သ္ကုတ်ဗၟံက်ဒဳမအ်သဵု ပေါဲဗ္တိုက်ဂမၠိုၚ် ကလေၚ်သ္ကာတ်မြဟ်ကၠုၚ်ပၠန်

ဒဳမအ်သဵု၊ မေ (၁၇)

ဒေသသ္ကုတ်ဗၟံက် ပွိုၚ်ဍုၚ်ဒဳမအ်သဵု တွဵုရးကရေၚ်ဍာဲဂှ် ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် နကဵုဇြဟတ် ဗွဲမဂၠိုၚ်ဂၠေၚ်ဂှ်ရ ပေါဲဗ္တိုက် ကဵုဒပ်ပၠန်ဂတးကရေၚ်ဍာဲတံ သ္ကာတ်မြဟ်ဒၟံၚ် သီုဗ္တံသီုတ္ၚဲရောၚ် KNDF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပပ္တံနူဂိတုမေ (၁၃) တုဲကၠုၚ်တေံတုဲ ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၜိုတ် (၂၀၀) ပါဂှ်ဝွံ ထ္ပက်ကၠုၚ်ကရောၚ်ပၞာန် လ္ပာ်သ္ကုတ်ဗၟံက် ပွိုၚ်ဍုၚ်ဒဳမအ်သဵုဂှ်ရ ပေါဲဗ္တိုက် ကုဒပ်ပံၚ်ကောံပၠန်ဂတးတံ သ္ကာတ်မြဟ်ဒၟံၚ်ရ။

ပ္ဍဲကရောၚ်ပၞာန်ကံၚ်ဇြဳပၞာန်ဂှ် တမ်ဒပ် ၄၂၇၊ တမ်ဒပ် ၅၄၊ တမ်ဒပ် ၁၀၂၊ တမ်ဒပ် ၃၆၀၊ တမ်ဒပ် ၆၆၊ တမ်ဒပ် ၅၅၊ တမ်ဒပ် ၉၉၊ တမ်ဒပ် ၂၂ ကေုာံ တမ်ဒပ်သၟဝ်တဲ စ.က.ခ−၂ တံ ပါလုပ်ဗ္တိုက်ဒၟံၚ် ပ္ဍဲကရောၚ်ပၞာန်ဂှ်တုဲ သီုကဵုကၠောန်သ္ပဒၟံၚ် ပရေၚ်ဗ္တိုက်တရဴကျာတံရောၚ်ဂှ် သ္ကိုပ်ဗျူဟာ KNDF ခူရဳဒူ ဟီုရ။

အခိၚ်လၟုဟ်ဂှ် ဟိုတ်နူပေါဲဗ္တိုက်တံ သ္ကာတ်မြဟ်ဒၟံၚ်ဂှ်ရ အကာဲအရာဇီုကပိုက်ပြဟ်လလုဲ ဗွဲလစှ်ေ ဂှ် ဟွံဂွံတီကေတ်ဏီရ။

တုဲကၠုၚ် ပ္ဍဲဂိတုဨပရဴတေံဂှ်လေဝ် ကြဴနူဒပ်ကံၚ်ဇြအပၞာန် မပလေဝ်ကၠုၚ် သွက်ဂွံဖျေံသ္ဇိုၚ် ပ္ဍဲဂကောံကွာန်ဒဝ်တမကျဳ သ္ကုတ်ဗၟံက်ပွိုၚ်ဍုၚ်ဒဳမအ်သဵုဂှ်ကဵု ဒပ်ပံၚ်ကောံပၠန်ဂတးတံ က္တဵုဒှ်လဝ်ပေါဲဗ္တိုက်တုဲဂှ် လ္ပာ်ကံၚ်ဇြဳပၞာန် ဒးဆုတ်ကလေၚ်အာလဝ်ရ။

ပွိုၚ်ဍုၚ်ဒဳမအ်သဵု၊ ပွိုၚ်ဍုၚ်ဖရူသဵု၊ ပွိုၚ်ဍုၚ်ယှာတဝ် ကေုာံ ပွိုၚ်ဍုၚ်ဗဝ်လခေဝ် ဒၞါဲဒေသပေါဲပၞာန်သ္ကာတ်မြဟ်ဒၟံၚ်တံဂှ် ကံၚ်ဇြဳပၞာန် သုၚ်စောဲအဝဵုပရေၚ်အုပ်ဓုပ်ပၞာန်ဏောၚ် လလောၚ်ပ္တိတ်လဝ်နကဵုစၟတ်တ္ၚဲ ဂိတုဖေဖဝ်ဝါရဳ (၂) တေံရ။

ပ္ဍဲတွဵုရးကရေၚ်ဍာဲဂှ် ဟိုတ်နူပေါဲဗ္တိုက် ဂကောံဒပ်ပၠန်ဂတးတံကဵု ကံၚ်ဇြဳပၞာန်တံတုဲ လၟိဟ်မၞိဟ် (၂) ကိုဋ်ပြၚ်ဝွံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ ၜိုတ် (၇၅) တၟံကၠံ လၟိဟ်မၞိဟ်တွဵုရးနွံဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KNDF B05