ထာန်တပေန်၊ မေ (၂၃)
အပ္ဍဲပွိုၚ်ဍုၚ်ထာန်တပေန် ရးဒေသဇၞော်ဗဂေါဂှ် ဟိုတ်နူပွဖံက်ပ္ကဝ်အခေါၚ်အရာမၞိဟ် ကေုာံ ပွချဳဒရာၚ်ရေၚ်တၠုၚ် ဒပ်ကံၚ်ဇြဳပၞာန်တံဂှ်တုဲ သွက်ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် (၂၅၀၀၀) ပြၚ်ဂှ် နွံပၟိက်ဒၟံၚ် အရီုဗၚ်ပရေၚ်ဗ္စာရဏာမၞိဟ်ရောၚ် ဂကောံဒပ်စဵုဒၞါညးဍုၚ်ကွာန်တံ လလောၚ်ပ္တိတ်လဝ် နကဵုစၟတ်တ္ၚဲ ဂိတုမေ (၂၂) တေံရ။
ကြဴနူကံၚ်ဇြဳပၞာန် လလောၚ်တြး ကုပွိုၚ်ဍုၚ်ထာန်တပေန် နဒဒှ်တိဍာ်ပရေၚ်အုပ်ဓုပ်ပၞာန်တုဲဂှ် ဒပ်ကံၚ်ဇြဳပၞာန် ဟိုတ်နူစွံပွန်ဗ္တိုက်ကၠုၚ် လ္တူညးဍုၚ်ကွာန် မၞုံအပ္ဍဲဒေသတံ သ္ကာတ်တ်မြဟ်ဟ်ဂှ်ရ ညးဍုၚ်ကွာန်ဒေသ (၂၅၀၀၀) ပြၚ် နူကဵုကွာန် ၂၀ ကွာန်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ်ဝွံ အခိၚ်ပါဲဒဴဘဲပၞာန် လအ်ကၠုၚ်ဗက် နွံပၟိက်ကၠုၚ် ဇွောံမစၞစ၊ ဂဥုဲဇဗ၊ ဖ္ဍာန်ဗ္ဒၚ်၊ ဒၞါဲမံၚ်စံၚ်တံဒှ်တမ် စဵုကဵုအရီုဗၚ်ပရေၚ်ဗ္စာရဏာမၞိဟ် ကာမံက်တိုန်ရောၚ်ဂှ် သ္ဂးရ။
ဟိုတ်ဂှ်ရ နကဵုညးဍုၚ်ကွာန် နူအပ္ဍဲဍုၚ်၊ မ္ၚးဍုၚ်ဂမၠိုၚ် သွက်ဂွံဘိုၚ်ရီုဗၚ် ညးဍုၚ်ကွာန်ပါဲဒဴဘဲပၞာန် တံအိုတ်ဂှ်ကီု၊ ကုညးမဆုဲပြံၚ်မံၚ်စံၚ်တံဂှ် ညးဒေသတံ သွက်ဂွံရီုဗၚ်မၚ်မွဲကဵု ဗွဲမဒးရးဂှ်ကီု၊ ပွမသၠုၚ်ပ္တိုန်ၚုဟ်သ္ၚိတံ၊ သၠုၚ်ပ္တိုန်ၚုဟ်ဖျာတံဂှ် လ္ပကၠောန်သ္ပအိုတ်ညိဂှ် ထာန်တပေန် (ပကဖ) လလောၚ်ပ္တိတ်လဝ်ရ။
ဒေသ ဇြယိတ်ကျဳ ပွိုၚ်ဍုၚ်ထာန်တပေန် မစုက်ဒၟံၚ်ကဵုတွဵုဒၞက် ပွိုၚ်ဍုၚ်ကျံက်ကျဳ KNU တံဂှ် ဒပ်ကံၚ်ဇြဳပၞာန် ပန်ပှော်ဂြာတ်ကဵုမခတိုဟ် နကဵုက္ၜၚ်ကျာသၞေၚ်ဝဲ၊ က္ၜၚ်ကျာဗ္တိုက်တံဂှ်တုဲ ပန်ပှော်စုတ် လွဟ်ဇၞော် အပ္ဍဲကွာန်တံ ကြာန်န်ဂှ်ကီု ကေုာံ ပစူမာၚ်ဖံက်ဗ္တိုဟ်တံဂှ် ကၠောန်သ္ပဒၟံၚ် ဂၠိုၚ်ၚ်ကဵုဝါရောၚ် ပါလုပ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန်ဝွံ သုၚ်စောဲဇြဟတ်ဗွဲမဂၠိုၚ်ဂၠေၚ်တုဲ လုပ်စိုပ်ဖျေံဒပ် ပ္ဍဲစမြိုၚ်သာသနာ ကေုာံ ဒၞါဲစပ်ကဵုညးဂမၠိုၚ်တံဂှ်တုဲ သုၚ်စဗၜူဒလူဒၟံၚ်ဂှ်ကီု၊ ပလီုပလာ် ကပေါတ်ကညောတ်တံ ကေုာံ ကေတ်ဏာတံဂှ် ကၠောန်သ္ပဒၟံၚ်ရောၚ် ထာန်တပေန် (ပကဖ) သ္ဂးရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ပ္ဍဲအရာထ္ပက်ကရောၚ်ပၞာန်တံဂှ် တတ်ကွာ် အပ္ဍဲခံက်ဝါဗ္ၚ စဵုကဵုခံက်သြောံ လီုလာ်အာဂှ်ကီု၊ ပ္ဍဲကဵုဂၠံၚ်အာကလောန် အပ္ဍဲဂြိုပ်တံဂှ် ကၠောန်သ္ပပစူလဝ်မာၚ်တံ နွံတုဲ သ္ၚိဒၟံၚ် ကေုာံ ဆေၚ်ဖျာ မၞုံအပ္ဍဲကွာန်တံဂှ် လုပ်စိုပ်ကၠတ်ဂၠံက်တုဲ ကေတ်ဏာဇွောံမစၞစ၊ ဂၠိက်ယာတ်၊ ကပေါတ် အရပ်စပ်မၞိဟ်တံဂှ်ကီု၊ ရပ်ဂစိုတ်တိရစ္ဆာန်သ္ၚိတံတုဲ စသုၚ်ကေတ်ဏာတံဂှ် ကၠောန်သ္ပဒၟံၚ်နွံရောၚ် ပါလုပ် ပ္ဍဲတၚ်လလောၚ်တြးဂှ်ရ။
တုဲကၠုၚ် ပ္ဍဲဂိတုမေ (၁၁) တေံဂှ်လေဝ် အပ္ဍဲကွာန်ညံၚ်ပေန်တာ၊ ပွိုၚ်ဍုၚ်ထာန်တပေန်ဂှ် လၟေၚ်ဒဒှ် ဒပ်ကံၚ်ဇြဳပၞာန် စံၚ်ယတ်ပြိုက်ဂစိုတ်လဝ် မၞိဟ် (၂၀) တၠ ပါလုပ်သီုကဵုကောန်ၚာ်၊ ညးဗြဴ၊ မၞိဟ်ဇၞော်ဇၞော် ကေုာံ သီုကဵုမၞိဟ်ယဲ နကဵုဂအုံဗွဝ်ဂှ် က္တဵုဒှ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ

