ပ္ဍဲတိဍာ် KNU ဂှ် ဒပ်ကံၚ်ဇြဳပၞာန် ဒၟါနူရပ်ဒက်ဒၟံၚ် နဒဒှ်ဇွောံစဵုဒၞါပၞာန်တံဂှ်ရ ညးဒေသ ဗ္ဒါဲ (၈၀၀) ဒးဂြိပ်ဒဴပါဲဒလေတ်ဒၟံၚ်

ကဝ်တူလေဝ်၊ မေ (၂၀)

ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်မုၚ် တိဍာ်အုပ်ဓုပ်ကဝ်တူလေဝ်ဂှ် ဒၟါနရပ်ဒက်ဒၟံၚ် နဒဒှ်ဇွောံစဵုဒၞါပၞာန်တံဂှ်ရ ညးဍုၚ်ကွာန်ဒေသဂမၠိုၚ်ဝွံ ဖေက်လကိုတ်တုဲ လၟိဟ်မၞိဟ်ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံ နွံဒၟံၚ် ဗ္ဒါဲ (၈၀၀) ဂှ် ဌာန်ဂအုပ်ဗဟဵု KNU လလာၚ်ပ္တိတ်လဝ်ရ။

တုဲကၠုၚ် ပ္ဍဲဂိတုမေ (၁၆) တေံ ဒပ်ကံၚ်ဇြဳပၞာန် လုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန်တမာခဝ် ကေုာံ အပ္ဍဲကွာန်ဒံၚ်သု(ပလိုတ်) မၞုံအပ္ဍဲပွိုၚ်ဍုၚ်မုၚ် ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ်တုဲ ညးဍုၚ်ကွာန်ကောန်အရာပ် အပ္ဍဲကွာန်ဂှ် (၂) တၠဂှ် ရပ်ဒက်ကော်ဏာလဝ် နဒဒှ်ဇွောံစဵုဒၞါပၞာန်ရောၚ် သာ်ဝွံပါလုပ် ပ္ဍဲတၚ်လလောၚ်တြးဂှ်ရ။

ဒပ်ကံၚ်ဇြဳပၞာန် ကြဴနူရပ်ဒက်ကော်ဏာ မၞိဟ်တြုံ အာယုက် (၄၀) သၞာံမွဲတၠ နူကဵုကွာန်တမာခဝ်ဂှ်ကဵု မၞိဟ်တြုံ အာယုက် (၇၀) သၞာံမွဲတၠ နူကဵုကွာန်ဒံၚ်သု(ပလိုတ်) တံ နဒဒှ်ဇွောံစဵုဒၞါပၞာန်တုဲဂှ် ပ္ဍဲဂိတုမေ (၁၇) တေံ ကလေၚ်ဗၠးကၠုၚ်လဝ်ယျဂှ် KNU သ္ဂးလဝ်ရ။

ဒပ်ကံၚ်ဇြဳပၞာန် ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် အပ္ဍဲကွာန်တမာခဝ်ကဵု ကွာန်ဒံၚ်သု(ပလိုတ်) တံဂှ်တုဲ ညးဍုၚ်ကွာန်ဒေသဂမၠိုၚ် ဖေက်လကိုတ်တုဲ ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲတုဲ ဒဵုကဵုအခိၚ် လၟုဟ် လၟိဟ်ဒးဂြိပ်ဒဴပါဲဒလေတ်ဒၟံၚ်ဂှ် ညးဍုၚ်ကွာန်ဒေသ နူကဵုကွာန် (၂) ကွာန်ဂှ် (၇၉၀) တၠ နွံကၠုၚ် ယျရောၚ် ပါလုပ် ပ္ဍဲတၚ်လလောၚ်တြး KNU ရ။

အပ္ဍဲပွိုၚ်ဍုၚ်မုၚ် ခရိုၚ်ညံၚ်လေဝ်ပေန် KNU ဂှ် တုဲကၠုၚ်ပ္ဍဲဂိတုမေ (၁၀) တေံဂှ်လေဝ် အကြာဒပ် ပံၚ်ကောံ KNLA ကဵု ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန်တံ က္တဵုဒှ်လဝ်ပေါဲဗ္တိုက်တုဲ ဒပ်ကံၚ်ဇြဳပၞာန် မဒးဂိလဝ်ဂှ်ဝွံ ပန်ဂစိုတ်လဝ် ညးဍုၚ်ကွာန်ဒေသ (၂၀) တၠ သီုကဵုကောန်ၚာ်(၄) တၠ၊ မၞိဟ်ဗြဴ (၁၁) တၠ ပါလုပ်ဂှ်တုဲ (၇) တၠဂှ် ရပ်ဒက်ကော်ဏာလဝ် နဒဒှ်ဇွောံစဵုဒၞါပၞာန်ရောၚ် KNU လလောၚ်ပ္တိတ်လဝ်ပရိုၚ်ရ။

ညးမၞုံအခေါၚ်ဟီုဂး KNU ပဒိုဝ်သဝ်ဂလာသေ ဂှ် ပ္ဍဲတိဍာ်အုပ်ဓုပ်ကဝ်တူလေဝ်ဂှ် ပွမဝးပ္ကဝ်အခေါၚ် အရာမၞိဟ် နူကဵုကံၚ်ဇြဳပၞာန်တံဂှ် ဂၠိုၚ်တိုန်ဒၟံၚ်သိုက်က်တုဲ ပ္ဍဲကဵုဒပ်မဟာ (၁) ၊ ဒပ်မဟာ (၃) ၊ ဒပ်မဟာ (၅) ကေုာံ ဒပ်မဟာ (၆) တံဂှ် ကလိလောန်လဝ် ဂၠိုၚ်အိုတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လၟုဟ်ပြဟ်ဟ်ဏံ နူကဵု (၂၀၂၁) သီအဝဵုတေံတုဲ ဒဵုကဵုအခိၚ်လၟုဟ် ပ္ဍဲကဵုတိဍာ်အုပ်ဓုပ်ကဝ်တူ လေဝ်ပိုယ်တံဂှ် ပရေၚ်ဝးပ္ကဝ်အခေါၚ်အရာမၞိဟ် ကံၚ်ဇြဳပၞာန်တံ ဂၠိုၚ်တိုန်ကၠုၚ်သိုက်က်ဂှ် ပိုယ်တံဂွံဆဵု ကေတ်ရ။ တုဲပၠန် ကိစ္စအပ္ဍဲပွိုၚ်ဍုၚ်မုၚ်ဂှ်တှ်ေ ညအ်ဂှ် ဂစိုတ်ဂယိုၚ်လဝ် နကဵုဂအုံဗွဝ်တုဲ ဒှ်ဒၟံၚ်အမှု ရာဇဝတ်ပၞာန်ဏောၚ်။ တုဲပၠန် ကိစ္စတံဏံရဂှ် ပ္ဍဲကဵုတိဍာ်ပိုယ်ဏံ ဒှ်ဒၟံၚ်လၟုဟ်မှဟွံသေၚ်ရပုဟ်။ ကၠာတေံလေဝ် ဒှ်လဝ်နွံဒၟံၚ်ရ။ ညးပါဲဒဴဘဲပၞာန်တံ ဂၠိုၚ်တိုန်ကၠုၚ်ဂှ်တှ်ေ ပ္ဍဲကဵုဒပ်မဟာ (၃) ၊ ဒပ်မဟာ (၁) ၊ ဒပ်မဟာ (၆) ၊ ဒပ်မဟာ (၅) တံဂှ် ပေါဲဗ္တိုက်တံဒှ်ဂၠိုၚ်ကၠုၚ်တုဲ ညးပါဲဒဴဘဲပၞာန်တံလေဝ် ဂၠိုၚ်တိုန် ကၠုၚ်ဒၟံၚ်ဂှ် ပိုယ်တံဂွံဆဵုကေတ်ရ” သာ်ဝွံ ညးမၞုံအခေါၚ်ဟီုဂး KNU ပဒိုဝ်သဝ်ဂလာသေ ဟီုရ။

တုဲကၠုၚ် ပ္ဍဲဂိတုမေ (၁၃) ကဵု (၁၄) ဂှ်လေဝ် ပ္ဍဲကဵုပွိုၚ်ဍုၚ်မုၚ်ဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်မဟာ (၃) KNLA တံ ဆက်က္တဵုဒှ်လဝ်ဂှ်ရ ညးဍုၚ်ကွာန်ဒေသ (၈၀၀၀) ပြၚ်ဝွံ ဒးဂြိပ်ဒဴပါဲဒလေတ်ဒၟံၚ်ဒၞါဲဗၠးဘဲတံတုဲ ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴဒၟံၚ်ဂမၠိုၚ်ဝွံ ဒးဆေၚ်ဒၟံၚ်မုက် ကုတၚ်အခက်အခုဲမဂၠိုၚ်ဂၠေၚ်ဂှ် ဂွံဆဵုကေတ်ရ သာ်ဝွံ KNU လလောၚ်ပ္တိတ်လဝ်ရ။

ဒပ်ကံၚ်ဇြဳပၞာန် ဟိုတ်နူလုပ်စိုပ်ထ္ပက်ပၞာန်ဗ္တိုက်ဒၟံၚ် အပ္ဍဲကွာန် မၞုံအပ္ဍဲပွိုၚ်ဍုၚ်မုၚ် KNU တံဂှ်ရ လၟိဟ်ညးဍုၚ်ကွာန်ဒေသ မ္ဒးဂြိပ်ဒဴပါဲဒလေတ်ဒၟံၚ် နူကဵုကွာန် (၁၁) ကွာန်ဂှ်ဝွံ နွံကၠုၚ် စဵုကဵုဗ္ဒါဲ (၁၆၀၀၀) ဂှ်ရ သွက်သ္ဂောံကလိဂွံအရီုဗၚ်ပရေၚ်ဗ္စာရဏာမၞိဟ်တံ၊ ဂီုကၠီုဘဝမၞိဟ်တံဂှ်တုဲ သွက်ဂွံရီုဗၚ် ရေၚ်တၠုၚ်ကဵုဂှ် ကမ္မတဳရီုဗၚ်ဟံၚ်ပြာ်ကရေၚ် စပ်ကဵုကာမံက်တိုန် (ပွိုၚ်ဍုၚ်မုၚ်) လလောၚ်ပ္တိတ်လဝ်လစွံစိုတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−KHRG