ဗ္ဒိုပ်ဗၠာဲသၟိၚ်ဗွဲမဂၠိုၚ် နူကဵုပွိုၚ်ဍုၚ်ရေဝ်ဂှ် ကံၚ်ဇြဳပၞာန် သၠးထောံအိုတ်

ရေဝ်၊ မေ (၂၀)

ဗ္ဒိုပ်ဗၠာဲသၟိၚ်ဗွဲမဂၠိုၚ် နူကဵုပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ကောန်ဂကောံဒပ်ဗၠာဲသၟိၚ်တံ စာ်စ္ဍးအာဗ္ဒိုပ်တံဂှ်အိုတ်တုဲ ဖျေံဗ္ဒိုပ်မံၚ်ဒၟံၚ် ပ္ဍဲဗ္ဒိုပ်ဗၠာဲသၟိၚ်ၝောံဍုၚ်ရေဝ်မွဲရဂှ် ဂွံတီကေတ် နူကဵုညးဒေသဂမၠိုၚ် ကေုာံ ဂကောံဇြဟတ်ပၠန်ဂတးတံရ။

ပ္ဍဲကဵုပွိုၚ်ဍုၚ်ရေဝ်ဂှ် ဗ္ဒိုပ်ဗၠာဲသၟိၚ်ကီု သၞေဟ်ကၚ်ဗၠာဲသၟိၚ်တံကီု ဟွံအောန်နူကဵု (၆) ဗ္ဒိုပ် နွံဒၟံၚ်ဂှ် ကြဴနူဒပ်ပၞာန်သီအဝဵုတုဲ ဂကောံဒပ်စဵုဒၞါညးဍုၚ်ကွာန်တံ မွဲဏှမွဲဏှ ကၠုၚ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်တံဏံဂှ်ရ ကောန်ဂကောံဒပ်ဗၠာဲသၟိၚ်ဂမၠိုၚ် စ္ဍးတိတ်အာနူကဵုဗ္ဒိုပ်တံဂှ်အိုတ်ရ။

ၜိုတ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်ဂွံဂှ်မ္ဂး စနူကၞောတ်သၞာံတုဲကၠုၚ်တေံတုဲ နူကဵုဗ္ဒိုပ်ဗၠာဲသၟိၚ်တိဍာ်ခေါဇာ၊ ကွာန်ဘာ၊ သၞေဟ်ခြေၚ်၊ ပါၚ်ၜဳတံဂှ် ကောန်ဒပ်ဗၠာဲသၟိၚ်ကံၚ်ဇြဳပၞာန်တံ စ္ဍးတိတ်အာအိုတ်ဂှ် ဂွံတီကေတ်ရ။

သ္အာၚ်နူဂှ်ပၠန် ဗ္ဒိုပ်ဗၠာဲသၟိၚ်တိဍာ်လၟိုၚ် နူအပ္ဍဲဍုၚ်လၟိုၚ် မဒးဒုၚ်ဗ္တိုက်ဒၟံၚ် မွဲဏှမွဲဏှ သီုကဵုပါလုပ်တမ်ဒပ်ဖျေံသ္ဇိုၚ် ကံၚ်ဇြဳပၞာန်တံဂှ်လေဝ် ၜိုတ်အခိၚ်တ္ၚဲရ ကောန်ဒပ်ဗၠာဲသၟိၚ်တံ ကၠုၚ်အိုတ်တုဲ အခိၚ်ဗ္တံမ္ဂး အာမံၚ်ဒၟံၚ် ပ္ဍဲတမ်ဒပ်တေံသၟးရဂှ် ညးဒေသဂမၠိုၚ် သ္ဂးရ။

အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဏံ ဗ္ဒိုပ်ဗၠာဲသၟိၚ် နူကဵုပွိုၚ်ဍုၚ်ရေဝ်ဂှ် ကောန်ဂကောံ PDF ဒေသတေံ အာစိုပ်ဗ္တိုက်လဝ် ဟွံအောန်နူကဵု (၈) ဝါတုဲ ပ္ဍဲကဵုဏံ ဗ္ဒိုပ်ဗၠာဲသၟိၚ်သၞေဟ်ခြေၚ်ဂှ် လုပ်စိုပ်ဍိုက်ဗ္တိုက်တုဲ စံၚ်ပလီုပလာ်လဝ်ရ။

ပ္ဍဲကဵုလၟေၚ်ဒဒှ် ဗ္ဒိုပ်ဗၠာဲသၟိၚ် ကေုာံ ကောန်ဒပ်ဗၠာဲသၟိၚ်တံ ဒးဒုၚ်ဗ္တိုက်တံဂှ်မ္ဂး သီုသ္ကိုပ်ဗ္ဒိုပ်ပါလုပ်ဂှ် ကောန်ဒပ်ဗၠာဲသၟိၚ် ဟွံအောန်နူကဵု (၁၅) တၠ ဇီုကပိုက်ချိုတ်အာလဝ်ရ။

ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ ကြဴနူဒပ်ပၞာန်သီအဝဵုတုဲ ဒှ်ဒေသပၠန်ဂတးဒစဵုဒစးရပ်လွဟ် ဇြဟတ်ခိုဟ်မွဲတုဲ စနူဂိတုဖေဖဝ်ဝါရဳ (၂) တုဲကၠုၚ်တေံဂှ် လလောၚ်တြးလဝ် နဒဒှ်ပရေၚ်အုပ်ဓုပ်ပၞာန်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media