သဓီု၊ မေ(၂၃)
တွဵုရးဍုၚ်မန်၊ ပွိုၚ်ဍုၚ်သဓီု၊ ပ္ဍဲဂၠံၚ်ဇၞော်လဂုၚ်-မတ်မလီု ကွာန်ကၟာသိုၚ်၊ ဂကောံကွာန်ဍုၚ်ဝါန်ဂှ် ဟိုတ်နူကွဳစက်ပ္ဍိုက်ညးအာတရဴမွဲဖ္ဍိုက် ဒးဒုၚ်တံၚ်ခတိုဟ်လဝ်မာၚ်တုဲ ညးအာတရဴ ဍိုက်ပါဗက်ကၠုၚ် ကွဳစက် (၃) တၠ ဒးလဝ်ဘဲဝပ်ရဂှ် ညးဒေသကီု သီုဂကောံရီုဗၚ်ဟံၚ်ပြာ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမေ စၟတ်တ္ၚဲ (၂၁) အခိၚ်ဗ္တံ ၜိုတ်(၁၀)နာဍဳဂှ် ကွဳစက်(မှန်လုံ) အဇာဍောတ် ဒဳကၠုၚ်နူလဂုၚ် အာလ္ပာ် ဗြဝတဳမွဲဖ္ဍိုက်ဂှ် ဒးဒုၚ်တံၚ်ခတိုဟ်လဝ်မာၚ် ပ္ဍဲဗ္ဒာဲကရပ်ကွာန်ကၟာသိုၚ်ရ။
ဟိုတ်နူဒးဒုၚ်တံၚ်ခတိုဟ်လဝ်မာၚ်တုဲ ဥူလှမေန်ထောန် အာယုက် (၄၉) သၞာံ၊ ဥူမျေတ်ဇြဝ် အာယုက် (၄၃)သၞာံ၊ ကိုဝ်အံၚ်မန် အာယုက် (၃၆) သၞာံတအ် ဒးလဝ်ဘဲဝပ်ညးသ္ကအ်ရ။
ပ္ဍဲကဵုဂှ် ဥူမျေတ်ဇြဝ် ဒးလဝ်ဘဲဝပ်သ္ကာတ်မြဟ်ဒၟံၚ်ဂှ် ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန် ခရိုၚ် သဓီုတုဲ သှ်ေညး (၂)တၠဂှ်မ္ဂး ပလံၚ်ဗစိုပ်လဝ် ရုၚ်ဂဥုဲတုၚ်ဇြုက်ရဂှ် ဂွံတီကေတ်ရ။
ပ္ဍဲအကံက်တေဝ်လဳဂရာမ်ဠဝ်ဗဳဒပ်ပၞာန်တအ်ဂှ် ဗော်သွးကောန်ဂကူကရေၚ် KNU ကဵု ဒပ်စဵုဒၞာ ညးဍုၚ်ကွာန် PDF တအ် တံၚ်ခတိုဟ်လဝ်မာၚ် ဗတိုက်လဝ် ကွဳစက်ညးအာတရဴရဂှ် ပရေၚ်တြးဒၟံၚ်ဝါဒ နွံရ။
ညးတာလျိုၚ် PDF ခရိုၚ်သဓီု ကိုဝ်ဨမေန်ထောန်ဂှ်မ္ဂး ပရေၚ်တံၚ်ခတိုဟ်မာၚ်ကွဳစက်ညးအာတရဴဂှ် ညးတအ်ကၠောန်သ္ပလဝ်ဟွံသေၚ်ကီု ပရောဒဒှ်လၟုဟ်ဏံ ဆက်ဂၠိုက်ဂၠာဲဒၟံၚ် သောဲသောဲဗြောဲဗြောဲ ဖိုဟ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုမာတ်ချ် စၟတ်တ္ၚဲ(၂၃) တုဲကၠုၚ်တေံလေဝ် ကွဳစက်ပ္ဍိုက်ဗၞိက် သၠာ (၁၂) ဟိုတ်နူဒးလဝ်မာၚ် ပ္ဍဲဗ္ဒာဲကွာန်ကၟာသိုၚ် ပွိုၚ်ဍုၚ်သဓီုတုဲ ညး (၂) တၠ ပါလုပ် သီုသၟာဒဳကွဳစက် ဒးလဝ်ဘဲဝပ်ရ။
ပ္ဍဲဂၠံၚ်ကွဳစက် လဂုၚ်-မတ်မလီုဂှ်မ္ဂး ကြဴနူဒပ်ပၞာန်သီအဝဵုတုဲ ဟိုတ်နူကွဳစက်ညးအာတရဴ ဒးဒုၚ်တံၚ် ခတိုဟ်ဒၟံၚ်မာၚ် ခြာဟွံလအ်ဟွံလအ်ကီု ဟိုတ်နူဒးဒုၚ်ပန်ဒၟံၚ်ကီုတုဲ ပရေၚ်ညးအာတရဴဂမၠိုၚ် ဇီုကပိုက်ဒးချိုတ်ကၠုၚ် နွံရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ

