ထဳလေန် – မေ(၁၇)
ကြဴနူလဗိုတ်ကျာမေလံၚ်လပိုက်တုဲ ပြေၚ်ဂၠဴ ကေုာံ ဗ္ၜေံ ပ္ဍဲကွာန်မၞုံ ပ္ဍဲခရိုၚ်ပခုက္ကူ ပွိုၚ်ဍုၚ်ထဳလေန် ပ္ဍဲရးဒေမဂွေ ဒးချိုတ်ဒၟံၚ်ဗွဝ်ကဵုဗွဝ် က္တဵုဒှ်ဒၟံၚ်ရဂှ် ညးဒေသတအ် ဟီုသ္ဂးလဝ်ရ။
လဗိုတ်ကျာမေလံၚ်ဇြိုၚ်ကလုမ်မိုဝ်ခါ တုဲကၠုၚ် ပ္ဍဲဂိတုမေ စၟတ်တ္ၚဲ (၁၄)တေံဂှ် ဟိုတ်နူလပိုက်လဝိၚ်ဏာ မွဲဒမြိပ်ဒေသရေၚ်ၜဳရခေၚ်တုဲ သ္အာၚ်နူပွိုၚ်ဍုၚ် ပ္ဍဲတွဵုရးရခေၚ်ဗွဲမဂၠိုၚ်တုဲ ပ္ဍဲရးသေတ်ဂါၚ် ကေုာံရးမဂွေလေဝ် ပရေၚ်ဇီုကပိုက်လီုလာ်လဝ် နွံကၠုၚ်ရ။
ပရေၚ်ဒဒှ်ဏံဂှ် ပ္ဍဲပွိုၚ်ဍုၚ်ထဳလေန် ကွာန်မပ္တံကဵုအိုၚ်မ၊ ယှိုဲဂုမ်တိုၚ်၊ ဇြဳတဝ်၊ ကြာဥယေန်၊ ဝေတ်တေတ်၊ အုမ်ထောတ်တအ်ဂှ် က္တဵုဒှ်ဒၟံၚ်ရဂှ် ဂွံတီကေတ်ရ။
“လဗိုတ်ကျာတုဲ တ္ၚဲဏံဂှ် ပြေၚ်ဂၠဴချိုတ်ဒၟံၚ်၊ တ္ၚဲဏံတှ်ေ ဟွံချိုတ်ပုဟ်။ ပရေံနူကဵုယဲနှေပ် ယဲလတာ်ဏီရ။ လၟုဟ်ဂှ် ညးဒေသတအ်ကော်ဒၟံၚ် ယဲဇိုၚ်တဲအုဲရ။ ကုတ်ထောံတုဲ စသုၚ်ဒၟံၚ်လေဝ် မိၚ်ဒၟံၚ်ရ။ ဂွိၚ်ဖေက်ကၠောံထၞာန်တုဲ ဟွံမိက်ကဵုစသုၚ်ပုဟ်” ဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲခရိုၚ်ပခုက္ကူ မွဲဗွိုၚ်ပွိုၚ်ဍုၚ်ပေါက်ဂှ် ပြေၚ်ဂၠဴဗ္ၜေံတအ် ဒးချိုတ်ဒၟံၚ်တုဲ ပ္ဍဲပွိုၚ်ဍုၚ်သလေန်လေဝ် ပြေၚ်ဂၠဴဟဳဍာ်တုဲချိုတ် ဂံက်တုဲချိုတ်လဝ် နွံဒၟံၚ် ၜိုတ်(၅၀)ရ။
ဟိုတ်နူလဗိုတ်ကျာမေလံၚ် လုပ်စိုပ်လဝ် ခရိုၚ်ဂဂဝ်တုဲ ဍာ်လုပ်လဝ် ပ္ဍဲမွဲဒမြိပ်ကွာန်မဝ်ချောၚ်တုဲ ကၠအ်ပ္ကဴသၟိၚ်တ္ၚဲ ကေုာံၜဲ သတ်ဒကောၚ်တဵုလွဳ ရာသဳက္ညၚ်တအ် ဒးလီုလာ်လဝ်ရဂှ် ဂွံတီကေတ်ရ။
“ဒၞာဲဗွဲမဂၠိုၚ်တှ်ေ မွဲကွာန်ကဵုမွဲကွာန် အာကၠုၚ်ဟွံဂွံပုဟ်။ တိလာ်တုဲ ဂၠံၚ်လီုလဝ် နွံဒၟံၚ်။ ဂၠံၚ်လောၚ်ဗိုလ်လေဝ်ကဵု ညံၚ်ကာန်ဂှ်တှ်ေ တိလာ်လဝ်တုဲ အာကၠုၚ်ဟွံဂွံ။ ဒှ်ဒၟံၚ်အကာဲအရာဝါတ်ဂါတ်ခက် ဒၟံၚ်ဗွဲမလောန်ရ”ဂှ် ညးဒေသမွဲတၠ ဟီုသ္ဂးလဝ်ရ။
ပ္ဍဲရးထဳလေန်ဒေသယျဝ်ဂှ် ဟိုတ်နူလဗိုတ်ကျာမေလံၚ်မိုဝ်ခါ ဍာ်ကြုၚ်ဟးစှ်ေတုဲ ဒဒန် ဟွံအောန်နူ(၃)တၞုၚ် ဒးလီုလာ်လဝ်တုဲ ဗွိုက်လတက် ညးဍုၚ်ကွာန်ပါဲဘဲပၞာန် ကေုာံဇွောံမစၞစ၊ မသၟာဗ္ၚတအ် ဒးလီုလာ်လဝ်ရဂှ် ဂွံတီကေတ်ရ။
စဵုကဵုလၟုဟ်ဏံ ဟိုတ်နူပြေၚ်ဂၠဴဂံက်လောန်တုဲ ဒးချိုတ်လဝ်ကီု ယဲဇိုၚ်တဲအုဲတုဲ ဒးချိုတ်လဝ်ဂှ် လၟိဟ် (၂၀၀) ပြၚ်နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai