ဗဒိုပ်ကံၚ်ဇြဳပၞာန် ကဵု ဗဒိုပ် BGF ပ္ဍဲၜဳကလေၚ် ဒးဒုၚ်ဗတိုက်ဒၟံၚ်အဆက်ဆက်

ၜဳကလေၚ်၊ မေ(၂၁)

တွဵုရးဍုၚ်မန် ပ္ဍဲပွိုၚ်ဍုၚ်ၜဳကလေၚ် ဗဒိုပ်ဒပ်ကံၚ်ဇြဳပၞန်ကဵု ဗဒိုပ်ဒပ်မၚ်ပယျဵုကရေၚ် BGF တအ်ဂှ် အကြာမွဲၜါတ္ၚဲဏံ အာစိုပ်ဗတိုက်လဝ် အဆက်ဟွံပိုတ်သ္ကုတ်တုဲ ပရေၚ်ဇီုကပိုက်ချိုတ်ဂျိုၚ် လ္ပာ်ကံၚ်ဇြဳပၞာန် နွံဒၟံၚ်ရဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဂိတုမေ စၟတ်တ္ၚဲ(၁၇) တုဲကၠုၚ်တေံ ပ္ဍဲပွိုၚ်ဍုၚ်ၜဳကလေၚ် ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဘာဗ္တောန်လိက်ကွာန်ဒံၚ်ရာပ်(ဒေါၚ်ရပ်)ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA အာပန်ပှော်လဝ် နကဵုလွဟ်ဇၞော်ရ။

ပ္ဍဲပရေၚ်ပန်ပှော်ဂှ် လ္ပာ်ကံၚ်ဇြဳပၞာန် ဗ္ဒာဲ (၁၅)တၠ ဇီုကပိုက်ဒးလဝ်ဘဲဝပ်နွံတုဲ ဟိုတ်နူလ္ပာ်ကံၚ်ဇြဳပၞာန် ကလေၚ်ပန်နၚ်လွဟ်ဇၞော် နူဒပ်အမၠံက်တုဲ ကောန်ၚာ်သၟတ်မွဲတၠကဵု ညးဗြဴနူကွာန်ဒံၚ်ရာပ်မွဲတၠ ဒးလဝ်ဘဲဝပ်ရ။

ပ္ဍဲဂိတုမေ စၟတ်တ္ၚဲ (၁၈) ဂှ်လေဝ် ဗဒိုပ် BGF ပ္ဍဲကွာန်ယေန်အုမ် ပွိုၚ်ဍုၚ်ၜဳကလေၚ်ကဵု ဗဒိုပ် BGF မေဝ်လာန်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် အာဗတိုက်လဝ်တုဲ လ္ပာ်ဒပ်ကံၚ်ဇြဳပၞာန် ဒးလဝ်ဘဲဝပ် (၃)တၠရ၊
သ္အာၚ်နူဂှ်ပၠန် ပ္ဍဲဂိတုမေ စၟတ်တ္ၚဲ (၁၉)ဂှ်လေဝ် ထပ်ဗတိုက်လဝ် သၞေဟ်ကၚ်လုပ်ဍုၚ်ၜဳကလေၚ်၊ သၞေဟ်ကၚ်စၟဳစၟတ် ဒဒန်ၜဳကလေၚ် ကေုာံ ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲဗ္ဒာဲကွာန်ဇြဳတဝ်ဂှ်တုဲ လ္ပ်ာကံၚ်ဇြဳပၞာန် ချိုတ်မွဲတၠတုဲ ဒးလဝ်ဘဲဝပ် မွဲတၠရ။

ပ္ဍဲပွိုၚ်ဍုၚ်ၜဳကလေၚ်ဂှ်မ္ဂး ပ္ဍဲဂိတုမေ စၟတ်တ္ၚဲ (၁၅) ကဵု (၁၆) တုဲကၠုၚ်တေံဂှ် အကြာဒပ်ကံၚ်ဇြဳပၞာန် ထ္ပက်စှ်ေကရောၚ်ပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်သ္ကာတ်မြဟ်လဝ်ကီု ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန်ဒးဂိလဝ်ရဂှ် ဂွံတီကေတ် အတိုၚ်တၚ်လလောၚ်တြး KNU ရ။

ပရိုၚ် -သြၚ်လောန်တိုၚ်(မ်)
ဗီုရုပ် -TPDF