မတ်မလီု – မေ(၁၇)
ဒုၚ်သ္ဇိုၚ်ကဵု The Flowers of Hiroshima ဝတ္ထု Edita Morris ဒယှ်တှ်ပြာကတ်အိုတ် ဓမံက်ထ္ၜးကဵု ဒဒိုက်ဒးဒုၚ်လဝ် ဟိုတ်နူဗုမ်အနုလက်ကၠိုက်တုဲ လာဘ်ပရေၚ်ၜိုဟ်လလံ ကေုာံ ပရေၚ်ယေန်သၞာၚ် ဟဳရိုဝ်ယှဳမာဂှ် ဌာန်ပရိုၚ်ဗၟာ ကၟိန်ဍုၚ်နာနာ BNI က္လိဂွံလဝ်ရဂှ် ဂွံတီကေတ်ရ။
BNI ဂှ် ပရိုၚ် ပ္ဍဲဂကောံကောန်ဂကူကောန်ဍုၚ်အရၚ် မၞုံပ္ဍဲဍုၚ်/မ္ၚးဍုၚ်တအ်ဂှ် ပါ်တြးဒၟံၚ်သီု သတ္တိဂံၚ်သ္ကာတုဲ စပ်ကဵုပရေၚ်ဓဇန်ကြာန်ယုတ်မာ ကေုာံဒုဟ်ရာဇဝတ်ဂှ် သွက်ပရိသာတ်ကၟိန်ဍုၚ်နာနာ ဒက်ပ္တန်လဝ် နကဵုဌာန်ပရိုၚ် (၁၅)ဌာန ကလေၚ်ကၠာဲကဵုဒၟံၚ် ဘာသာအေၚ်္ဂလိက်ရ။
ကြဴနူဒပ်ပၞာန်သီအဝဵုလၟုဟ်ဏံတုဲ BNI ဂှ် တြးပ္တိတ်ဒၟံၚ်ပရိုၚ် သွက်အခေါၚ်အရာမၞိဟ် ကေုာံဒဳမဝ်ကရေဇြဳအဆက်ဟွံပိုတ်သ္ကုတ်ရ။
“အခိၚ်ပရေၚ်ဍုၚ်ကွာန်၊ ပဋိပက္ခပၞာန် ပ္ဍဲကၟိန်ဍုၚ်ဇကု ဟုတ်ယုတ်စှ်ေဒၟံၚ် ဗီုလၟုဟ်ဏံ ကမၠောန်ပရိုၚ် အကြာတၚ်ဝါတ်ဂါတ်ခက်ခုဲ တၚ်ကော်ချဴ သီုအန္တရာယ် သွက်ကောန်ဂကောံသၟာပရိုၚ် BNI တြးပ္တိတ်ဒၟံၚ်တအ်ဂှ် ကေတ်ဒၟံၚ်ဂုဏ်စရာဲရ။ ဗီုဂှ်ကီုရ တမ်ရိုဟ်တၚ်ဂၞၚ်ပရိုၚ်သၠာဲဂတး ပလံၚ်ဗစိုပ်ကဵုတၚ်ဂၞၚ်၊ ဗီုရုပ်ခိုၚ်ကၠိုက်ဂှ် သီုကဵုဒှ်သွဟ် ပရေၚ်ပ္တိတ်ဇြဟတ် သၟာပရိုၚ်ကၟိန်ဍုၚ်နာနာရဂှ်လေဝ် မိက်ဂွံဟီုရ” ဂှ် ညးမၞုံအခေါၚ်ဟီုဂး BNI ဂအုပ်အေဝ်ဒဳတာ KIC နာန်ဖအ်ဂေ ဟီုကဵု
ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် ပ္ဍဲအခိၚ်ဒက်ပ္တန်လဝ် BNI ပွိုၚ် (၂၀)သၞာံဂှ် စပ်ကဵုက္လိဂွံလဝ်လာဘ် သ္ပစၟတ်သမ္တီ ဗီုလၟုဟ်ဏံတုဲ ဒှ်ပဳတိပြေဒၟံၚ်စိုတ်ကီု ပ္ဍဲလ္တူတၚ်ဒုၚ်ဂိုၚ်၊ တၚ်ပတှ်ေ ဂကောံမဳဒဳယာလုပ်ဂကောံတအ် ပ္ဍဲလ္တူကမၠောန်မဳဒဳယာဂှ် ဒှ်ညံၚ်ရဴဗပေၚ်ကဵုလဝ် ဇြဟတ်ကီုရဂှ် ညးဟီုသ္ဂးလဝ်ရ။
လာဘ် Ira Morris Hiroshima Foundation for Peace and Culture ဂှ် ပ္ဍဲသၞာံ ၁၉၀၃-၁၉၇၂ အတိုၚ်တၚ်အာတ်မိက် အ္စာချူလိက်သွဳဒေန် Edita Morris ထပ်လဝ်တဲကဵု အ္စာချူလိက်အမေရိကာန် Ira Morris တုဲ ဖန်ဗဒှ်ကၠုၚ်လဝ်လာဘ်ဏံရ။
လာဘ်ဏံဂှ် အပ်ပြာပ်ကဵုဒၟံၚ် ကုညးဗြဴ ကေုာံညးတြုံ ပါလုပ်ဒၟံၚ် ပ္ဍဲပရေၚ်ဆဵုဂဗသဳကၠဳ၊ ပရေၚ်ဓမံက်ရုပ်ရဴ ပရေၚ်ၜိုဟ်လလံရ ပ္ဍဲဒေသဒှ်ဒၟံၚ်ပဋိပက္ခရဂှ် ဂွံတီကေတ်ရ။
သွက်သၞာံ ၂၀၂၃ BNI က္လိဂွံလဝ်ဂှ် ပ္အပ်ပြာပ်ကဵုအာ သြန်ဒဝ်ဠာအမေရိကာန် (၅၀၀၀၀) တုဲ ပေါဲကဵုလာဘ်ဂှ် ကၠောန်ဗဒှ်အာ ပ္ဍဲဍုၚ်သွဳဒေန် ပ္ဍဲဍုၚ်တအ်ဟုမ် ဂိတုသေပ်တေမ်ဗာ ကၠုၚ်စိုပ်ဂတဏံရောၚ်ဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – BNI
sanlontai