သွက်ဂွံဗလးပ္တိုန် ဂြိုဟ်ပ္တောံထံၚ်ပရိုၚ်ပၞာန် ကိုဝ်ရဳယျာသၟဝ်ကျာ ကိုပ်ကၠာအိုတ်ဂှ် ကေန်ဂျုံအာန် သ္ပဒတန်

ပျုံယာန်၊ မေ (၁၈)

က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အာန်ဂှ် သ္ပဒတန်လဝ် အစဳဇန်ဗလးပ္တိုန် ဂြိုဟ်ပ္တောံထံၚ် ပရိုၚ်ပၞာန်ကၟိန်ဍုၚ် ကိုပ်ကၠာအိုတ်ဂှ်တုဲ သွက်ဂွံစဵုဒၞါဍုၚ်ဇကုဂှ် ဒဒှ်ရရပ်စပ်အာ အခေါၚ်စဵုဒၞါ တဝ်စၞေဟ်ဇကုဇကုရောၚ် သ္ပလဝ်ကတိဂှ် မဳဒဳယာကၟိန်ဍုၚ်ပိုၚ် ထ္မံက်ထ္ၜးလဝ် ပ္ဍဲဂိတုမေ (၁၇) တေံရ။

ကေန်ဂျုၚ်အာန်ဂှ် သွက်ဂွံဗလးပ္တိုန် ဂြိုဟ်ပ္တောံထံၚ်ပရိုၚ်ကၠာအိုတ် နူကဵုဒပ်ပၞာန်ဂှ် တ္ၚဲဏေံတေံ ဆဵုဂဗလဝ် ကုကမ္မတဳဒစးဒုၚ်ပလေဝ်ပလေတ် ပရေၚ်ဗလးပ္တိုန်ဂြိုဟ်ပ္တောံ လၟိုန်ဟွံသေၚ်တံဂှ်တုဲ သွက်ဂွံဗလး ဂြိုဟ်ပ္တောံဒမၠုက်ဂှ် ဒှ်ဒၟံၚ်ဒတုဲယျ သာ်ဝွံ အေဂျေန်ဇြဳပရိုၚ်ဗဟဵု ကိုဝ်ရဳယျာ (KCNA) ထ္မံက်ထ္ၜးလဝ်ရ။

သ္ပဒၟံၚ်အာရီု ကုသဘဴမဟာဗျူဟာ ပိုၚ်ပြဳဂြိုဟ်ပ္တောံထံၚ်ပရိုၚ်ပၞာန်ဂှ်တုဲ အမေရိကာန် ကေုာံ ကိုဝ်ရဳယျာသၠုၚ်ကျာတံ ဒဒှ်ရသၠုၚ်ပ္တိုန်အသိၚ် ကၠောန်ၜိုတ်ဒၟံၚ် ပရေၚ်ဆေၚ်မုက်ဒိဓဗတ် လ္တူဍုၚ်ကိုဝ်ရဳယျာသၟဝ်ကျာဂှ် ကေန် စောတ်စောဲလဝ်ရ။

“ ရဲသၠဲတိအမေရိကာန်တံကဵု မၞိဟ်ပရမ်ကောန်ရုပ် ကိုဝ်ရဳယျာသၠုၚ်ကျာတံ ကၠောန်သ္ပသၠုၚ်ပ္တိုန်အသိၚ် ပရေၚ်ဒိဓဗတ်ဆေၚ်မုက် ကုကိုဝ်ရဳယျာသၠုၚ်ကျာခ္ဍၚ် ကိုဝ်ရဳယျာသၟဝ်ကျာဂှ် သွက်ဂွံစဵုဒၞါကၟိန်ဍုၚ် ကေုာံ အဝဵုအပိုၚ်အခြာဍေံတံဂှ် ရပ်စပ်အာ အခေါၚ်စဵုဒၞါဇကုဇကု ဗွဲမသ္ကာတ်မြဟ်ဏောၚ်” ဂှ် နိဿဲကေတ် ဂလာန်ကေန်ဟီုလဝ်ဂှ်တုဲ KCNA ဒုၚ်လဝ်စဳရေၚ်ရ။

မူဝါဒဗော်ဂှ်ဝွံ သွက်ဂွံသၠုၚ်ပ္တိုန် အစောံစရာဲပရေၚ်စဵုဒၞါကီု၊ သွက်ဒပ်ပၞာန်အာကာသကၟိန်ဍုၚ်၊ သိပ္ပံ ကေုာံ နဲကွတ်ပညာတံ ဂွံတောတက်ရောၚ်ဂှ် ကေန် သ္ဂးလဝ်ရ။

“သွက်ဂွံဗလးပ္တိုန် ဂြိုဟ်ပ္တောံထံၚ်ပရိုၚ်ဒပ်ပၞာန် ဗွဲမအံၚ်ဇၞးဂှ် ဒှ်အရာပၟိက်ဇၞော် သွက်ပွဳပွူပရေၚ်ဂီုကၠီု ကၟိန်ဍုၚ်မွဲရောၚ်” ဂှ် ညးဟီုဂးလဝ်ဏီရ။

အစဳဇန်ဗလးပ္တိုန် ဂြိုဟ်ပ္တောံထံၚ်ပရိုၚ်ပၞာန်ဂှ် ကေန်ဂျုၚ်အာန်ဝွံ အပ္ဍဲအခိၚ်အာစိုပ်ဂေတ်ဝေၚ် ဌာနကောပ်ကာဲဖန်ဇန် သွက်ပရေၚ်ဖောအ်ဗြေဝ်တောတက် တရဴကျာကောန်ဂကူ မဒှ်အေဂျေန်ဇြဳ အာကာသဖောအ်ဗြေဝ်တောတက် ကိုဝ်ရဳယျာသၟဝ်ကျာ အပ္ဍဲဂိတုတုဲကၠုၚ်တေံဂှ် ကဵုလဝ်အမိၚ် သွက်ဂွံကၠောန်သ္ပပရေၚ်ဒစးဒုၚ်ပလေဝ်ပလေတ်တံရ။

ပရေၚ်စမ်ၜတ်ကမ်လှောဝ် ပျုၚ်ယာန် ဟွံလအ်ကၠုၚ်ဏီဂှ်ကဵု ပရေၚ်ပ္ကတ်ပ္ကေၚ်ပရေၚ်ပၞာန်ပံၚ်တောဲ အမေရိကာန်၊ ကိုဝ်ရဳယျာသၠုၚ်ကျာတံတုဲဂှ် ပ္ဍဲတ္ကအ်ကိုဝ်ရဳယျာဂှ် ပရေၚ်ကြံၚ်မ္ၚိုဟ်တံ ဆက်က္တဵုဒှ်ဒၟံၚ်ရ။

Ref: Yenisafak