ထိုၚ်ဝါန်၊ မေ (၁၈)
သွက်ဂွံဆေၚ်မုက်ကဵု တၚ်ရန်တၟံကြုက် ပ္ဍဲဒေသအေန်ဒေါ- ပသိဖုက်ဂှ် ဟိုတ်နူရီုဗၚ်ကဵုလဝ် ထိုၚ်ဝါန်၊ အမေရိကာန်မွဲစွံဂှ်ရ ဥက္ကဋ္ဌပါလဳမာန်ထိုၚ်ဝါန် ဟီုထိုၚ်သး ပတိုန်လဝ်ဂုဏ်စရာဲ ဂျပါန်၊ ကိုဝ်ရဳယျာသၠုၚ်ကျာ ကေုာံဖိလေတ်ပိုၚ်တအ် နဒဒှ် “ဂိတုလ္ပာ်ပရေၚ်စဵုဒၞာ” ပ္ဍဲဂိတုမေ စၟတ်တ္ၚဲ (၁၆)ရ။
ဗော်ကောန်မျူနေတ်ကြုက် (CCP) ဂွံလဝ်အဝဵုကဵု က္ဍိုပ်သ္ကိုပ်ယှဳကျေန်ဖျေန်တအ်ဂှ် သွက်ဂွံဂါံတိုန်အာ ပရေၚ်သ္ပအစာံ ဆေၚ်ရာကဵုဂၠးကဝ် နဒဒှ်ကၟိန်ဍုၚ်ဇြဟတ်ဇၞော်ဂၠးကဝ်ဂှ် ဒဒှ်ရညာတ်ကေတ်ဒၟံၚ်ထိုၚ်ဝါန် နဒဒှ်ကၞၚ်တၞိန်ရဂှ် ဥက္ကဋ္ဌပါလဳမာန်ထိုၚ်ဝါန် ယူဇြဳခွောန် ဟီုသ္ဂးလဝ်ကဵု ဂကောံကဵုကသပ် နူဟသာန် အေန်သတဳဂျုတ် ပ္ဍဲဝါယှေန်တာန်ရ။
“စဵုဒၞာကဵုထိုၚ်ဝါန်ဂှ် တုပ်သၟဟ်ကဵုဒၟံၚ်ပရေၚ်စဵုဒၞာ ဥရောပကဵု အမေရိကာန်ဏောၚ် ဟီုမာန်ရ”ဂှ် ညးဟီုသ္ဂးလဝ်ရ။
နကဵုယူဂှ် ၜိုန်ရပါလုပ် ပ္ဍဲဗော်တဴတက်ဒဳမဝ်ကရေတ်တေတ် ဂွံလဝ်အဝဵုလၟုဟ်ဏံကီုလေဝ် ဟီုသ္ဂးဒၟံၚ် သွက်သမ္မတဇြိုၚ်အေန်ဝါန် ဟွံသေၚ်ရဂှ် ဟီုသ္ဂးလဝ်ရ။
ပရေၚ်ထိုၚ်ဝါန်ဂှ် ဒှ်ပြသၞာဆေၚ်ဆက်ဒၟံၚ်အလုံဂၠးကဝ်တုဲ အကာဲအရာလၟုဟ်ဂှ် သုၚ်စောဲဇြဟတ်တုဲ ပရေၚ်ဂိုတ်ဂ္စာန်ပြံၚ်သၠာဲဒၟံၚ်ဂှ် ဟိုတ်နူဒစဵုဒစးဂှ်ရ ဟီုထိုၚ်သးလဝ် သ္ကိုပ်ဝန်ဇၞော်ဂျပါန် ဖူမဳယိုဝ်ကဳယှဳဒါ ကေုာံ သမ္မတကိုဝ်ရဳယျာသၠုၚ်ကျာ ယွောန်ဇြု(ခ်)ယိုဝ်တအ်ရ။
အရာဏံဂှ် ပဋိပက္ခက္တဵုဒှ်ဒၟံၚ် ပ္ဍဲကလိုဟ်ၜဳထိုၚ်ဝါန် မုဟွံဆေၚ်ဆက်ကဵု ဥရောပပုဟ် ကလေၚ်ဟီုပလန်လဝ်ကဵုတၚ်လစွံစိုတ် သမ္မတပြၚ်သေတ် အဳမာန်နျူရေယ်မာကွောန်ရဂှ် ညးဟီုသ္ဂးလဝ်ရ။
