သေတ်ဒနဳ၊ မေ(၂၁)
ကောန်က္ၜၚ်ရပ်လဝ်စၟတ်တဲကောန်က္ၜၚ်ကၟိန်ဍုၚ်ဗၟာ(Seaman Book) တအ်ဂှ် သ္ပတမ်နူ ဂိတုမေ စၟတ်တ္ၚဲ (၁) တုဲကၠုၚ်တေံတုဲ ဟွံကဵုအခေါၚ်လုပ်စိုပ် ဍုၚ်ဘရာဇြဳရဂှ် ဂွံတီကေတ်ရ။
ပွမဟွံကဵုအခေါၚ် ညးရပ်လဝ်စၟတ်တဲကောန်က္ၜၚ်ကၟိန်ဍုၚ်ဗၟာ (Seaman Book) လုပ်စိုပ်ဍုၚ်ဗီုဏံဂှ် ဒှ်အတိုၚ်သၞောဝ်ဥပဒေ ပရေၚ်ကောပ်ကာဲမၞိဟ်လုပ်တိတ် ဘရာဇြဳ မကလေၚ်လဟဵုလဝ်တၟိရဂှ် ဂကောံတၠကမၠောန် ရေၚ်တၠုၚ်ကဵုကောန်က္ၜၚ်တတ်ကၠောံၜဳ ကၟိန်ဍုၚ်ဗၟာ (MSESF) လလောၚ်တြးလဝ်ရ။
နကဵုကၟိန်ဍုၚ်ဘရာဇြဳ ၜိုန်ရဟွံသ္ပစၟတ်သမ္တီ စၟတ်တဲကောန်က္ၜၚ်ကၟိန်ဍုၚ်ဗၟာ(Seaman Book) နဒဒှ်တၞးလိက်လုပ်သၞောဝ်ကီုလေဝ် ယဝ်ရ စၟတ်တ္ၚဲ Seafarers Identity Document (SID) နွံမ္ဂး သ္ပကဵုအခေါၚ်ရောၚ်ဒှ်တုဲ ယဝ်စၟတ်တဲဟၟဲမ္ဂး ဒးပ္တိုန်အာတ် Visa ပ္ဍဲရုၚ်ကလုတ်တမာန်ကၟိန်ဍုၚ်ဗၟာ မၞုံဍုၚ်ဘရာဇြဳရောၚ်ဂှ် ဂွံတီကေတ်ရ။
ဟိုတ်ဂှ်ရ နကဵုကာန်ထရိုက်တာ၊ တၠကာန်ထရိုက်တာ ကေုာံ တၠက္ၜၚ် မပါလုပ်သီုကောန်က္ၜၚ် ကၟိန်ဍုၚ်ဗၟာ စိုပ်ကၠုၚ် ဍုၚ်ဘရာဇြဳ နကဵုက္ၜၚ်တအ်ဂှ် ဒးဒုၚ်တပ်ဒဏ်တုဲ ပရေၚ်ဒးဒုၚ်ကလေၚ် ပလံၚ်ဖျဴဌာန်ဒၟံၚ် ဒးဆဵုဂဗကၠုၚ်မာန်ရောၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံတၠ ကမၠောန်ရေၚ်တၠုၚ်ကဵုကောန်က္ၜၚ်တတ်ကၠောံၜဳ ကၟိန်ဍုၚ်ဗၟာ((MSESF)ရ။
သ္အာၚ်နူဂှ်ပၠန် နကဵုကောန်က္ၜၚ်ကၟိန်ဍုၚ်ဗၟာဂမၠိုၚ် ယဝ်တၞးလိက်ကၠောန်ကမၠောန် အာယုက်အိုတ်ဒၟံၚ်မ္ဂး အတိုၚ်သၞောဝ်ဥပဒေဗလးဍာ်ကၟိန်ဍုၚ်နာနာ လ္တူနူကာလကဵုလဝ်အခေါၚ်ဂှ် ယဝ်နွံပၟိက် မိက်ဂွံထပ်မံၚ်မ္ဂး ဒးဆက်မံၚ် ပ္ဍဲလ္တူက္ၜၚ်ဟေၚ်တုဲ အခေါၚ် ဂွံတိုန်ဒၟံၚ်ပ္ဍဲလ္တူသြၚ်ဟၟဲရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး (MSESF)ရ။
ရုၚ်ကလုတ်တမာန်ကၟိန်ဍုၚ်ဗၟာ ပ္ဍဲဘရာဇြဳဂှ်မ္ဂး နကဵုကောန်က္ၜၚ် ရပ်လဝ်စၟတ်တဲ ကောန်က္ၜၚ်ကၟိန်ဍုၚ်ဗၟာ (Seaman Book)တအ် ယဝ်မိက်ဂွံလုပ်ဍုၚ်ဘရာဇြဳ ဗွဲမလုပ်သၞောဝ်မ္ဂး ဒးပ္ညဳပ္ညပ်ဆက်စၠောံကဵု ညးပိုၚ်အဝဵုအာဏာဘရာဇြဳတအ်ရောၚ်ဂှ် လလောၚ်တြးလဝ်ရ။
အခိၚ်လၟုဟ်ဏံ နကဵုရုၚ်ကလုတ်ဗၟာ မၞုံဘရာဇြဳဂှ်မ္ဂး ပရေၚ်ပ္ညဳပ္ညပ်ကဵု မမိက်ကဵုမွဲမွဲဟၟဲတုဲ ပြဝဍုၚ်ဘရာ ဇြဳပိုၚ်ခြာကၠုၚ်ဗီုလၟုဟ်ဏံဂှ် ဒှ်ဖိုလ်အဆက် ပရေၚ်ဒပ်ပၞာန်သီအဝဵုရဂှ် ကောန်က္ၜၚ်ကၟိန် ဍုၚ်ဗၟာဂမၠိုၚ်ဟီုသ္ဂးလဝ်အိုတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- MSESF

