ဗွိုၚ်ပေါဲဗ္တိုက် သၠဲလးကၠုၚ် စဵုကဵုဍုၚ်ဒပ်ပၞာန် ဍုၚ်ဗဝ်လခေဝ်

ဗဝ်လခေဝ်၊ မေ (၁၇)

ပ္ဍဲတွဵုရးကရေၚ်ဍာဲ ဒၞါဲဌာန်ပရေၚ်ရပ်လွဟ်တဝ်စၞေဟ် ဇြဟတ်ခိုဟ်ဒၟံၚ်ဂှ် အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဏံ စဵုကဵုလ္တူဍုၚ်ဗဝ်လခေဝ် ဒၞါဲစက်ယန္တယာပရေၚ်အုပ်ဓုပ်ဒပ်ပၞာန် မဆက်ဂေတ်ဒၟံၚ်ဂှ် ဗွိုၚ်ပေါဲဗ္တိုက်တံ သၠဲလးကၠုၚ်ရောၚ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲတွဵုရးကရေၚ်ဍာဲ (၇) ပွိုၚ်ဍုၚ်မၞုံဂှ် အပ္ဍဲကာလဒပ်ပၞာန်သီအဝဵုဏံ ပ္ဍဲကဵုပွိုၚ်ဍုၚ်ဒဳမအ်သဵု၊ မေဝ်သေအ်၊ ယှာတဝ် ကေုာံ ဖရူသဵုတံဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးကရေၚ်ဍာဲတံ ပေါဲဗ္တိုက်သ္ကာတ်မြဟ်ဒၟံၚ်တုဲ ဗလးတိဗွဲမဂၠိုၚ်ဂှ် လ္ပာ်ကံၚ်ဇြဳပၞာန် ဒးဗလးလဝ်တဲရ။

လ္တူဍုၚ်လွိုၚ်ကဝ် ကေုာံ ဗဝ်လခေဝ်တံဝွံ ၜိုန်ရဒှ်ဒေသ စက်ယန္တယာပရေၚ်အုပ်ဓုပ်ပၞာန် ဇြဟတ်ခိုဟ်တံကီုလေဝ် သ္ပပ္တံနူဂိတုမေ လ္ပာ်မံက်ဏံတုဲ ဗွိုၚ်ပေါဲဗ္တိုက်တံ သၠဲလးကၠုၚ် စဵုကဵုလ္တူဍုၚ်ဗဝ်လခေဝ်ရ။

ပ္ဍဲဂိတုမေ (၁) တုဲကၠုၚ်တေံ ဂကောံဒပ်ပံၚ်ကောံ ကေုာံ ဒပ်စဵုဒၞါညးဍုၚ်ကွာန်ဗဝ်လခေဝ်တံ လုပ်စိုပ်ဗ္တိုက်လဝ် ဒၞါဲဒပ်ကံၚ်ဇြဳပၞာန်တံ မဖျေံလဝ်ဒပ် လ္တူဍုၚ်ဗဝ်လခေဝ် မပ္တံကဵု ရုၚ်ကောန်သ္ဂံၚ်တြေံတြေံ၊ ရုၚ်လဝက၊ ဗ္ဒိုပ်ဗၠာဲသၟိၚ် ကေုာံ ဌာနဗလးရုပ်ရမျာၚ်တံ ဒှ်တမ်ရ။

ဟိုတ်နူပရေၚ်ဗ္တိုက်ဂှ်တုဲ ကောန်ဒပ်ကံၚ်ဇြဳပၞာန် (၇) တၠ ချိုတ်အာလဝ်တုဲ (၂၀) တၠ ကလိဂွံလဝ်ဝပ်တုဲ လွဟ်လက်နက်မကမ် ကံၚ်ဇြဳပၞာန်တံဂှ်လေဝ် သီဂိုၚ်ဂွံလဝ်ရောၚ် ဂကောံဒပ်စဵုဒၞါ ညးဍုၚ်ကွာန် ဗဝ်လခေဝ် လလောၚ်ပ္တိတ်လဝ်ရ။

