နေပျဳဒဝ် – မေ(၁၇)
ကဝ်မယှေန်ပေါဲရုဲမာဲသၟဝ်တဲကံၚ်ဇြဳပၞာန်ဂှ် ပၞောဝ်ကဵုဗော်ပရေၚ်ဍုၚ်ကွာန် ပ္တိုန်လဝ်စရၚ်အခေါၚ်ဒက်ပ္တန် နဒဒှ် ဗော်ပရေၚ်ဍုၚ်ကွာန်တအ်ဂှ် သ္ပကဵုလဝ်အခေါၚ် ဗော်ပရေၚ်ဍုၚ်ကွာန် (၁၆)ဗော်ရ။
ပ္ဍဲဂိတုမေ စၟတ်တ္ၚဲ (၁၇) ဏံ ဗွဲမညဳသၟဟ်ကဵု သၞောဝ်ဥပဒေပတိုန်စရၚ်ဗော်ပရေၚ်ဍုၚ်ကွာန် ၝောံပိုဒ်(၉) သ္ပကဵုလဝ်အခေါၚ်စၟတ်သမ္တီ ကုဗော်ကောန်ဂကူအေန် ကေုာံဗော်ဒဳမဝ်ကရေဇြဳ ကေုာံပရေၚ် ညဳသၟဟ် ကိုဝ်ကရဂှ် ဓမံက်ထ္ၜးလဝ် ပ္ဍဲလိက်ပရိုၚ်တြးဝါဒရ။
ကံၚ်ဇြဳပၞာန်ဂှ် သွက်ပေါဲရုဲမာဲဗော်ဇဳညးတအ်ကၠောန်ဗဒှ်ကဵုရောၚ်ဟီုလဝ်ဂှ် သ္ပတမ်နူ ဂိတုဂျာန္နဝါရဳ သ္ကုတ်လကြဴတုဲ ပျးဌာန်ခၞံကၠုၚ်လဝ် သၞောဝ်ဥပဒေပတိုန်စၟတ်သမ္တီ ဗော်ပရေၚ်ဍုၚ်ကွာန် တၟိတုဲ ပ္ဍဲပွိုၚ် (၆၀)တ္ၚဲ သွက်ဂွံပတိုန်စၟတ်သမ္တီ အခေါၚ်ဒက်ပ္တန်ဗော် ကေုာံ အခေါၚ်ပ္တိုန်စၟတ်သမ္တီအခေါၚ်ဇရေၚ် UEC ဂှ် လလောၚ်တြးလဝ်ရ။
ကြဴနူလလောၚ်တြးကၠုၚ်လဝ်သာ်ဏံတုဲဂှ် ဗော်ကျာန်ခိုၚ်ယျေ ပ္တိုန်လဝ်အခေါၚ်စၟတ်သမ္တီ ကိုပ်ကၠာ အိုတ်ဂှ် စသ္ပကဵုလဝ်အခေါၚ် ပ္ဍဲဂိတုဨဗြဴ စၟတ်တ္ၚဲ (၂၀)ရဂှ် ဂွံတီကေတ်ရ။
ပ္ဍဲအပိုၚ်ခြာစၟတ်သမ္တီ ပွိုၚ်(၆၀) တ္ၚဲဂှ် ဗော်ပရေၚ်ဍုၚ်ကွာန် ပတိုန်လဝ်စရၚ်အခေါၚ်ဒက်ပ္တန် ကေုာံ အခေါၚ်စၟတ်သမ္တီဗော် စဵုကဵု (၆၃)ဗော်နွံတုဲ ဗော်ပရေၚ်ဍုၚ်ကွာန် ဟွံကၠုၚ်ပ္တိုန်စၟတ်သမ္တီ ဇရေၚ်ကံၚ်ဇြဳပၞာန် (၄၀)ဗော်ဂှ်မ္ဂး လလောၚ်တြးလဝ် ဒဒှ်ရလီုလာ်အာ နူဒဒှ်ဗော်အလဵုအလဵုဍေံရ။
ပရိုၚ်-သြၚ်လောန်လောန်တိုၚ်(မ်)
ဗီုရုပ် -MOI
sanlontai