ပံၚ်၊ မေ (၂၃)
ပ္ဍဲတွဵုရးဍုၚ်မန် ပွိုၚ်ဍုၚ်ပံၚ် ကွာန်ဖလာန် လ္တူဂၠံၚ်လ္ဂုၚ်−မတ်မလီုဂှ် ပ္ဍဲဂိတုမေ (၂၂) အခိၚ်ပယျာံနူဂယး သမ္ဘာတၠသ္ၚိညးၜါတၠ မစဴကၠုၚ် နူကဵုဝိုၚ်ဝေၚ်ဂှ် ဒးဒုၚ်ပန်ဂစိုတ်ကဵု သေနာတ်တုဲ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်နူဂယး ၜိုတ် (၃) နာဍဳ နူကဵုဝိုၚ်ဝေၚ်အာဝါဒေ ဍုၚ်ဇိုၚ်ကျာ်ဂှ် ဥူမျေတ်လွေန် အာယုက် ၄၉ ကဵု သမ္ဘာညး ဒဝ်ခေန်သဳတာထောန် အာယုက် ၄၇ သၞာံ ညးၜါတၠ မစဴကၠုၚ် နကဵုကွဳလိုန်ဓာတ်ဂှ်ဝွံ ဒးဒုၚ်ပန်ဂစိုတ်ကဵု သေနာတ်တုဲ ဒေါမ်ချိုတ်ဒၟံၚ် လ္တူဂၠံၚ်ဂှ်ရ။
ဟိုတ်နူဒးဒုၚ်ပန်ဂစိုတ်လဝ် ကဵုသေနာတ်ဂှ်ရ ဥူမျေတ်လွေန်ဂှ် ကလိဂွံလဝ်ဝပ် မကမ်ကၠိုဟ်လုပ်အာ မတ်လ္ပာ်ပုၚ်ဂှ်မွဲလ္စုတ်၊ သၟဝ်တဲလ္ပာ်ပုၚ်ဂှ် (၂) လစုတ်၊ ဒဝ်ခေန်သဳတာထောန်ဂှ် ကလိဂွံဝပ်မကမ် ကၠိုဟ်လုပ် ပ္ဍဲကအ်ဂှ်မွဲလစုတ်၊ ပ္ဍဲမတ်လ္ပာ်ပါ်ဂှ်မွဲလစုတ်ဂှ်တုဲ ချိုတ်အာလဝ် ပ္ဍဲကဵုဒၞါဲဂှ်ရ။
အတိုၚ်ဂလာန်ညးဒေသတံဂှ်မ္ဂး သမ္ဘာတၠသ္ၚိ မဒးဒုၚ်ပန်ပှော်လဝ် နကဵုသေနာတ် (၂) တၠဂှ်ဝွံ ဒှ်ဒေၚ်ဝိုၚ်ဝေၚ်ဏောၚ်ဟီုဒၟံၚ်ကီုလေဝ် လ္တူလၟေၚ်ဒဒှ်ချိုတ်ဏံဂှ် နကဵုသြၚ်လောန်တိုၚ်(မ်) သ္ပဒတန်ဟွံမာန်ဏီရ။
သမ္ဘာတၠသ္ၚိ (၂) တၠ မချိုတ်အာဂှ်ဝွံ နကဵုအရီုဗၚ်ညးဒေသတံဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ပံၚ်ဂှ် ဂွံတီကေတ်ရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် သမ္ဘာတၠသ္ၚိၜါတၠဏံဂှ် နူကဵုဂကောံဒပ်စဵုဒၞါ ညးဍုၚ်ကွာန်တံ ပန်ဂစိုတ်ဏာလဝ်ရောၚ် သာ်ဝွံ တြးဒၟံၚ်ဝါဒတံ နွံဒၟံၚ်ရ။
ဝိုၚ်ဝေၚ်အာဝါဒေ ဍုၚ်ဇိုၚ်ကျာ်ဂှ်ဝွံ ကြဴနူဒပ်ပၞာန်သီအဝဵုတုဲ ပံက်လဝ် နကဵုအခေါၚ်ကောန်ဂကောံ ဒပ်ကံၚ်ဇြဳပၞာန်တံဂှ်တုဲ ကၠောန်သ္ပဝေၚ်လံၚ်ဒၟံၚ် ဂၠိုၚ်ကဵုလ္ၚီကိုဋ် နွံဒၟံၚ်ရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်− SBM
sanlontai