ဃောလုပ်ဒၟံၚ်ပေါဲဗတိုက် သွက်ပရေၚ်ဗၠးၜးကောန်ဂကူဂှ် အာဇာနဲ ဒးပူဇဴဏာလဝ်လမျီု (၃၂) တၠ နွံကၠုၚ်ရဂှ် CNO လလောၚ်တြး

ဟာခါ -မေ(၂၃)

ကြဴနူက္လေၚ်ဒက်ပ္တန်ကၠုၚ် ဂကောံဗော်ကောန်ဂကူချေၚ်/ဒပ်စဵုဒၞာကောန်ဂကူချေၚ် (CNO/CNDF) မွဲကရောံမွဲစွံကဵု ပရေၚ်ပၠန်ဂတးက္ညၚ်တုဲ ဃောယိုက်ဂၠေၚ်ဒၟံၚ်တာလျိုၚ်ဂကူ ညးဒးဒုၚ်ပူဇဴဏာလမျီု စဵု (၃၂)တၠ နွံကၠုၚ်ရဂှ် CNO လလောၚ်တြးလဝ် ပရိုၚ်ရ။

သွက်ဂွံသ္ပစၟတ်သမ္တီပ္တိုန်ဂုဏ်စရာဲ ညးပူဇဴဏာလမျီု သွက်ပရေၚ်ကောန်ဂကူ နူဂကောံရပ်လွဟ်နာနာ ပ္ဍဲတွဵုရးချေၚ်ဂမၠိုၚ်ကီု၊ ညးပူဇဴဏာလဝ်လမျီု နူၝောံဍုၚ်ဒဵုရေၚ် အာဇာနဲကောန်ဂကူချေၚ် ကၠာနူဂကောံ ရပ်လွဟ်သွက်ပရေၚ်ပၠန်ဂတးက္ညၚ် ဟွံမံက်ကၠုၚ်ဏီတအ်ဂှ် ဂကောံဗော်ကောန်ဂကူချေၚ် စၟတ်သမ္တီ လဝ် ဂိတုမေ စၟတ်တ္ၚဲ (၂၁)ဂှ် နဒဒှ်တ္ၚဲအာဇာနဲကောန်ဂကူချေၚ်ရ။

သွက်ဂွံပ္တိုန်ဂုဏ်စရာဲ အာဇာနဲကောန်ဂကူချေၚ် ဒးပြဟ်လလုဲလဝ် အခိၚ် တ္ၚဲ ဟွံတုပ်သၟဟ်ညး သ္ကအ်တအ် မွဲစွံဂှ် ဒုၚ်သ္ဇိုၚ်ကဵု ဂိတုမေ စၟတ်တ္ၚဲ (၂၁) သၞာံ ၂၀၂၁ တ္ၚဲညးဒးဒုၚ်သၠးဏာလမျီု နူဒပ်စဵုဒၞာကောန်ဂကူချေၚ် (အလန်ကိုပ်ကၠာအိုတ်) တုဲ စၟတ်သမ္တီကေတ် တ္ၚဲအာဇာနဲကောန်ဂကူချေၚ်ရ။

ပ္ဍဲတ္ၚဲအာဇာနဲကောန်ဂကူဂှ် ပ္ဍဲတိဍာ်ဂကောံဗော်ကောန်ဂကူချေၚ် အုပ်ဓုပ်လဝ်တအ်ဂှ် စၟတ်သမ္တီ တ္ၚဲကၟာတ်ရုၚ်ကီု၊ ဗလးဖျဝ်ဖျေံအလာံ ကဝက်တိုၚ်အလာံကီု၊ ကၠောန်ဗဒှ် ပေါဲဗှ်ဗၞုဟ်ရာဒၞာကီု၊ ရန်တၟံကဵုအာဇာနဲပြဟ်လလုဲတုဲ ပ္အပ်ပြာပ်ကဵုအာသြန် ကံက်ဂွံလဝ်တအ်ကီု သီုသ္ပရှ်ေသှ်ေ အာဇာနဲပြဟ်လလုဲဂမၠိုၚ် ကၠောန်ဗဒှ်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

နကဵုဂကောံဗော်ကောန်ဂကူချေၚ်/ဒပ်ပၞာန်စဵုဒၞာကောန်ဂကူချေၚ် (CNO/CNDF) တအ်လေဝ် သွက်ပရေၚ်ဗၠးၜးကောန်ဂကူချေၚ်၊ သွက်ပရေၚ်ကဆံၚ်တုပ်သၟဟ်၊ သွက်သ္ဂောံက္လိဂွံ အခေါၚ်ပျး ဌာန်ဇကုဇကုဂှ် ဒဒှ်ရဆက်ယိုက်ဂၠေၚ်အာ နကဵုအသိၚ်ဒမြိပ် အဆက်ဟွံပိုတ်သ္ကုတ်ရောၚ်ဂှ် သ္ပလဝ်ကတိသစ္စာရ။

ပရိုၚ်-သြၚ်လောန်တိုၚ်(မ်)

ဗီုရုပ် – CNO