ဒပ်ဗၠာဲသၟိၚ်ပါကေဿတာန် ဂၠိုက်ဂၠါဲစၟဳစၟတ် သ္ၚိဒၟံၚ်အဳမရာန်ခါမ် မဒှ်သ္ကိုပ်ဝန်ဇၞော်ပါကေဿတာန်တြေံ

ကရာချဳ၊ မေ (၂၀)

ဍုၚ်ပါကေဿတာန်ဝွံ အခိၚ်ဒးဆေၚ်ဒၟံၚ်မုက် ကုအရာဟွံညိၚ်ဝတ် စပ်ကဵုပရေၚ်ဍုၚ်ကွာန် ကေုာံ ပရေၚ်ပိုန်ဒြပ်တံဂှ် ပွပကီုပရာပ်ဂမၠိုၚ်ဝွံ ဟိုတ်နူဒှ်ပရေၚ်ပြုပြေၚ်ပၞာန် မဒှ်ကၠုၚ်မာန်တံဂှ်တုဲ ဂကောံဒပ်ဗၠာဲသၟိၚ်ပါကေဿတာန်တံ ဒဒှ်ရစဳဇန်ဒၟံၚ် သွက်ဂွံဂၠိုက်ဂၠါဲ သ္ၚိဒၟံၚ်သ္ကိုပ်ဝန်ဇၞော်တြေံ အဳမရာန်ခါမ် မၞုံဍုၚ်လာဟိုဝ် ပ္ဍဲဂိတုမေ (၁၉) တေံဂှ် သၞာဲဒဴအလဵုအသဳတွဵုရးမွဲတၠ ဟီုရ။

ကောန်ဂကောံဒပ်ဗၠာဲသၟိၚ်ဂၠိုၚ်ကဵုကၠံ နူကဵုသၟိၚ်ဇၞော်ဗၠာဲသၟိၚ် မသ္ကိုပ်သ္ကဂှ်ဝွံ ကြဴနူတ္ၚဲသိုက်တုဲ ကၠောန်အာပရေၚ်ဂၠိုက်ဂၠါဲစၟဳစၟတ်တံဏောၚ်ဂှ် ဝန်ဇၞော်လလောၚ်ပရိုၚ် တွဵုရးပါန်ဂျာပ် သ္ဂးရ။

“သၟာပကီုပရာပ် မအောပ်မာဒၟံၚ် ပ္ဍဲကဵုဂှ် ၜိုတ် (၄၀) နွံဏောၚ် ပိုယ်တံဂွံလဝ်ပရိုၚ်တုဲ သွက်ဂွံဂၠါဲပ္ဍဲသ္ၚိဂှ် ဗၠာဲသၟိၚ် ၜိုတ် (၄၀) တၠ နွံပၟိက်ဏောၚ်” ဂှ် ညးဟီုဂးလဝ်ကဵု ဌာန်ပရိုၚ်ရိုက်တာတံတုဲ ဟီုစၞောန်လဝ် ကုညးထံက်ဂလာန်ခါမ် မဒးဒုၚ်စောတ်စောဲလဝ် ဒဒှ်ရဗ္တိုက်ပလီုလဝ် စမြိုၚ်အလဵုအသဳ ကေုာံ စမြိုၚ်စပ်ကဵုပၞာန်တံဂှ်ရ။

သ္ၚိသၟာခရေတ်ကေတ်ဒယှ်တြေံ အာယုက် (၇၀) သၞာံ မနွံဒၟံၚ် ပ္ဍဲအရာပ်ဖမာန်ပက် ပ္ဍဲဍုၚ်လာဟိုဝ် တွဵုရးပါန်ဂျာပ်ဂှ်ဝွံ ပ္ဍဲဂိတုမာတ်ချ်တုဲကၠုၚ်တေံ အခိၚ်ကော်ကၠုၚ်ညး သ္ဂောံတိုန်စိုပ်ရုၚ်သၞောဝ်ဓဝ်ဂှ် ဟိုတ်နူဟွံကၠုၚ်လဝ်ဂှ်ရ သွက်ဂွံရပ်ဒက် ပ္တိတ်ကၠုၚ်ဇြဟတ်ဂှ် ဒှ်ဒၞါဲအကြာညးထံက်ဂလာန်ကဵု ဒပ်ဗၠာဲသၟိၚ်တံ ဒှ်လဝ်ပေါဲဗ္တိုက်ညးသ္ကအ် မဒှ်ရ။

