ရေဝ်၊ မေ (၁၇)
ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ကွာန်တၟံကၞေၚ် ကွာန်တၟိ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ ဂွိၚ်ဖေက် တမ်ဒပ်ဍေံတံ ဒးဒုၚ်ဗ္တိုက်တုဲ ဂၠံၚ်လုပ်ဒပ်ဍေံတံ မဒှ်ဂၠံၚ်ညးဍုၚ်ကွာန်ဂမၠိုၚ် ရပ်စပ်အာကၠုၚ်ဒၟံၚ်ဂှ် ဗဒေါမ်ဖျေံတၞံဆုတုဲ ကၟာတ်လဝ်ဂၠံၚ်ဂှ်ရ ပရေၚ်အာကၠုၚ်တံ ဒးဂဗဒၟံၚ်အခက်ရောၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်အမၠံက်ကံၚ်ဇြဳပၞာန် လၟိဟ် (၃၁၇) ဂှ်ဝွံ စနူဂိတုမေ (၁၃) တုဲကၠုၚ်တေံတုဲ ၜိုတ် ၂ (ဖာလုံ) ကၠာဂွိုအ် စိုပ်တမ်ဒပ်ဂှ် ဗဒေါမ်ဖျေံလဝ်တၞံဆုဇၞော်ဇၞော်တုဲ ကၟာတ်လဝ်ဂၠံၚ်ရ။
နူကဵုဒပ်အမၠံက်ကံၚ်ဇြဳပၞာန် ဟိုတ်နူကၟာတ်လဝ်ဂၠံၚ်တံဂှ်ရ နကဵုညးဒေသတံ ကေုာံ ကောန်ကလောန် ကၠအ်ထၜိုတ်ဂမၠိုၚ်ဝွံ ဒှ်ဒၟံၚ်အခက်အခုဲ ပရေၚ်အာကၠုၚ်တံတုဲ သွက်ဂွံအာကၠုၚ် အပ္ဍဲဝၚ်ကမၠောန်တံဂှ်မ္ဂး ဒးသုၚ်စောဲဒၟံၚ် ဂၠံၚ်ကွာန် အောန်အိုတ် ၜိုတ်မွဲမိုၚ်မၞုံတံဂှ်ရောၚ် သ္ဂးရ။
ဒပ်အမၠံက်ဏံဂှ် ကြဴနူဒပ်ပၞာန်သီအဝဵုတုဲ ဂကောံဒပ်စဵုဒၞါညးဍုၚ်ကွာန်ဒေသတံ အောန်အိုတ် (၅) ဝါဟွံက ကၠုၚ်စိုပ်ဗ္တိုက်လဝ်တုဲ ကောန်ဂကောံဒပ်ကံၚ်ဇြဳပၞာန်တံလေဝ် ဇီုကပိုက်ချိုတ်ဂျိုၚ်တံ နွံဒၟံၚ်ရ။
ပ္ဍဲဂိတုမေ (၁၅) ဂှ်လေဝ် ဂကောံဒပ်စဵုဒၞါညးဍုၚ်ကွာန်ဒေသတံ ကၠုၚ်စိုပ်ဗ္တိုက်လဝ် ဒပ်အမၠံက် ကံၚ်ဇြဳပၞာန် နကဵုလွဟ်ဇၞော်ဂှ် ဂွံတီကေတ်ရ။
ပ္ဍဲကဵုပရေၚ်ဗ္တိုက်ဏံဂှ် ဗရုရမျာၚ်မကမ်လွဟ်ဇၞော် ဗတုံဗ္တိုဟ်ထ္ကး အပ္ဍဲဒပ်ကံၚ်ဇြဳပၞာန်တံဂှ် ဂွံမိၚ်ကေတ်တုဲ အကာဲအရာမၞိဟ်ဇီုကပိုက်ကလိဂွံဝပ်ဂှ် ဟွံဂွံတီကေတ်ဏီရောၚ် သ္ဂးရ။
တုဲကၠုၚ် ပ္ဍဲဂိတုဂျာန္နဝါရဳ (၂၀) တေံဂှ်လေဝ် ကောန်ဒပ်ကံၚ်ဇြဳပၞာန် ဒပ်အမၠံက် လၟိဟ် (၃၁၇) ပလံၚ်ကွးဘာတုဲ မကလေၚ်စဴကၠုၚ်တံ ဟိုတ်နူဒးဒုၚ်ဗ္တိုက်လဝ်ဂှ်ရ (၅) တၠ ချိုတ်အာလဝ်တုဲ သေနာတ် (၃) ဇကိုအ်ဂှ် ဂကောံ PDF ဒေသတံ သီဂိုၚ်ဂွံလဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai