်ေကၠုၚ်တုဲ ပ္ဍဲပွိုၚ်ဍုၚ်ချေၚ် တိလာ်ခရိုဟ်ကီု၊ ပ္ဍဲရးဒေသဗဂေါ၊ ရးဒေသလဂုၚ် ကေုာံရးဒေသဨရာဝတဳတအ်ဂှ် ဇုက်လလဳပံက် ကေုာံဂဂဵုတးပန် က္တဵုဒှ်မာန်ရောၚ်ဂှ် ဓမံက်ထ္ၜးလဝ် ပ္ဍဲတၚ်လလောၚ်တြး NUG ရ။
ပရိုၚ်-သြၚ်လောန်တိုၚ်(မ်)
ဗီုရုပ် – MOH
sanlontai