ပ္ဍဲပေါဲဗတိုက်ၜဳကလေၚ် လ္ပာ်ကံၚ်ဇြဳပၞာန်ဟွံအောန်နူ (၂၀) တၠ ဒးချိုတ်လဝ်၊ ဒးလဝ်ဝပ်ဗွဲမဂၠိုၚ်

ၜဳကလေၚ် – မေ (၁၇)

တွဵုရးဍုၚ်မန်၊ ပွိုၚ်ဍုၚ်ၜဳကလေၚ် ပ္ဍဲဗ္ဒာဲကွာန်အဇြူချောၚ်ကဵု ကွာန်နာတ်ဂျဳဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပ္ဍဲပွိုၚ်(၂) တ္ၚဲ ပေါဲဗတိုက်က္တဵုဒှ်လဝ် ဗၞတ်(၆)ဝါ တုဲ လ္ပာ်ကံၚ်ဇြဳပၞာန် ဟွံအောန်နူ (၂၀)တၠ ဒးချိုတ်လဝ်ကီု ဒးလဝ်ဘဲဝပ် ဗွဲမဂၠိုၚ်ရဂှ် KNU ဒပ်မဟာ-၁ ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

က္တဵုဒှ်လဝ် ပ္ဍဲဂိတုမေ စၟတ်တ္ၚဲ (၁၅) ကဵု စၟတ်တ္ၚဲ (၁၆)ဂှ်တုဲ ကြဴနူဇြဟတ်ကံၚ်ဇြဳပၞာန် ဗ္ဒာဲ(၁၀၀) နူလ္ပာ်မေဝ်ဝိုၚ်စှ်ေကၠုၚ် ပ္ဍဲၜဳကလေၚ် ဒးဒုၚ်ကြတ်ဗတိုက်လဝ် ဗ္ဒာဲကွာန်အဇြူချောၚ်တုဲဂှ် ပေါဲဗတိုက်က္တဵုဒှ်လဝ် ဗၞတ်(၂) ဝါကီု ပ္ဍဲဂိတုမေ စၟတ်တ္ၚဲ(၁၆)ဂှ်မ္ဂး ပေါဲဗတိုက်ထပ်က္တဵုဒှ်လဝ် (၄)ဝါပၠန်ရ။

ပွိုၚ်ဍုၚ်ၜဳကလေၚ် ဗော်သွးကောန်ဂကူကရေၚ် KNU ဒပ်မဟာ (၁) ပ္ဍဲဂိတုဨဗြဴတုဲကၠုၚ်တေံလေဝ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်ပ္ဍဲကွာန် အဆက်ဟွံပိုတ်သ္ကုတ်ဂှ်ရ ညးဒေသ ၇၀၀၀ ပြၚ် ဂြိပ်ဒဴ ဒးပါဲဓလေတ်ဒၟံၚ်ရ။

ပ္ဍဲပေါဲဗတိုက်ဂှ် ၜိုန်ရလ္ပာ်ကံၚ်ဇြဳပၞာန် ဒးဒုၚ်ကၟာတ်လဝ်ကီုလေဝ် အခိၚ်ဗြဲဂူစှ်ေဂှ် ဟိုတ်နူလ္ပာ် KNLA ပံက်ကဵုလဝ်ဂၠံၚ်တုဲ ကလေၚ်စိုပ်အာ ဗဒိုပ်ဖျေံသ္ဇိုၚ် နာတ်ဂျဳတုဲ ၜိုန်ရအာဗတိုက်လဝ်ဗဒိုပ်ဂှ် နကဵုဒရုမ်ကီုလေဝ် ပရေၚ်ဇီုကပိုက်ဒးလဝ်ဟၟဲရဂှ် ဥက္ကဋ္ဌဒပ်မဟာ-၁ ဟီုသ္ဂးလဝ်ရ။

အခိၚ်လၟုဟ်ဏံမ္ဂး လ္ပာ်ကံၚ်ဇြဳပၞာန် ဟွံဂွံကၠုၚ်ကပှ်ကေတ်လဝ် ဇွညးဒးချိုတ်လဝ်တအ်ဂှ်ဏီတုဲ ညးဒးလဝ်ဘဲဝပ်တအ်ဂှ် လွဳလွတ်ဒၟံၚ် ပ္ဍဲဗဒိုပ်နာတ်ဂျဳရဂှ် ဂွံတီကေတ်ရ။

ဒပ်ကံၚ်ဇြဳပၞာန် ဒးဒုၚ်ကၟာတ်လဝ် ပ္ဍဲဗဒိုပ်နာတ်ဂျဳဂှ် သွက်ဂွံစှ်ေကၠုၚ် ပ္ဍဲပွိုၚ်ဍုၚ်ၜဳကလေၚ် ၜိုန်ရပလေဝ်ပလေတ်ဒၟံၚ် နွံကီုလေဝ် ဟိုတ်နူဒပ်ပံၚ်ကောံ KNLA ကၟာတ်ဒၞာလဝ်ဂှ်ရ ကလေၚ်စှ်ေကၠုၚ်ဟွံမာန်ဏီတုဲ အကာဲအရာသွက်ဂွံကလေၚ်ဒှ်ပေါဲဗတိုက် နွံဒၟံၚ်ရဂှ် ဂွံတီကေတ်ရ။

ဟိုတ်နူပေါဲဗတိုက်က္တဵုဒှ်ဒၟံၚ်တုဲ ညးဒေသနူကွာန်ဇိုၚ်ၚ်ဂှ် ၜိုတ် ၃ ကွာန် ပါလုပ်သီုကွာန် အဇြူချောၚ် တအ်ဂှ် ဒးဂြိပ်ဒဴ ပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲတုဲ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ရဂှ် ဂွံတီကေတ်ရ။

ပရိုၚ်သြၚ်လောန်တိုၚ်(မ်)

ဗီုရုပ် – ဗီုရုပ်တြေံ