ကံၚ်ဇြဳပၞာန် ဗ္တိုက်ဂြာတ်မခတိုဟ် ဒေသကျံက်မိုၚ် ပွိုၚ်ဍုၚ်ဗြဝတဳ နကဵုက္ၜၚ်ကျာဂျက်ဖိုက်တာ

မြဝတဳ၊ မေ (၁၇)

လ္ပာ်ဒေသကျံက်မိုၚ် ပွိုၚ်ဍုၚ်ဗြဝတဳ တိဍာ်ထိၚ်ဒဝ် ဒပ်မဟာ (၆) ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် ကေုာံ ဒပ်စဵုဒၞါညးဍုၚ်ကွာန်တံ က္တဵုဒှ်ဒၟံၚ် ပေါဲဗ္တိုက်ဆေၚ်မုက်တုဲ လ္ပာ်ကံၚ်ဇြဳပၞာန် ကၠောန်သ္ပလဝ် ပရေၚ်ဗ္တိုက်ထောံခတိုဟ် နကဵုက္ၜၚ်ကျာရောၚ်ဂှ် ဂွံတီကေတ် ဇရေၚ် ပရိုၚ်တမ်ရိုဟ်ဗလးတိတံရ။

ပ္ဍဲဂိတုမေ (၁၇) ပယျာံနူဂယးပြဟ်ဂှ် ၜိုန်ရက္ၜၚ်ကျာဂျက်ဖိုက်တာ ကံၚ်ဇြဳပၞာန် ကၠုၚ်စိုပ်ထောံ လဝ်မခတိုဟ် လ္ပာ်ဒေသကျံက်မိုၚ် ပွိုၚ်ဍုၚ်ဗြဝတဳ စဵုကဵု (၃) ဝါကီုလေဝ် ဇီုကပိုက်ဒးလဝ်ဟွံမွဲပုဟ်ဂှ် ဂကောံဇြဟတ်ပၠန်ဂတးတံ သ္ဂးရ။

ကံၚ်ဇြဳပၞာန် ကၠုၚ်စိုပ်ဗ္တိုက်ဂြာတ်လဝ်မခတိုဟ် နကဵုက္ၜၚ်ကျာသာ်ဏံဂှ်ဝွံ ပ္ဍဲဗလးတိတေံ ဟိုတ်နူ ကောန်ဒပ်ကံၚ်ဇြဳပၞာန်တံ ဇီုကပိုက်ချိုတ်ဂျိုၚ်ဂၠိုၚ်ရောၚ်ဂှ် သၟာပၠန်ဂတးမွဲတၠ ဟီုရ။

လ္ပာ်ဒေသကျံက်မိုၚ် ကေုာံ လ္ပာ်ဒဵု(လက်ခတ်) ပွိုၚ်ဍုၚ်ဗြဝတဳဂှ် ဒပ်ပံၚ်ကောံဂမၠိုၚ် မပ္တံကဵု ဒပ်မဟာ (၆) KNLA ၊ ကရောၚ်ပၞာန်ကဝ်ဗရာ၊ ကရောၚ်ပၞာန်ကၠဗြန်၊ Federal Wings ကေုာံ Golden Eagle တံကဵု ဒပ်မၚ်ပယျဵု BGF ကံၚ်ဇြဳပၞာန်တံဂှ်ဝွံ နူဂိတုမေ (၁၁) စဵုကဵု (၁၇) ဂှ် က္တဵုဒှ်ဒၟံၚ် ပေါဲဗ္တိုက်တံရ။

အပ္ဍဲပေါဲဗ္တိုက်ဂမၠိုၚ်ဂှ် ကောန်ဒပ် BGF ဟွံအောန်နူကဵု (၁၀) တၠ ချိုတ်အာလဝ်တုဲ ဗ္ဒါဲ (၄၀) ဇီုကပိုက်ကလိဂွံလဝ်ဝပ်တုဲ လ္ပာ်ဂကောံဒပ်ပံၚ်ကောံပၠန်ဂတးတံဂှ် (၁) တၠ ပြဟ်လလုဲတုဲ (၁၀) တၠ ကလိဂွံလဝ်ဝပ်ဇီုကပိုက်ဒးလဝ်ရောၚ် ကရောၚ်ပၞာန်ကဝ်ဗရာ ကေုာံ ကရောၚ်ပၞာန်ကၠဗြန်တံ လလောၚ်ပ္တိတ်လဝ်ပရိုၚ်ရ။

ပ္ဍဲတိဍာ်အုပ်ဓုပ် ခရိုၚ်ဒူပလာယာ ဒပ်မဟာ (၆) KNU ဂှ် ကြပ်အရိုဟ်ဒဒှ်တ္ၚဲ ဒပ်ကံၚ်ဇြဳပၞာန် ကလိလောန်ဒၟံၚ် ပွမချဳဒရာၚ်ပရေၚ်ပၞာန်တံ၊ ပွမဝးပ္ကဝ်အခေါၚ်အရာမၞိဟ်တံရောၚ်ဂှ် ညးဒေသတံ ဟီုရ။

အပ္ဍဲဂိတုဨပရဴ ပွိုၚ်မွဲဂိတု တုဲကၠုၚ်တေံဂှ် ဟိုတ်နူပရေၚ်ဗ္တိုက်ထောံမခတိုဟ် ဒပ်ကံၚ်ဇြဳပၞာန်၊ ပရေၚ်ပန်ပှော်လွဟ်ဇၞော် ကေုာံ ဟိုတ်နူပရေၚ်စံၚ်ပလီုပလာ်တံတုဲ ဘာဗ္တောန်လိက်၊ ဗ္ဒမ်ကဵုဂဥုဲ၊ ဘာလကျာ်၊ ဘာကျာ်ခရေတ်ယာန် ကေုာံ စမြိုၚ်သ္ၚိဒၟံၚ် (၄၀၀) ပြၚ် ဒးဇီုကပိုက်လီုလာ်အာလဝ်ရောၚ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Cobra Column