ပ္ဍဲသဓီု ဟိုတ်နူလွဟ်လက်နက်ဇၞော်တုဲ ကောန်အရာပ် (၁) တၠ ချိုတ်အာတုဲ (၃) တၠ ကလိဂွံဝပ်

သဓီု၊ မေ (၂၀)

ဒပ်ကံၚ်ဇြဳပၞာန် ဟိုတ်နူပန်ပှော်စုတ်လွဟ်ဇၞော် လ္ပာ်ကွာန်ပုၚ်နေဝ်တဝ် ပွိုၚ်ဍုၚ်သဓီုဂှ်ရ ကောန်အရာပ် မွဲတၠ ဒးချိုတ်အာတုဲ (၃) တၠ ကလိဂွံလဝ်ဝပ်ရောၚ် ညးအုပ်ကာခရိုၚ်သဓီု ဗော်သွးကောန်ဂကူကရေၚ် KNU ဟီုကဵု ဌာန်ပရိုၚ်သြၚ်လောန်ုတိုၚ်(မ်) ရ။

ဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်ပုၚ်နေဝ်တဝ်ဂှ် ပ္ဍဲဂိတုမေ (၁၄) တုဲကၠုၚ်တေံ ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် စဵုကဵုၜါဝါရ။

ကြဴနူပရေၚ်ဗ္တိုက်ဂှ်တုဲဂှ် ဒပ်ကံၚ်ဇြဳပၞာန်ဝွံ ပန်ပှော်စုတ်လဝ် လွဟ်ဇၞော် ဟွံအောန်နူကဵု (၂၀) လစုတ် အပ္ဍဲကဵုကွာန်တံဂှ်တုဲ မ္ၚးနူဒးအာလဝ်သ္ၚိဌာန်တံဂှ် ညးဍုၚ်ကွာန်ကောန်အရာပ်တံလေဝ် ဒးဇီုကပိုက်ချိုတ်အာလဝ်နွံရ။

ဟိုတ်နူပရေၚ်ပန်ပှော်လွဟ်ဇၞော်ဒပ်ကံၚ်ဇြဳပၞာန်တုဲ သဝ်ဇြဝ်ဝ် အာယုက် ၄၂ သၞာံ ဒၟံၚ်အရာပ် (သာသနာကုန်း) ကွာန်ပုၚ်နေဝ်တဝ်ဂှ် ဒးလွဟ်ဇၞော်ဒးချိုတ်အာလဝ်တုဲ ညးမဒှ်သမ္ဘာ နဝ်ကျဳမျာၚ် ကေုာံ ကောန်ဝုတ် နဝ်သဇၚ်အေတံ ဒးအာလဝ်မကမ်ကီုတုဲ နူကဵုကွာန်ပုၚ်နေဝ်တဝ်လ္တူ တဳယှိုဲလေဝ် ညးမဂွံအာယုက် ၆၉ သၞာံဂှ်လေဝ် ကလိဂွံအာလဝ်ဝပ်ကီုရ။

ဟိုတ်နူလွဟ်ဇၞော်တုဲ နူကဵုကွာန်ပုၚ်နေဝ်တဝ်လဒေါဝ်ဂှ် သ္ၚိဒၟံၚ် (၂) မ၊ နူကဵုကွာန်ဝါန်ဗာအေန်ဂှ် (၂) မ၊ နူကဵုကွာန်(သာသနာကုန်း)ဂှ် (၁) မ၊ နူကဵုကွာန်ထဳညာလူဂှ် (၂) မ အပံၚ်ဖအိုတ် သ္ၚိဒၟံၚ် (၇) မ လီုလာ်အာလဝ်တုဲ ဗ္ၜေံမွဲ ချိုတ်အာလဝ်ရ။

ကြဴနူပေါဲဗ္တိုက်ဏံတုဲ နူကဵုလ္ပာ်ဒပ်ကံၚ်ဇြဳပၞာန်တံဂှ် ဟိုတ်နူပန်ပှော်ဒၟံၚ်လွဟ်ဇၞော် ကြပ်အရိုဟ်ဒဒှ်တ္ၚဲဂှ်ရ ညးဍုၚ်ကွာန်ဂၠိုၚ်ကဵုလ္ၚီ နူကဵုကွာန်(၇) ကွာန် ပါလုပ်သီုကဵုကွာန်ဝါန်ဗာအေန်၊ ပုၚ်နေဝ်တဝ်၊ မေန်လွေန်၊ ထဳညာလူတံဂှ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