ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် အပ္ဍဲပွိုၚ်ဍုၚ်မုၚ်ဂှ်ရ ညးဒေသ ဗ္ဒါဲမွဲဠက် ဒးဂြိပ်ဒဴပါဲဒလေတ်ဒၟံၚ်

ဍုၚ်မုၚ်၊ မေ (၁၇)

ပ္ဍဲခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ပ္ဍဲပွိုၚ်ဍုၚ်မုၚ်ဂှ် ကြဴနူဒပ်ကံၚ်ဇြဳပၞာန်ကဵု ဒပ်မဟာ (၃) တံ က္တဵုဒှ်ပေါဲဗ္တိုက်တုဲဂှ် လ္ပာ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် အပ္ဍဲကွာန်တံဂှ်ရ ညးဍုၚ်ကွာန်ဗ္ဒါဲမွဲဠက် ဒးဂြိပ်ဒဴဒၟံၚ်ရောၚ် KNU လလောၚ်ပ္တိတ်လဝ်ပရိုၚ်ရ။

တုဲကၠုၚ် ပ္ဍဲဂိတုမေ (၁၄) အခိၚ်နူဂယးပြဟ်တေံဂှ် ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်မုၚ် ခရိုၚ်ညံၚ်လေဝ်ပေန် တိဍာ်ထိၚ်ဒဝ် KNU ဂှ်ကဵု ဒပ်ပံၚ်ကောံ KNLA တံ က္တဵုဒှ်လဝ် ပေါဲဗ္တိုက်ဆေၚ်မုက်ရ။

ဟိုတ်နူပေါဲဗ္တိုက်ဂမၠိုၚ်တုဲ လ္ပာ်ကံၚ်ဇြဳပၞာန် ကၠောန်သ္ပလဝ် ပရေၚ်ပန်ပှော်ပၞာန်ထ္ပက် အပ္ဍဲကွာန်တံဂှ်ရ ညးဍုၚ်ကွာန် (၈၆၉၆) တၠ နူကဵုကွာန် (၈) ကွာန်ဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ်ရ။

စပ်ကဵုဒပ်ကံၚ်ဇြဳပၞာန် ကလိလောန် ဝးပ္ကဝ်ဒၟံၚ် အခေါၚ်အရာမၞိဟ် ကေုာံ ချဳဒရာၚ်ဒၟံၚ်ပရေၚ်ပၞာန် အပ္ဍဲတိဍာ်ထိၚ်ဒဝ် KNU တံဂှ်တုဲ ညးဒုၚ်တာလျိုၚ်ပရေၚ်ဆဝ်မ္ၚုဟ်စန်ဒက် ဂကောံအခေါၚ်အရာ မၞိဟ်ကရေၚ် KHRG သဝ်နန္ဒာသူ ဟီုလဝ်ဗီုလၟုဟ်ရ။

