ကြဴနူကျပေါဲရုဲမာဲတုဲ သ္ကိုပ်ဝန်ဇၞော်ပရာယော် စ္ဍးတိတ်နူလောကပရေၚ်ဍုၚ်ကွာန်မာန်ဏောၚ် ဟီုဂး

က္ၜၚ်ကံက် – မေ (၁၇)

နကဵုသ္ကိုပ်ဝန်ဇၞော်ပရာယော်လၟုဟ် ထနကောန်ဝန်ဘွောန်ကွောန်ချာန ညးမဒှ်က္ဍိုပ်သ္ကိုပ်ဒုတိယ ဗော်ညဳသၟဟ်ကောန်ဍုၚ်သေံဂမၠိုၚ် (NTN) ဂှ် ကြဴနူကျပေါဲရုဲမာဲတုဲ စ္ဍးတိတ်နူ လောကပရေၚ်ဍုၚ်ကွာန်မာန်ရောၚ်ဂှ် ဟီုသ္ဂးလဝ်ရ။ 

အတိုၚ်သွဟ်ကဝ်မယှေန်ပေါဲရုဲမာဲသေံ လလောၚ်တြးလဝ်မ္ဂး ဗော် Move Forward ကဵု Pheu Thai တအ်ဂှ် က္လိဂွံလဝ်သွဟ်ကဆံၚ်လ္တူတုဲ ဗော်အရံၚ်လဳမဴဂှ် ခုၚ်ပါလဳမာန် (၁၅၂)ခုၚ်၊ ဗော်ဖဳယူထိုၚ်ဂှ် (၁၄၁)ခုၚ် ကေုာံဗော်ပရာယော် က္ဍိုက်လဝ်က္ဍိုပ်ဂှ် က္လိဂွံလဝ် ခုၚ် (၃၆)ခုၚ်ဓဝ်ဟေၚ်ရ။ 

စပ်ကဵုပရာယော်သ္ကိုပ်ပၞာန်ဒေါံဇူ ကေတ်လဝ်တာလျိုၚ် နဒဒှ်သ္ကိုပ်ဝန်ဇၞော် ပွိုၚ်(၈)သၞာံတုဲ ထနာကွောန် ဟီုသ္ဂးလဝ်သာ်ဏံရ။ 

“သွက်မွဲဘဝညး ကၠောန်လဝ်ကမၠောန် သွက်ဍုၚ်ရ။ ကေတ်လဝ်တာလျိုၚ် နဒဒှ်သ္ကိုပ်ဝန်ဇၞော် ပွိုၚ်ဒ္စာံသၞာံရ။ ညးဂှ် ရေၚ်တၠုၚ်ကဵုလဝ် သွက်ကၟိန်ဍုၚ်ဗွဲမဂၠိုၚ်ဟီုဂှ် ကောန်ဍုၚ်အလုမ်ဍုၚ်သေံတအ်တီညာတ်ဒၟံၚ်ကီု ဗီုကဵုကမၠောန်စလာဘ်ဗ္ဇဴ မုလေဝ်ဟွံစောန်ပြံက်ဍံက်ဍေန်လဝ် ဟၟဲပုဟ် တီညာတ်ဏောၚ်ဂှ် အဲပတှ်ေကေတ်လဝ်ရ။ အောန်အိုတ်တှ်ေ ယၟုညးပရာယော်ဂှ်တှ်ေ သှ်ေၜက်ဒၟံၚ် ပ္ဍဲဂၠံသြိုဟ်ကောန်ဍုၚ်သေံဗွဲမလအ်မာန်ဏောၚ် အဲထေၚ်ကေတ်ရ”ဂှ် က္ဍိုပ်သ္ကိုပ်ဗော် UTN ဒုတိယ ဟီုသ္ဂးလဝ်ရ။ 

ပ္ဍဲသၞာံ ၂၀၁၄ ဂှ် ပလှ်ဖျေံအလဵုအသဳယေန်လေတ် ဒးဒုၚ်ရုဲစှ်ပတိုန်လဝ်အတိုၚ်သၞောတ်ဒဳမဝ်ကရေဇြဳတုဲ သ္ကိုပ်ဗိုလ်ဇၞော် ပရာယော်က္ဍိုက်လဝ်က္ဍိုပ် ပရေၚ်သီအဝဵုဂှ် စဵုကဵုအခိၚ်ဟွံဂွံကၠောန်ဗဒှ်ပေါဲရုဲမာဲ အတိုၚ်သၞောဝ်သ္ဇိုၚ်ဒက်ပ္တန် ၂၀၁၉ ဒပ်ပၞာန်သေံ က္ဍိုက်က္ဍိုပ်တုဲ ချူဓဇက်လဝ်ဏီဂှ် အုပ်ဓုပ်လဝ်ဍုၚ်ရ။ 

အခိၚ်ဂှ် သ္ကိုပ်ဗိုလ်ဇၞော်ပရာယော်ဂှ် ဒှ်ကၠုၚ်လဝ် ဝန်ဇၞော်ညးစၞးဗော် PPRP ဒပ်ပၞာန်ထံက်ကဵုဒၟံၚ်လကြဴတုဲ ပ္ဍဲကၠတ်ထဝ်သၟဝ်ဂှ် ၜိုန်ရဗော်  Pheu Thai ဂွံဇၞးကေတ်လဝ်ဒၞာဲဗွဲမဂၠိုၚ်ကီုလေဝ် ဗော်ဒပ်ပၞာန် ဒက်ပ္တန်လဝ်အလဵုအသဳ မွဲကရောံကဵုမဟာမိတ်ပရေၚ်ဍုၚ်ကွာန် ညးတအ်ရ။ 

အခိၚ်လၟုဟ်ဏံမ္ဂး စပ်ကဵုအကာဲအရာ သ္ကိုပ်ဝန်ဇၞော်ပရာယော် ဆက်နွံဒၟံၚ် ပ္ဍဲပရေၚ်ဍုၚ်ကွာန်ဏီဟာတုဲ မ္ၚးနူကောန်ဍုၚ်သေံတုဲ ကၟိန်ဍုၚ်ဇိုၚ်ဝုတ်ဒိုဟ်တအ်လေဝ် စိုတ်လုပ် မၚ်ရံၚ်ကျောဝ်ဒၟံၚ်ရဂှ် ဂွံတီကေတ်ရ။ 

(ဗီုရုပ် -Google)

Ref,CNA