ခါမ်ဝွံ ပ္ဍဲဂိတုမေ (၉) တေံ ဒးဒုၚ်ရပ်ဒက်လဝ် နကဵုတၚ်စောတ်စောဲကဵုကေတ်လာပ်ဗဇဴတံဂှ်တုဲ ညးဂှ် စပ်ကဵုဂဗုတ်ဂှ်တုဲ ကယျာန်ပါဲလဝ်ရ။ ပ္ဍဲဂိတုဏံ သ္ကုတ်လက္ကရဴဏံဂှ် ကလေၚ်ဗၠးကၠုၚ်လဝ် နကဵုတၚ်ဒုၚ်လျိုၚ်ရုၚ်သၞောဝ်ဓဝ် အာယုက်မကြပ်အိုတ်ဂှ်ရ။

ဟိုတ်နူပရေၚ်ညးဒးဒုၚ်ရပ်ဒက်လဝ်ဂှ်တုဲ သ္ကဵုက္တဵုဒှ်လဝ် ဇွိုန်လပှ်ပကီုပရာပ် ညးထံက်ဂလာန်ဂမၠိုၚ် ဗ္တိုက်လဝ် စမြိုၚ်စပ်ကဵုလ္ပာ်ပၞာန် ကေုာံ စမြိုၚ်အလဵုအသဳတၞဟ်သ္အာၚ်တံဂှ်ရ။

အလဵုအသဳပါန်ဂျာပ်ဝွံ ဟိုတ်ပရေၚ်ဗ္တိုက်ဒပ်ပၞာန်ဇြဟတ်ဇၞော်ဂှ်တုဲ သွက်ဂွံလှဲပြံၚ်ကဵု မၞိဟ်ထံက်ဂလာန် ဂမၠိုၚ်ဂှ်ကီု ကုမၞိဟ်မစောတ်စောဲလဝ် ဒဒှ်ရအောပ်မာဒၟံၚ် ပ္ဍဲကဵုသ္ၚိညးဂှ်လေဝ် သွက်ဂွံလှဲပြံၚ်ကဵုကီုဂှ် ပ္ဍဲတ္ၚဲဗုဒ္ဓဝါတုဲကၠုၚ်တေံ အာတ်မိက်လဝ်ရ။

ခါမ်ဝွံ ပူဂဵုမပါလုပ်လဝ် ပ္ဍဲပွပကီုပရာပ်လဵုမွဲလေဝ် ဒဒှ်ရဟွံကဵုလဝ်အခေါၚ်စ္ၜုဲစ္ၜော်ဂှ် သာ်ဝွံ ကယျာန် ပါဲလဝ်တုဲ သၟိၚ်တၠအဝဵုဂမၠိုၚ် ပ္တိတ်လိက်ဝရာန် နူကဵုရုၚ်သၞောဝ်ဓဝ်တုဲမှဟေၚ် ဒဒှ်ရဂၠါဲပ္ဍဲသ္ၚိညးမာန်ဂှ် ဟီုဂးလဝ်ရ။

တုဲကၠုၚ် ပ္ဍဲတ္ၚဲဗြဴဗ္တိတေံ ညးမဒှ်အထံက်ခါမ်ဂှ်ဝွံ ကဵုလဝ်အခေါၚ် အ္စာပရိုၚ်ဂမၠိုၚ် သွက်ဂွံဂၠိုက်ဂၠါဲ သၟာပကီု ပရာပ် ပ္ဍဲကဵုသ္ၚိခါမ် မၞုံပ္ဍဲလာဟိုဝ်ဂှ်ရ။

Ref; CNA