နေပျဳဒဝ်၊ မေ(၁၆)
ပွိုၚ်ဍုၚ် ပ္ဍဲတွဵုရးရခေၚ် ဒးဒုၚ်လဝ်ဘဲဒဏ်လဗိုတ်ကျာမေလံၚ် (၁၇)ပွိုၚ်ဍုၚ်တအ်ဂှ် ကံၚ်ဇြဳပၞာန်လလောၚ်တြးလဝ် နဒဒှ်ဒေသစိုပ်ဒၟံၚ်ဘဲအန္တရာယ်သဘာဝရ။
ပ္ဍဲဂိတုမေ စၟတ်တ္ၚဲ (၁၄)တုဲကၠုၚ်တေံဂှ် ဟိုတ်နူလဗိုတ်ကျာမေလံၚ်ဇြိုၚ်ကလုမ်မိုဝ်ခါ တတ်ကၠောံကပါ်လွိၚ်ဏာလဝ် မွဲဒမြိပ်ဒေသပြၚ်က္ၜဳရခေၚ်တုဲ ပွိုၚ်ဍုၚ် ပ္ဍဲတွဵုရးရခေၚ်ဗွဲမဂၠိုၚ် ဇီုကပိုက်ဒးလီုလာ်လဝ်ရ။
အခိၚ်လၟုဟ်ဏံမ္ဂး လဗိုတ်ကျာမေလံၚ်မိုဝ်ခါဂှ် ဟိုတ်နူလုပ်စိုပ်တတ်ကၠောံကၟိန်ဍုၚ်ဗၟာတုဲဂှ်ရ ပိုၚ်ခြာစၟတ်သမ္တီလဝ် နဒဒှ်ကဆံၚ်အရံၚ်သာ်တ္ၚေက်ရဂှ် ဌာန်စမ်ၜတ်အကာဲအရာဗြဲကျာကံၚ်ဇြဳပၞာန် လလောၚ်တြးလဝ်ပရိုၚ်ရ။
လဗိုတ်ကျာမေလံၚ်မိုဝ်ခါဂှ် ၜိုန်ရတတ်ကၠောံကၟိန်ဍုၚ်ဗၟာတုဲကီုလေဝ် ဟိုတ်နူမတ်ဗြဲသှ်ေဒၟံၚ်နူလဗိုတ်ကျာမေလံၚ်တုဲ ပ္ဍဲရးသေတ်ဂါၚ်၊ ရးအၚ်ဝ၊ တွဵုရးကချေၚ် ကေုာံတွဵုရးသေံတအ်ဂှ် ဗ္ၜတ်ကျာလပိုက်သၠုၚ်အိုတ် မွဲနာဍဳမ္ဂး (၃၀) မိုၚ်ကပိုက်မာန်ရောၚ်ဂှ် ကဵုလဝ်သမ္တီရ။
ဍုၚ်အာစိုပ်ဒၟံၚ်အန္တရာယ်သဘာဝ ကံၚ်ဇြဳပၞာန်ဂှ် ဒှ်ပွိုၚ်ဍုၚ်ကျောက်ဖျူ၊ ရမ်ဗြဲ၊ အာမ်၊ သေတ်တွေ၊ ပေါက်တဝ်၊ ပုဏ္ဏာကျောန်၊ ယျတေံတံၚ်၊ ဂွ၊ တောၚ်ကုတ်၊ တာန်တွဲ၊ မောၚ်တဝ်၊ ဗူတဳတံၚ်၊ မေန်ပျာ၊ မျောက်ဥူ ကေုာံပွိုၚ်ဍုၚ်မျေပုမ်တအ်ရ။
ဟိုတ်နူလဗိုတ်ကျာမေလံၚ်မိုဝ်ခါတုဲ ဍုၚ်သေတ်တွေ ဇီုကပိုက်ဒးလီုလာ်လဝ်ဗ္ဒာဲ (၉၀)တၟံကၠံကီု ပရေၚ်မၞိဟ်ချိုတ်ကၠေံလ္ၚဵုၜိုန်နွံကီုလေဝ် လၟိဟ်ချိုတ်တ်ပၠိုတ်တ်ဂှ် ဟွံဂွံတီကေတ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – ရုၚ်ဂအုပ်ကာစဵုဒၞာ
sanlontai