ဒပ်ကံၚ်ဇြဳပၞာန် ထပ်ကၠောန်သ္ပ ပလီုကၠုၚ် ဂၠံၚ်ဍာန်ညးဍုၚ်ကွာန် မရပ်စပ်စကာဂမၠိုၚ်

ကျာ်ထဝ်၊ မေ (၂၃)

ပွမပလီုပလာ် ဂၠံၚ်ဍာန်ညးဍုၚ်ကွာန်တံရပ်စပ်စကာ ပ္ဍဲတွဵုရးဍုၚ်မန်ကဵု တိဍာ်အုပ်ဓုပ် ဗော်သွးကောန်ဂကူကရေၚ် KNU တံဂှ် ဒပ်ကံၚ်ဇြဳပၞာန် ကၠောန်ၜိုတ်ကၠုၚ် အဆက်က်ရောၚ် ညးဒေသတံ ကေုာံ ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ အပ္ဍဲအကြာတ္ၚဲတံဏံ ဂၠံၚ်ဆက်လဝ် ကွာန်သံၚ်နာၚ်ကျဳ ကေုာံ ကွာန်ကေန်မန်ချံၚ် ဇိုၚ်ဒဵုကျာ်ဣသိယဵု ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ်ကီု၊ ဂၠံၚ်လုပ်ကွာန်ဝေန်ကလဝ်၊ ဂၠံၚ်ကွာန်အေၚ်္ဂဗိုလ်−ကွာန်မေဝ်ယုၚ်လေဝ်တံဂှ် တုက်ကဵုကာတုက်တိတုဲ ကၠုၚ်စိုပ်ပလီုပလာ်လဝ်ရ။

တုဲကၠုၚ် ပ္ဍဲဂိတုမေ (၁၄) တေံဂှ်လေဝ် ပ္ဍဲကဵုခရိုၚ်ဒူပလာယာ ဒပ်မဟာ (၆) ဂၠံၚ်ဆက်လဝ် ဍုၚ်ကအ်ကြိက်−လှာဒကှ်ဂှ်ကီု၊ ဂၠံၚ်လုပ်ကွာန်(တောၚ်ကြာအၚ်း) ၊ ဂၠံၚ်ကအ်ကြိက်−ကျာ်ဍုၚ်၊ ဂၠံၚ်ကမိုၚ်ကုန် ပွိုၚ်ဍုၚ်ကအ်ကြိက်တံဂှ် ၜံက်ကဵုကာတုက်တိ ပလီုပလာ်လဝ်တုဲ ဗာ်ဗဒေါမ်လဝ်တၞံဆု ကၟာတ်လဒဵုလဝ်တံဂှ် ကၠောန်သ္ပလဝ်ရ။

ဒပ်ကံၚ်ဇြဳပၞာန် ကၠောန်သ္ပပလီုပလာ်လဝ် ဂၠံၚ်ညးဍုၚ်ကွာန်ဂမၠိုၚ်ရပ်စပ်သုၚ်စောဲဂှ်ဝွံ ဒှ်ပြဝကဵုဒဒိုက် လ္တူညးဍုၚ်ကွာန်ဂမၠိုၚ် နကဵုတၚ်ရန်တၟံနွံနွံရောၚ်ဂှ် ညးမၞုံအခေါၚ်ဟီုဂး KNU ပဒိုဝ်သဝ်ဂလာသေ ပါ်ပါဲလဝ်ရ။

“ကိစ္စဂၠံၚ် မၞုံလ္ပာ်ကအ်ကြိက်တံဂှ်တှ်ေ ပိုယ်တံကၠိုဟ်လဝ်ဂှ် ညအ်ဂှ် ဒှ်ဂၠံၚ်ညးဍုၚ်ကွာန်ဂမၠိုၚ် သုၚ်စောဲမွဲဏောၚ်။ ဟိုတ်ဂှ်ရ ဂၠံၚ်ဇၞော်ညးဍုၚ်ကွာန်ဂမၠိုၚ် ရပ်စပ်ဒၟံၚ်သာ်ဏံဂှ် ညံၚ်သုၚ်စောဲဂွိုအ်ဂွံ ဍေံတံကၠောန်လဝ်ဟီုတှ်ေ ညအ်ဂှ် စွံပွန်ကဵုညးဍုၚ်ကွာန်တံ အဓိကတုဲ နကဵုတၚ်ရန်တၟံနွံနွံ ဒှ်ပြဝကဵုဒဒိုက်ညးဍုၚ်ကွာန်တံရောၚ်ဂှ် ပိုယ်တံ ညာတ်သာ်ဏံရ” သာ်ဝွံ ပဒိုဝ်သဝ်ဂလာသေ ဟီုရ။