ဟိုတ်နူ PDF တံ လုပ်စိုပ်ဗ္တိုက်လဝ် လ္တူဍုၚ်ဗဝ်လခေဝ် ဒၞါဲစက်ယန္တယာပရေၚ်အုပ်ဓုပ်ကံၚ်ဇြဳပၞာန် ဇြဟတ်ခိုဟ်တံဂှ်တုဲ လ္ပာ်ကံၚ်ဇြဳပၞာန် စပန်ပှော်လဝ် အရာပ်လ္တူဍုၚ် နကဵုလွဟ်ဇၞော်ဂမၠိုၚ်တုဲ ကၠောန်သ္ပကၠုၚ် စဵုကဵုဂြာတ်မခတိုဟ် နကဵုဒရုၚ်ရောၚ်ဂှ် ဂွံတီကေတ်ရ။

ဍုၚ်ဗဝ်လခေဝ် မဒှ်ဍုၚ်ဒပ်ပၞာန်ဂှ် ကြဴနူပၟတ်ပၞာန်စထၞာန်ကၠုၚ်ဗီုလၟုဟ်တုဲ စက်ယန္တယာကံၚ်ဇြဳပၞာန် သီုဖအိုတ် ဒေါအ်ဒေၚ်အာတုဲ သၞာဲဒဴ Non CDM တံလေဝ် ပါဲဒလေတ်အာယျဂှ် ဥူဗညာ ဥက္ကဌကံၚ်ဇြဳအခေါၚ်အရာမၞိဟ် ကံၚ်ဇြဳကဵုကသပ်တွဵုရးကရေၚ်ဍာဲ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အလဵုကံၚ်ဇြဳပၞာန်ဂှ် ကၟာတ်ထောံ သီုဖအိုတ်ရ။ ညံၚ်တိတ်နူကဵုဍုၚ် ဟွံဂွံဂးတုဲ လ္ပာ်ဖာသံၚ်၊ လ္ပာ်လွိုၚ်ကဝ်၊ လ္ပာ်ဒဳမအ်သဵုတံဂှ် ကၟာတ်လဝ်နွံရ။ နူကဵုအကြာဏံ မၞိဟ်မွဲဂကောံဂှ်တှ်ေ ဗီုဂွံဂှ်ၜေတ်တိတ်ကၠုၚ်နွံရ။ ဟိုတ်ဂှ်ရ ပ္ဍဲအရာပ်လ္တူဍုၚ်လ္ၚဵုတံဂှ် မၞိဟ်သှ်ေဒၟံၚ်တံဂှ်နွံ။ ၜိုတ်ပိုယ်တီဂှ်တှ်ေ ပရေၚ်ထတ်ယုက်ကီု၊ ပရေၚ်ပညာကီု၊ စက်ယန္တယာပရေၚ်အုပ်ဓုပ်လ္ၚဵုတံသီုဖအိုတ်ဂှ် သုန်ဂြာံအာအိုတ်ယျ။ Non CDM တံလေဝ် ဆုဲပြံၚ်အာ လ္တူဍုၚ်လွိုၚ်ကဝ်အိုတ်ယျဂှ် ဂွံမိၚ်ဒၟံၚ်ရ” သာ်ဝွံ ညးသ္ဂးရ။

သၞာဲဒဴ Non CDM ကံၚ်ဇြဳပၞာန်လ္ၚဵုတံဂှ် နူကဵုဍုၚ်ဗဝ်လခေဝ် ပၟတ်ပၞာန်မကၠောံထၞာန်ကၠုၚ်ဒၟံၚ်ဂှ် ပ္တိတ်ဒၟံၚ်ဇြဟတ် သွက်ဂွံဆုဲပြံၚ် နကဵုက္ၜၚ်ကျာသၞေၚ်ဝဲတံ နွံဒၟံၚ်တုဲ ၚုဟ်ဆုဲပြံၚ်ဂှ်မ္ဂး မွဲတၠ စဵုကဵု (၂) ကိုဋ်ဘာ် ၚုဟ်မၞုံဒၟံၚ်ရောၚ် ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာဟွံမာန်ဏီရ။

အခိၚ်လၟုဟ် လ္ပာ်ကံၚ်ဇြဳပၞာန် ကၟာတ်လဝ် ဍုၚ်ဗဝ်လခေဝ်တုဲ ညးဒေသတံဂှ် ဟွံကဵုတိတ်နူကဵုဍုၚ်ရတုဲ အပ္ဍဲဍုၚ်ဂှ်လေဝ် သၠဲပ္တိုန်ဒၟံၚ်ဇြဟတ်ဒပ်တံရောၚ်ဂှ် ဝန်ဇၞော်ကာအပ္ဍဲဍုၚ် ဗော်တောတက် ကောန်ဂကူကရေၚ်ဍာဲ KNPP ညေယျေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ အဏံဂှ် ဒပ်ပၞာန်ဍေံတံ ၃ ဒပ်၊ တုဲတှ်ေ ဗျူဟာဗဝ်လခေဝ်လေဝ် နွံဒၟံၚ်။ တရဴကျာဂှ်လေဝ် အာကၠုၚ်လောဲသွာဒၟံၚ်ဏောၚ်။ ဂၠံၚ်ကုန်ဟီုမ္ဂးလေဝ် ဒဵုဒးတိုန်စှ်ေဂှ် ဟွံမွဲစကွေံကွေံတုဲ လွဟ်လက်နက်မကမ်ဍေံတံ ဗျူဟာပၞာန်ဟီုဒၟံၚ်လၟုဟ်တံ တမ်ဒပ် (၃) ဒပ်နွံဒၟံၚ်တံကီု တုဲတှ်ေ ပလံၚ်ဗစိုပ်ဏာနၚ်လောဲသွာဂှ်ရ ဍေံတံသ္ပတိုၚ်ကဵုဒၞါဲဏံတုဲ ကၠုၚ်ဖျေံဇြဟတ်ဒပ် ပ္ဍဲကဵုဒၞါဲဏံ” သာ်ဝွံ ဟီုလဴထ္ၜးလဝ်ရ။

လ္တူဍုၚ်ဗဝ်လခေဝ်ဂှ် တမ်ဒပ်ကံၚ်ဇြဳပၞာန်ဂမၠိုၚ် မပ္တံကဵု ခမရ−၃၇၇၊ ခမရ−၄၃၀၊ ခမရ−၄၂၉၊ ဂကောံဒပ်ဖျေံသ္ဇိုၚ်ဗျူဟာပၞာန် ( ဒ.က.စ) လွိုၚ်ကဝ်၊ သီုၝောံဒပ် ၆၆ ကေုာံ ဒပ်တၞဟ်ဟ်တံလေဝ် ဖျေံလဝ်သ္ဇိုၚ်နွံရ။

ပ္ဍဲတွဵုရးကရေၚ်ဍာဲဂှ် ကၠာသၞာံ ၂၀၂၃ ဂှ် ပ္ဍဲကဵုပွိုၚ်ဍုၚ်လွိုၚ်ကဝ်၊ ဗဝ်လခေဝ် ကေုာံ ပွိုၚ်ဍုၚ်ယှာတဝ်တံဂှ် စက်ယန္တယာကံၚ်ဇြဳပၞာန် ဂေတ်ဂြိပ်မာန်လဝ်ကီုလေဝ် အခိၚ်လၟုဟ်ဂှ် ဆလ္တူဍုၚ်လွိုၚ်ကဝ်ဟေၚ် လ္ပာ်ကံၚ်ဇြဳပၞာန် ထိၚ်ဒက်လဝ်ပေၚ်ၚ်မာန်ဂှ် ဂွံတီကေတ် နူကဵုဂကောံဇြဟတ်ပၠန်ဂတးတံရ။

ပ္ဍဲကဵုပွိုၚ်ဍုၚ်ဗဝ်လခေဝ်၊ ပွိုၚ်ဍုၚ်ယှာတဝ်၊ ပွိုၚ်ဍုၚ်ဒဳမအ်သဵု ကေုာံ ပွိုၚ်ဍုၚ်ဖရူသဵု မဒှ်ဒၞါဲပေါဲဗ္တိုက်သ္ကာတ်မြဟ်ဒၟံၚ်ဖိုဟ်တံဂှ် ကံၚ်ဇြဳပၞာန် ရပ်စပ်အဝဵုပရေၚ်အုပ်ဓုပ်ပၞာန်ဏောၚ်ဂှ် လလောၚ်ပ္တိတ်လဝ် နကဵုစၟတ်တ္ၚဲ ဂိတုဖေဖဝ်ဝါရဳ (၂) တေံရ။

ပ္ဍဲတွဵုရးကရေၚ်ဍာဲ လၟိဟ်မၞိဟ် ဗ္ဒါဲ (၄) ကိုဋ်နွံဂှ် ဟိုတ်နူပေါဲဗ္တိုက် ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ်တုဲ လၟိဟ်မၞိဟ် (၂) ကိုဋ်ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Bawlakhe PDF