မျောက်ဥူ၊ မေ (၁၅)
ပ္ဍဲပွိုၚ်ဍုၚ်မျောက်ဥူ မဒှ်တိဍာ်တြေံတြဟ်တွဵုရးရခေၚ် လဗိုတ်ကျာမေလံၚ်မိုဝ်ခါလုပ်လဝ်ဂှ်လေဝ် သ္ၚိဒၟံၚ်မၞိဟ်ဂမၠိုၚ်ဗွဲမဂၠိုၚ် လီုလာ်အာလဝ်ရဂှ် ဂွံတီကေတ်နူညးဒေသတအ်ရ။
“တ္ၚဲဏံ အခိၚ် ၜိုတ်(၄)နာဍဳဇိုၚ်သဝ်တ္ၚဲ ဂွံမိၚ်လဝ်ဂှ်တှ်ေ သ္ၚိၜိုတ်ကၠံ ဒးခရိုဟ်အာဂှ် မိၚ်လဝ်ရ။ ဂုဏ်နူကျာတုဲ သ္ၚိဆုဒးလဝ်တပ်ပ်ကဵု သ္ၚိဍောတ်တ်တအ်ဂှ်တှ်ေ လီုလာ်အာ သက်ဂွံဟၟဲရ။ တိုက်ကဵု သ္ၚိဒုၚ်လဝ်တိုက်လ္ၚဵုဂှ်တှ်ေ သာညိဏောၚ် ဒးဟီုရ။ အကာဲအရာကျာ်တြေံတြဟ်တအ်ဂှ်တှ်ေ ဟွံတီဏီ။ ဆ္ဂး သ္ကာတ်မံၚ်ဂလိုၚ်ဏံတှ်ေ ပရေၚ်ဇီုကပိုက်အောန်ကဵုဂၠိုၚ်နွံဏောၚ်”ဂှ် ညးဒေသမွဲတၠ ဟီုသ္ဂးလဝ်ရ။
ပ္ဍဲတွဵုရးရခေၚ် ဗ္ဒာဲဍုၚ်သေတ်တွေဂှ် သွက်ဂွံဒစးဒုၚ်စဵုဒၞာအန္တရာယ်လဗိုတ်ကျာမိုဝ်ခါ လုပ်စိုပ် ပ္ဍဲဂိတုမေ စၟတ်တ္ၚဲ (၁၄)ဂှ် ညးဒေသနူပွိုၚ်ဍုၚ်မပ္တံသေတ်တွေ၊ ပေါက်တဝ်၊ ဂၠိုၚ်ကဵုလက်တအ်ဂှ် ကၠုၚ်ပါဲဓလေတ်မံၚ်ဒၟံၚ် ပ္ဍဲဍုၚ်မျောက်ဥူရဂှ် ဂွံတီကေတ် နူညးကဵုဒၟံၚ်ရီုဗၚ်တအ်ရ။
ပ္ဍဲဘာလကျာ် ပံက်စွံလဝ်ဗဒိုပ်ရီုဗၚ်ဟံၚ်ပြာ် ပ္ဍဲဍုၚ်မျောက်ဥူဂှ် ညးကၠုၚ်ဇူဗ္ဒာဲနွံဒၟံၚ် တြဴလ္ၚီပြၚ်တုဲ ညးဇူဒီုဒၟံၚ် ပ္ဍဲကဵုဟဝ်တေဝ် ဗ္ဒမ်ဇူဒီု ကေုာံဇရေၚ်မသကလောကောဒေံညးတအ် ၜိုတ်ပန်လ္ၚီနွံရောၚ် ဂွံတီကေတ် အတိုၚ်စရၚ် ဂကောံရီုဗၚ်ဟံၚ်ပြာ် ဘဲလဗိုတ်ကျာမေလံၚ်ကာတၟေၚ်ရ။
ဟိုတ်နူလဗိုတ်ကျာမေလံၚ်ဇြိုၚ်ကလုမ်မိုဝ်ခါ ပ္တဝ်က္ဍိုပ်ကဵုကၟိန်ဍုၚ်ဗၟာတုဲ လပိုက်ကၠုၚ်ဂှ်ရ ညးဒးချိုတ်လဝ် စဵုကဵု(၅)တၠနွံကၠုၚ်ရဂှ် ဌာနဝန်ဇၞော်ဗ္စာရဏာပရေၚ်မၞိဟ် ကေုာံပရေၚ်ဇဳဇန်ဖန်ဖက်အန္တရာယ်ဘဲသဘာဝ အလဵုသဳပရေၚ်ညဳသၟဟ်ကောန်ဂကူ လလောၚ်တြးလဝ် ပရိုၚ်ရ။
ညးဒးချိုတ်လဝ်တအ်ဂှ် ဒှ်နူတွဵုရးရခေၚ်၊ တွဵုရးသေံဇၞော် ၊ ရးဒေသအၚ်ဝ ကေုာံရးဨရာဝတဳတအ်တုဲ ပရေၚ်ဇီုကပိုက်လီုလာ်လေဝ် နွံဒၟံၚ်ရဂှ် ဟီုသ္ဂးလဝ်ရ။
လဗိုတ်ကျာမေလံၚ်ဇြိုၚ်ကလုမ်မိုဝ်ခါ ဇြဟတ်ဇၞော်ဒၟံၚ်ဂှ် တ္ၚဲဏံ ဂိတုမေ စၟတ်တ္ၚဲ (၁၄)အခိၚ်နူဂယး သ္ပတမ်နူ (၁၁)နာဍဳကဝက်တုဲ နကဵုဗ္ၜတ်ကျာလပိုက် မွဲနာဍဳ (၁၃၀)မိုၚ် စလုပ်စိုပ်ကၠုၚ် ပ္ဍဲဗ္ဒာဲဍုၚ်သေတ်တွေ ဒေသရေၚ်က္ၜဳရခေၚ်ရ။
ဒပ်ပၞာန်ရခေၚ်(AA)လေဝ် လဗိုတ်ကျာဇြိုၚ်ကလုမ်မိုဝ်ခါ ဇြဟတ်ဇၞော် က္တဵုဒှ်ဒၟံၚ်လၟုဟ်ဏံဂှ် ညံၚ်သတိဟွံဂွံတိတ်ဗၠးကီု နကဵုဂကောံကၟိန်ဍုၚ်နာနာကဵု ဂကောံပ္ဍဲဍုၚ်ဂမၠိုၚ် ညံၚ်ပရေၚ်ထံက်ပၚ်ဇွောံမဂဥုဲဇဗ ဂွံစိုပ်ဇရေၚ် ညးဍုၚ်ကွာန် ဒးဒုၚ်ဘဲဒဏ်လဗိုတ်ကျာတအ် ဗွဲမဂတာပ်အခိၚ်ဂှ် ဆက်စၠောံကဵု HDCO/ULA တုဲ သွက်ဂွံပံၚ်တောဲရေၚ်တၠုၚ်ဂှ် ဗတိုက်ဖ္အောဝ်လဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ
sanlontai