ပရေၚ် သမ္မတဖိလေတ်ပိုၚ်ဖာဒဳနာန်မာကိုဝ်(သ်)ဂျူနဳယာ ကဵုအခေါၚ် အမေရိကာန်လုပ်ကၠုၚ် ပ္ဍဲဗဒိုပ်ဖျေံသ္ဇိုၚ်ပၞာန်ဖိလေတ်ပိုၚ်ဂှ်လေဝ် ယဝ်ကြုက်ဗတိုက်ကၠုၚ်ထိုၚ်ဝါန်မ္ဂး ဒဒှ်ရဒှ်အရာလုပ်အသုၚ် သွက်ပရေၚ်စဵုဒၞာရောၚ်ဂှ် ယူဟီုသ္ဂးလဝ်ဏီရ။
“ “ဂိတုလ္ပာ်ပရေၚ်စဵုဒၞာ” ဒက်ပ္တန်လဝ်ကဵု ကိုဝ်ရဳယျာ၊ ဂျပါန်၊ ထိုၚ်ဝါန် ကေုာံဖိလေတ်ပိုၚ်တအ်ဂှ် မွဲကရောံကဵု ပရေၚ်ရီုဗၚ်ထံက်ပၚ်အမေရိကာန် ဒှ်ကၠုၚ်ညးထိၚ်ဒဝ် သွက်ပရေၚ်ၜိုဟ်လလံ ကေုာံပရေၚ်ဂီုကၠီုဒေသ အေန်ဒေါ-သိဖုက် အဓိကဏောၚ်” ဂှ် ယူထပ်ဟီုဗပေၚ်လဝ်ရ။
ညံၚ်ယှဳကျေန်ဖျေန်ဟွံဂွံထပ်ဒှ်ကၠုၚ် ပူတေန်ဒုတိယ သွက်ဂွံတာဒၞာအာ ပရေၚ်ကၠောန်ရေၚ်တၠုၚ် ဟွံတော်ဗ္စာဂှ် ညံၚ်ဂကောံဇြဟတ်ဒဳမဝ်ကရေဇြဳ ကဵုလဝ်ပရေၚ်ထံက်ဂလာန် ကုဍုၚ်ယူကရုၚ်ခိုၚ်ၚ်ကီု သွက်ဂွံတာဒၞာယှဳကျေန်ဖျေန်ဂှ် ထေက်ကဵုဒးကၠောန်ရေၚ်တၠုၚ်ရောၚ် ယူ ဟီုသ္ဂးလဝ်ရ။
ဂီုကၠီုထိုၚ်ဝါန် ပရေၚ်ချိုတ်ပၠိုတ်နွံဒၟံၚ်ဂှ် ဒဒှ်ရက္တဵုဗဒှ်ကဵု ဒတုဲဖိုလ်ဂၠးကဝ်ချိုတ်ပၠိုတ်ရဂှ် ဟီုသ္ဂးလဝ်တုဲ “ယဝ်ရဟွံသ္ပဂရုကဵု ပရေၚ်ဘပဠကြုက်မ္ဂး သွက်မၞိဟ်သီုဖအိုတ် အနာဂတ်ဂၠုဓီု စၟဳမၚ်ဒၟံၚ်ရ”ဂှ် ယူထပ်ဟီုလဝ်ရ။
ကၟိန်ဍုၚ်ကြုက်ဂှ် သွက်ဂွံဒုၚ်တဲ အခေါၚ်အဝဵုပေကျေန် နဒဒှ်ကဵုဇြဟတ်ဓရိုဟ် ကုတ္ကအ်အုပ်ဓုပ်ဒၟံၚ် အတိုၚ်နဲကဲဒဳမဝ်ကရေဇြဳဂှ် သၠုၚ်ပ္တိုန်ဒၟံၚ်အသိၚ် ပရေၚ်ချဳဒရာၚ်ပၞာန် ပ္ဍဲမွဲဗွိုၚ်ဗ္ဒာဲတ္ကအ်ထိုၚ်ဝါန်ရ။
သွက်ဂွံပၠုပ်ထိုၚ်ဝါန် သၟဝ်ပရေၚ်ထိၚ်ဒဝ်အလဵုအသဳပေကျေန် မူဝါဒသုၚ်စောဲအာဇြဟတ်ဂှ် အခိၚ်လဵုလေဝ် သၠးထောံဟွံသေၚ်ရဂှ်လေဝ် ဟီုသ္ဂးလဝ် ဗိုန်ဗိုန်ခိုၚ်ၚ်ရ။
Ref: CNA
sanlontai