ဟိုတ်နူဒပ်ကံၚ်ဇြဳပၞာန် ပလီုပလာ်လဝ် ဂၠံၚ်ဍာန်ညးဍုၚ်ကွာန်ဂမၠိုၚ် မရပ်စပ်စကာဂှ်ရ ညးဍုၚ်ကွာန်ဒေသဂမၠိုၚ်ဝွံ ဂၠံၚ်တရဴသွံရာန်ဗၞိက် စပ်ကဵုပရေၚ်စသုၚ်မံၚ်စံၚ်၊ ပရေၚ်အာကၠုၚ်တရဴတံဂှ် ဒးဒုၚ်ကၟာတ်လဒဵုထောံတုဲ သွက်ဂွံအာကၠုၚ် ရုၚ်ဂဥုဲ သွက်ကိစ္စပရေၚ်ထတ်ယုက်ကာမံက်တိုန်တံဂှ် သ္ကဵုက္တဵုဒှ်တဴ အခက်အခုဲနာနာသာ်ရောၚ် ညးဒေသတံ သ္ဂးအိုတ်ရ။

ညးဒုၚ်တာလျိုၚ် PDF ခရိုၚ်သဓီု ကိုဝ်ဨမေန်ထောန်ဂှ် ဒပ်ကံၚ်ဇြဳပၞာန် ပလီုပလာ်ဒၟံၚ် ဂၠံၚ်ဍာန်ညးဍုၚ်ကွာန်ဂမၠိုၚ် မရပ်စပ်စကာတံဂှ်ဝွံ ကၠောန်သ္ပလဝ် ထပိုတ်ပန်ထပိုတ် မိက်သ္ဂောံကဵုညးဍုၚ်ကွာန်တံ ဇီုကပိုက်တံဂှ်တုဲ ပလေဝ်ပလေတ်လဝ်ပၞာန်ဒုၚ် လ္ပာ်ဍေံတံရောၚ် ဟီုရ။

“ဍေံတံ ကၠောန်ပၞာန်ဒုၚ်ဏောၚ်၊ ကၠောန်ထပိုတ်ပန်ထပိုတ်ဏောၚ်။ ကွာန်မၞုံဒၟံၚ်လ္ပာ်တံဏံဂှ် ဍေံတံ ထပိုတ်ဇွောံမဏောၚ်။ အရာဍေံတံကၠောန်လဝ်တံဏံဂှ် ညးဍုၚ်ကွာန်တံရ ဇီုကပိုက်ဏောၚ်။ ဒှ်ဒၟံၚ်ဗီုပြၚ် ရန်တၟံလဝ် သွက်ညးဍုၚ်ကွာန်တံ ဂွံဇီုကပိုက်ရဏောၚ်။ ညးဍုၚ်ကွာန် နူကဵုကွာန်သြၚ် လ္ပာ်တေံဂမၠိုၚ် ဂၠံၚ်တံဏံကၟာတ်အာဏောၚ်မ္ဂး ဒးဟီုအိုတ်တ်တှ်ေ ဟိုတ်နူဂကောံဇြဟတ်ပၠန်ဂတးတံ၊ EAO တံတုဲ ဒှ်အာဏောၚ် ညံၚ်ဂွံညာတ်သာ်ဏံဂှ် ကၠောန်လဝ်ဗီုပြၚ်ဏံရ” သာ်ဝွံ သ္ဂးရ။

ဒပ်ကံၚ်ဇြဳပၞာန်ဝွံ ကြဴနူဒပ်ပၞာန်သီအဝဵုတုဲ သုၚ်စောဲမဟာဗျူဟာ ထပိုတ်ပန်ထပိုတ်တုဲ ပွမပန်ပှော် လွဟ်ဇၞော် လ္တူကွာန်ဂမၠိုၚ်ကီု၊ ကၟာတ်ဂၠံၚ်ကီု၊ ထပိုတ်ပရေၚ်ဆက်စၠောံတံကီုဂှ် ကၠောန်သ္ပဒၟံၚ်ရောၚ် ပ္ဍဲဂိတုတုဲကၠုၚ်တေံ KNU လလောၚ်ပ္တိတ်လဝ်ရ။

ရုၚ်သၟိၚ်ဇၞော်စပ်ကဵုအခေါၚ်အရာမၞိဟ် ကုလသမဂ္ဂဂှ်လေဝ် ဒပ်ပၞာန်ဗၟာဝွံ ညံၚ်ညးဍုၚ်ကွာန်ကောန် အရာပ်တံ ဂွံဒှ်သ္ၚိဌာန်ဟွံမွဲဂှ် ပလီုပလာ်ကွာန်တံကီု၊ တာဒၞါ ညံၚ်ကဵုအရီုဗၚ်ပရေၚ်ဗ္စာရဏာမၞိဟ်တံ ဟွံဂွံဂှ်ကီု၊ ဂကောံရပ်လွဟ် မဗ္တိုက်ဒၟံၚ် ကုဒပ်ပၞာန်တံ ညံၚ်ပကောံပကေဝ် စၞစ၊ အထံက်အပၚ်သြန်၊ ပရိုၚ် ကေုာံ ကောန်ဒပ်တၟိတၟိတံ ဟွံဂွံဂှ် ရပ်စပ်လဝ် သၞောတ်ထပိုတ်ပန်ထပိုတ်ဂှ်ရောၚ် ပ္ဍဲဂိတုဖေဖဝ်ဝါရဳ သၞာံတုဲကၠုၚ်တေံ လလောၚ်ပ္တိတ်လဝ် လိက်ဒုၚ်စဳရေၚ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−CJ