“ပရေၚ်ဗ္တိုက်တရဴကျာတံ၊ ပရေၚ်ပန်ပှော်လွဟ်ဇၞော်ကြာန်န်တံ၊ ပွမရပ်ဒက်ဟွံဗဗွဲကဵုသၞောဝ်တံ၊ ပွမဍဵုဍိုက်ပျဲပျာံ တုဲမ္ဂး ပွမရပ်စပ် ကောန်ကွာန်ဂမၠိုၚ် နဒဒှ်ဇွောံစဵုဒၞါပၞာန်တံဂှ်ဝွံ ဆက်တုဲ က္တဵုဒှ်ဒၟံၚ်ဖိုဟ်ရ။ ဗွဲတၟေၚ် ပ္ဍဲကဵုဒပ်မဟာ (၁) ၊ ဒပ်မဟာ (၃) ၊ ဒပ်မဟာ (၅) ကေုာံ ဒပ်မဟာ (၆) တံဂှ် ပရေၚ်ဖံက်ပ္ကဝ်အခေါၚ်အရာမၞိဟ်တံ က္တဵုဒှ်ဒၟံၚ်ဂၠိုၚ်အိုတ်ရောၚ်ဂှ် ပိုယ်တံ ဟီုဂွံရ။ မုဒှ်ရောဟီုတှ်ေ ပေါဲဗ္တိုက်တံဂှ် ဆက်တုဲက္တဵုဒှ်ဒၟံၚ်။ ပန်ပှော်လွဟ်ဇၞော်ကြာန်န်၊ ဗ္တိုက်ကဵုတရဴကျာတံဂှ် ဆက်က္တဵုဒှ်ဒၟံၚ်ရ။ ညးဍုၚ်ကွာန်ဒေသတံ ဇီုကပိုက်ကလိဂွံဝပ်တုဲ ဒးချိုတ်အိုတ်ရ။ ဒးမံၚ်ဒၟံၚ် နကဵုဓဝ်ဖေက်တံဏောၚ် အခေါၚ်အာကၠုၚ်မံၚ်စံၚ် ဗွဲမသၠးပွး ဟွံမွဲဏီပုဟ်။ သွက်ပရေၚ်ဂယိုၚ်လမျီုဂှ်လေဝ် ဟိုတ်နူပေါဲဗ္တိုက် မဆက်က္တဵုဒှ်ဒၟံၚ်တံဂှ်တုဲ ဒးဂဗဒၟံၚ် အခက်အခုဲဗွဲမဂၠိုၚ်ဂၠေၚ်ရ” သာ်ဝွံ သ္ဂးရ။

အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ဖျေံလဝ်ဒပ် အပ္ဍဲကွာန်ကျံၚ်သု (ပဝ်ပဳဒါ) တုဲ ကၠောန်သ္ပပန်ပှော်ဒၟံၚ် ညးဍုၚ်ကွာန်တံ ကေုာံ ရပ်ဒက်ဒၟံၚ်တံ နကဵုမသက္ကုဟိုတ်ရောၚ်ဂှ် ညးဒေသ မဂြိပ်ဒဴပါဲဒလေတ်ကၠုၚ်တံ သ္ဂးလဝ်ရ။

ဟိုတ်နူပြဝကံၚ်ဇြဳပၞာန် သာ်ဏံတုဲ ညးဍုၚ်ကွာန်ဂမၠိုၚ်ဝွံ ဒးဆေၚ်ဒၟံၚ်မုက် ကုအခက်အခုဲနာနာသာ်တုဲ နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်ရောၚ်ဂှ် KNU ဟီုရ။

တုဲကၠုၚ် ပ္ဍဲဂိတုမေ (၁၀) တေံဂှ်လေဝ် အပ္ဍဲကွာန်ညံၚ်ပေန်တာ ပွိုၚ်ဍုၚ်မုၚ်ဂှ် ပေါဲဗ္တိုက်ၜါလ္ပာ်က္တဵုဒှ်တုဲ ဒပ်ကံၚ်ဇြဳပၞာန် ရပ်ဒက်လဝ် ညးဍုၚ်ကွာန်ဒေသ ဗ္ဒါဲ (၃၀) တုဲ စံၚ်ဂစိုတ်လဝ် ညးဍုၚ်ကွာန်ဗၞတ် (၂၀) တၠ သီုကဵုပါလုပ်ကောန်ၚာ် (၄) တၠ၊ မၞိဟ်ဗြဴ (၁၁) တံ နကဵုဂအုံဗွဝ်တုဲ ညးဍုၚ်ကွာန် (၇) တၠဂှ်လေဝ် ရပ်ဒက်ကော်ဏာလဝ် နဒဒှ်ဇွောံစဵုဒၞါပၞာန်ရောၚ် ဂွံတီကေတ်ရ။

ဒပ်သၟဝ်တဲကံၚ်ဇြဳပၞာန်တံ ပန်ပှော်ဒၟံၚ် ပ္ဍဲပွိုၚ်ဍုၚ်မုၚ် နကဵုလွဟ်ဇၞော် ကြပ်အရိုဟ်ဒဒှ်တ္ၚဲ နွံဒၟံၚ်ဂှ်လေဝ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