မတ်မလီု – မေ (၂၀)
ဟိုတ်နူလဗိုတ်ကျာတုဲ ညးဍုၚ်ကွာန် ဒးလဝ်ဘဲဒဏ်လဗိုတ်ကျာတအ် ဒးဒုၚ်ဆေၚ်ဒၟံၚ်မုက်ကဵု ပရေၚ်ဇီုကပိုက်ချိုတ်ဂျိုၚ်၊ ပရေၚ်လီုလာ်ဆောံလေၚ် ကေုာံ ဖိုလ်အဆက်လကြဴလဗိုတ်ကျာတအ်ဂှ် စိုတ်ဟွံမိပ်မြဟ်က္တဵုဒှ်ဒၟံၚ် သွက်ညးဍုၚ်ကွာန်တအ် သီုဖအိုတ်ကီု အခိၚ်ညးဍုၚ်ကွာန်တအ် ဆဵုဂဗဒၟံၚ် ကဵုဘဲဒဒိုက်ဂှ် ဒးစဵုဒၞာကဵု ပေၚ်ၚ်ရောၚ်ဂှ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုသ္ဂးလဝ်ရ။
ပ္ဍဲကောံဓရီု ကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာ ဗဟဵု၊ အလဵုအသဳပရေၚ်ညဳသၟဟ်ကောန်ဂကူ ကၠောန်ဗဒှ်လဝ် ပ္ဍဲဂိတုမေ စၟတ်တ္ၚဲ(၁၈)တုဲကၠုၚ်ဏံဂှ် ဥက္ကဋ္ဌကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန်ဒေသန္တရကာလအကြာ ဗဟဵု သ္ကိုပ်ဝန်ဇၞော် မာန်ဝေန်ခိုၚ်တာန် ဟီုသ္ဂးလဝ် သာ်ဏံရ။
“အလဵုအသဳပရေၚ်ညဳသၟဟ်ကောန်ဂကူဂှ် ဒၟာနူဒှ်အလဵုအသဳ ပၠန်ဂတးလုပ်ဒၟံၚ်ပေါဲဗတိုက် သွက်ပရေၚ်ဗဗွဲဓဝ် မံက်တိတ်ကၠုၚ် အကြာညးဍုၚ်ကွာန်တုဲ နဒဒှ်အလဵုအသဳ သ္ပဗဟဵုကဵုညးဍုၚ်ကွာန် အခိၚ်ညးဍုၚ်ကွာန်တအ် ဆဵုဂဗဒၟံၚ်ကဵုဘဲဒဒိုက်ဂှ် ဒးစဵုဒၞာကဵု ညးဍုၚ်ကွာန်တအ် ပေၚ်ၚ်ကီု ပရေၚ် ကလေၚ်လွဳပရာကဵုဂှ်လေဝ် ပ္တိတ်ဇြဟတ်ရေၚ်တၠုၚ်ကဵုအာရောၚ်”ဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲဂၠံၚ်တရဴဆက်ဇက်တိုန်အာ တိုၚ်ပ္ကဴရန်တၟံလဝ်ဂှ် တၚ်စမ်ၜတ်စၟဳစၟတ် ဟွံထေၚ်လဝ်မွဲသာ် က္တဵုဒှ်ကၠုၚ်ဗီုလၟုဟ်ဏံဂှ် ဒးတတ်ထပါ်အာ နကဵုဇြဟတ်ညးဍုၚ်ကွာန်တုဲ အကာဲအရာလဵုစိုပ်ပ် သွက်ဂွံစိုပ်တိုၚ်ပ္ကဴရန်လဝ် နူတမ်မူလမာန်ဂှ် လဇုဲလဇပါဲတးအာ ဟွံသေၚ်ရောၚ်ဂှ် သ္ကိုပ်ဝန်ဇၞော် ဟီုသ္ဂးလဝ်ဏီရ။
ကၠာနူလဗိုတ်ကျာ ဟွံလုပ်စိုပ်ကၠုၚ် နူကဵုဂိတုမေ စၟတ်တ္ၚဲ(၄)တေံ ပရေၚ်ဒစးဒုၚ်ပလေဝ်ပလေတ် မၚ်ရံၚ်ကျောဝ်ကီု၊ ပရေၚ်ဆက်စၠောံကဵုဂကောံတုဲ ကၠောန်ရေၚ်တၠုၚ်လဝ်ကီု၊ ပလေဝ်ပလေတ် တၚ်စဳမာန်နွံပၟိက် ပါလုပ်သီုသြန်ဂအုမ်ကာတၟေၚ်တုဲ ဌာနမဆေၚ်စပ် စဳမာန်ရေၚ်တၠုၚ် မၚ်ရံၚ်စံၚ်ကဵုလဝ် အဆက်ဟွံပိုတ်သ္ကုတ်ကီု သီုကဵုဂကောံမိတ်ပွံၚ်ဂမၠိုၚ် က္ဍိုပ်သ္ကိုပ်ပရေၚ်အုပ်ဓုပ်ဂမၠိုၚ်၊ ဂကောံပၠန်ဂတးညးဍုၚ်ကွာန်ဂမၠိုၚ်တအ်ဂှ်လေဝ် တၚ်ဏာဂုဏ်ရဂှ် ဟီုသ္ဂးလဝ်ရ။
နကဵုကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန်ဒေသန္တရကာလအကြာ ဗဟဵုဂှ် ကလေၚ်သ္ၚဳဂၠိပ်ဒၟံၚ် သွာၚ်ဆေၚ်စပ်ကဵုမူဝါဒကီု နကဵုကဝ်မတဳလိက်တေၚ် မဒက်ပ္တန်လဝ်တုဲဂှ်လေဝ် သွက်ဂွံရေၚ်တၠုၚ်ကၠောန်အာကမၠောန် ပြဟ်ဟ်ပြေဟ်ဟ်မာန် နွံဒၟံၚ်ပၟိက်ရဂှ် သ္ကိုပ်ဝန်ဇၞော် ဟီုသ္ဂးလဝ်ရ။
ဆက်တုဲ ညးလုပ်ဂကောံကဝ်မတဳဓမံက်ရုပ်ရဴပရေၚ်အုပ်ဓုပ်ညးဍုၚ်ကွာန် ဒေသန္တရကာလအကြာ ဗဟဵု တိုန်စိုပ်ကၠုၚ်ဂမၠိုၚ်ဂှ် တၚ်သ္ဂုတ်သွာတ်ဖျေံလဝ် ပ္ဍဲ (၁၉/၂၀၂၃)၊ စပ်ကဵုလၟေၚ်ကမၠောန် အဓာန်ဂတတုဲ အကာဲအရာ အာစိုပ်ဒတုဲ ကေုာံလၟေၚ်ကမၠောန် သှ်ေသၟေဟ်ဒၟံၚ် သွက်ဂွံဆက်ကၠောန်ရေၚ်တၠုၚ်ဂှ် သောၚ်ကလးကဵုလဝ်တုဲ ညးတာလျိုၚ်ဂမၠိုၚ် သဳကၠဳလဝ်ရဂှ် ဂွံတီကေတ်ရ။
ကောံဓရီုဂှ် သ္ကိုပ်ဝန်ဇၞော်ကၟိန်ဍုၚ်ပံၚ်ကောံ မာန်ဝေန်ခိုၚ်တာန် က္ဍိုက်က္ဍိုပ်တုဲ ဝန်ဇၞော်ကၟိန်ဍုၚ်ဂမၠိုၚ် ဒုတိယဝန်ဇၞော်ဂမၠိုၚ်၊ ဝန်ပ္ဍဲဒ္တန်ဂမၠိုၚ်ကီု သီုကဵုညးတာလျိုၚ် နူဌာနမဆေၚ်စပ်ဂမၠိုၚ် တိုန်စိုပ်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-ဌာနဝန်ဇၞော်ပရေၚ်အပ္ဍဲဍုၚ် ကေုာံပရေၚ်ကောပ်ကာဲမၞိဟ်လုပ်တိတ်
sanlontai