သွက်ဂွံသောၚ်ကလး အကြေပ်အဂြတ်ပရေၚ်ဍုၚ်ကွာန်ဂှ် ဆက်ပ္တိတ်အာဇြဟတ်ရောၚ် ဂကောံ ဒေါအ်ပန်ပှော် (၇) ဂကောံ လလောၚ်ပ္တိတ်

ၛှၚ်မာဲ၊ မေ (၁၈)

ဂကောံဒေါအ်ပန်ပှော် (၇) ဂကောံဂှ် ဒတူလိုၚ် လ္တူကြက်ရှ်သာ NCA ဗိုန်န်ခိုၚ်ၚ်တုဲ သွက်ဂွံသောၚ် ကလး အကြေပ်အဂြတ်ပရေၚ်ဍုၚ်ကွာန်၊ သွက်သ္ဂောံဂွံပရေၚ်ၜိုဟ်လလမ် မတန်အာအဓာန်ဇမၠိၚ် ကေုာံ သွက်သ္ဂောံဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳတံဂှ် ဆက်ပ္တိတ်အာဇြဟတ်ဏောၚ် လလောၚ်ပ္တိတ်လဝ်ရ။

ကြဴနူကောံဓရီု ဂကောံရပ်လွဟ်ကောန်ဍုၚ်အရၚ် (၇) ဂကောံ မထ္ပက်လဝ်စၟတ်တဲ လိက်ကသုက် ဒေါအ်ပန်ပှော် အလုံဍုၚ်မွဲ (NCA) မကၠောန်သ္ပလဝ် ပ္ဍဲဍုၚ်ၛှၚ်မာဲ၊ ဍုၚ်သေံ ပ္ဍဲဂိတုမေ (၁၇) ကဵု (၁၈) တေံတုဲဂှ် လလောၚ်ပ္တိတ်လဝ်ရ။

ပ္ဍဲကောံဓရီုဏံဂှ် သွက်ဂွံတတ်ကၠောံ အကြေပ်အဂြတ်ပရေၚ်ဍုၚ်ကွာန်လၟုဟ်မာန် ဂၠါဲလဝ်ဂၠံၚ်ဍာန် မစှ်ေကဵုနတဲ အရာမဒှ်မာန်တံဂှ်တုဲ ညံၚ်ပေါဲသဳကၠဳပရေၚ်ဍုၚ်ကွာန် ညးထေက်ကဵုပါလုပ်တံ ဂွံပါလုပ်သီုဖအိုတ် ဂွံဒှ်ကၠုၚ်ဂှ်ကီု၊ ပေါဲသဳကၠဳပရေၚ်ဍုၚ်ကွာန်ဂမၠိုၚ် ညံၚ်ဂွံဒှ်လၟေၚ်ကမၠောန် မဒးပံၚ်တောဲရေၚ်တၠုၚ် ကေုာံ ညံၚ်ဂွံဒှ်လၟေၚ်ကမၠောန်ကောန်ဂကူတံဒှ်တမ် ပါလုပ်ရ။

ပ္ဍဲကဵုလၟေၚ်ကမၠောန် ပေါဲသဳကၠဳပရေၚ်ဍုၚ်ကွာန်ဂှ် သဳကၠဳလဝ် အခန်ကဏ္ဍဍုၚ်သ္အာၚ် ကေုာံ သွက်ပရေၚ်ဒတူလိုၚ်ဗိုန်န်ခိုၚ်ၚ် လ္တူမူသ္ဇိုၚ်ဖေဝ်ဒရာ ညးဍုၚ်ကွာန်ကောန်ဍုၚ်အရၚ်အလုံအိုဿီု မနွံမံၚ်ပၟိက် သွက်ဂွံဒက်ပ္တန် ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳတံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ကောံဓရီုဏံဝွံ တၚ်တုပ်စိုတ် မကလိဂွံ နူကဵုပေါဲဆဵုဂဗဗွဲပလး ကမ္မတဳပ္ညဳပ္ညပ် ဓမံက်ရုပ်ရဴပရေၚ် ၜိုဟ်လလမ် ကေုာံ ပရေၚ်ညဳသၟဟ်ဂကူ (NSPNC) တံကဵု ဂကောံပ္ညဳပ္ညပ်သဳကၠဳဗွဲပလး ဂကောံဒေါအ်ပန်ပှော် (၇) ဂကောံ မကၠောန်ဗဒှ်လဝ် ပ္ဍဲကၞောတ်ဂိတုမာတ်ချ်တေံဂှ် သ္ၚဳဂၠိပ်သဳကၠဳလဝ်ရောၚ် ဂွံတီကေတ်ရ။

ဟိုတ်နူလဗိုတ်ကျာမေလံၚ် ဇြဟတ်သ္ကာတ်ဂှ်တုဲ ပ္ဍဲကဵုကမၠောန်စပ်ကဵုပရေၚ်ဗ္စာရဏာမၞိဟ် သီုကဵုတွဵုရးရခေၚ်ကီု ပ္ဍဲကဵုတွဵုရး ကေုာံ ရးဒေသဇၞော်တၞဟ်သ္အာၚ် မဒးလဝ်ဘဲလဗိုတ်ကျာတံဂှ် နကဵုဂကောံဒေါအ်ပန်ပှော် (၇) ဂကောံ ၜိုတ်သၟဟ်အစောံ ပါလုပ်ရေၚ်တၠုၚ်အာဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

သ္အာၚ်နူဂှ်ပၠန် ကုလၟေၚ်ကမၠောန် မကဵုအရီုဗၚ်စပ်ကဵုပရေၚ်ဗ္စာရဏာမၞိဟ် နူ NCA-S EAO ကေုာံ AHA Center တံ မပံၚ်တောဲရေၚ်တၠုၚ်လဝ်ဂှ်လေဝ် ကလေၚ်သ္ၚဳဂၠိပ်သဳကၠဳလဝ်တုဲ စပ်ကဵုလၟေၚ်ကမၠောန် ကဵုအရီုဗၚ်ပရေၚ်ဗ္စာရဏာမၞိဟ် ကေုာံ ပရေၚ်စဵုဒၞါကောန်အရာပ်တံဂှ်တုဲ သွက်ဂွံကၠောန်ၜိုတ် ဂၠါဲအာဂၠံၚ်ဍာန်တံဂှ်လေဝ် သဳကၠဳလဝ်ကီုရ။

ပ္ဍဲကဵုဂကောံဒေါအ်ပန်ပှော် (၇) ဂကောံဂှ် ဗော်ဗၠးၜးရခေၚ် (ALP) ၊ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ၊ ဒပ်ပၞာန်ကွးဘာ (ABSDF) ၊ ဗော်သွးဒဳမဝ်ကရေတ်တေတ်လာဟူ (LDU) ၊ ဂအုပ်ဂကောံဗၠးၜးကောန်ဂကူပအိုဝ် (PNLO) ကေုာံ ဗော်ဍုၚ်မန်တၟိ (NMSP) တံ ပါလုပ်ရ။

ပရိုၚ်−သြၚ်လောန်တိုၚ်(မ်)