မူဝါဒပရေၚ်ဍုၚ်ဗၟာ လၟောဝ်သ္ကိုပ်ဝန်ဇၞော်ဍုၚ်သေံဂှ် မူရဴသာ်လဵုမွဲ စၟဳစဂွံမာန်ရော

မာဲချံက်၊ မေ (၂၃)

စပ်ကဵုပရေၚ်ဍုၚ်ဗၟာတုဲ မူဝါဒမ္ဒးပ္ညဳပ္ညပ်ကဵု ဂကောံဇြဟတ်ပၟိက်ဇၞော်ဂမၠိုၚ်တုဲ မ္ဒးသ္ပအာရီုကဵု ပရေၚ်ဂီုကၠီု ဘဝကောန်မၞိဟ်တံ နွံဒၟံၚ်ဂှ် က္ဍိုပ်သ္ကိုပ်ဗော် Move Forward လၟောဝ်သ္ကိုပ်ဝန်ဇၞော်ဍုၚ်သေံ မဂွံဇၞး လဝ်ပေါဲရုဲမာဲ ပဳတာလေမ်ဂျာရိုဝ်ရက် ဟီုပ္တိတ်ကၠုၚ် ပ္ဍဲဂိတုမေ (၂၁) တေံရ။

ပ္ဍဲကဵုမူဝါဒ မဒုၚ်သ္ဇိုၚ်ကဵု ပရေၚ်ဂီုကၠီုဘဝကောန်မၞိဟ်ဂှ် လ္ပာ်ပရေၚ်ဗ္စာရဏာမၞိဟ်၊ လ္ပာ်ပရေၚ် တောတက် စပ်ကဵုဂီုကၠီုဘဝ ပရေၚ်ပိုန်ဒြပ်တံ ပါလုပ်ဂှ် ထ္မံက်ထ္ၜးလဝ် ပ္ဍဲကဵုအကံက် ဇာဇၞိက်ပရေၚ်မၞိဟ် Twitter ညးရ။

ပ္ဍဲပရေၚ်ထ္မံက်ရုပ်ရဴ မူဝါဒဂှ်ဂှ် ဍုၚ်သေံ−ဍုၚ်ဗၟာၜါဍုၚ်၊ အာဇြဳယာန်တံသၟးဟွံက သီုသွက်ဗွိုၚ်ဍုၚ် သ္အာၚ်တံဂှ် နကဵုလညာတ် သ္ကဵုဂွံနွံကဵု ပရေၚ်ၜိုဟ်လလမ်ရေၚ်သ္ကအ် ကေုာံ ပရေၚ်ၜိုဟ်သြိုဟ်သာယာ တံဂှ်တုဲ ထ္မံက်အာရုပ်ရဴဏောၚ်ဂှ် သ္ဂးရ။

ညးဍုၚ်ကွာန်ဍုၚ်ဗၟာ မ္ဒးလဝ်ဘဲဒဏ်လဗိုတ်ကျာ မၞုံပၟိက်ဒၟံၚ်အရီုဗၚ် စပ်ကဵုပရေၚ်ချိုတ်ဂျိုၚ်တံဂှ် ဒးကဵုအထံက်အပၚ် နဒဒှ်မဂၞန်မွဲဏောၚ်ဂှ် ပဳတာလေမ်ဂျာရိုဝ်ရာတ် အာတ်မိက်လဝ် အလဵုအသဳသေံ ကေုာံ ဍုၚ်သ္အာၚ်တံ နဒဒှ်မူဝါဒကာဍုၚ်သ္အာၚ်တၟိရ။

ဒဝ်ခေန်ညုၚ်တေတ် မဒှ်ညးချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳ သီုကဵုဒှ်ကောန်ထံၚ် ပရေၚ်ဍုၚ်ကွာန်တြေံမွဲတၠဂှ် ယဝ်ရဗော် Move Forward ဒှ်ကၠုၚ်အလဵုအသဳမ္ဂး ကဵုကၠုၚ်ဇြဟတ်ဂရိုဟ် လ္တူဒပ်ပၞာန်ဗၟာ နကဵုပရေၚ်ဍုၚ်ကွာန်နွံမာန်တုဲ သွက်ညးမ္ဒးစ္ၜုဲစ္ၜော်အာတ်မံၚ်ဒၟံၚ်တံ ပရေၚ်မံၚ်စံၚ်ညံၚ်ဂွံပြေပြံၚ် ကၠောန်ကဵုမာန်ကီုလေဝ် စပ်ကဵုပရေၚ်ဍုၚ်ဗၟာတုဲ စၟဳစဂၠိုၚ်ၚ်ဟွံဂွံပုဟ်ဂှ် သ္ၚဳဂၠိပ်လဝ်ရ။

“နကဵုပရေၚ်ဍုၚ်ကွာန် ကဵုကၠုၚ်ဇြဟတ်ဂရိုဟ်တံ ကၠောန်ကၠုၚ်မာန်ဏောၚ်။ တုဲပၠန် ညးဒဒိုက်မ္ဒးစ္ၜုဲ စ္ၜော်ဒၟံၚ် ပ္ဍဲဍုၚ်သေံ၊ ညးပါဲဒဴဘဲပၞာန် ကံၚ်ဇြဳပၞာန်ဗက်ရပ်ဒက်တုဲ မ္ဒးဂြိပ်တိတ်ကၠုၚ်တံ၊ တုဲပၠန်ရဲသ္ပလဝ် ဇြဳဒဳအာမ်တံဂှ် လ္တူနူကဵုဏံ မံၚ်စံၚ်ပြေပြံၚ်ကၠုၚ်ညိအိုတ်ဏောၚ်။ ဗၞတ်ၜိုတ်ဏံ ဒှ်ကၠုၚ်မာန်ဏောၚ်။ ၜိုန်ဂှ်ကီုလေဝ် ဗီုညးဂမၠိုၚ်စၟဳစဒၟံၚ် ကဵုအာဇြဟတ် ကုပရေၚ်ဍုၚ်ဗၟာ အိုတ်အစောံဏောၚ်ဂှ် ဟွံသေၚ်ပုဟ်။ မုဒှ်ရောဟီုမ္ဂး ပ္ဍဲကဵုဍုၚ်ညးတံဂှ်လေဝ် တၚ်နွံပၟိက်ကောန်ဍုၚ်ညးတံ နွံဒၟံၚ်ဏီ၊ တုဲပၠန် ဒတုဲဖဵုသွက်ဍုၚ်ညးတံလေဝ် နွံဒၟံၚ်ဏီဏောၚ်။ အေ ဂှ်တှ်ေ ဍုၚ်လဵုဟွံဟီု ဒတုဲဖဵုဍုၚ်ညးတံဂှ် ဒှ်မဂၞန်မွဲ၊ အရာဏံတုဲမှဟေၚ် ချပ်အာ ဗီုလဵုဂွံဆက်ဆောံ ဍုၚ်ညးတၞဟ်ရော၊ ဂွံထံက်ပၚ်ဆက်ဆောံ ကုညးဂှ်ရောတံဏောၚ်” သာ်ဝွံ ညးသ္ဂးရ။

ပဳတာလေမ်ဂျာရိုဝ်ရာတ်ဝွံ ပေါဲရုဲမာဲဍုၚ်သေံတုဲအာတုဲ ပ္ဍဲကဵုပေါဲသောၚ်ကလးလိက်ပရိုၚ် ဂိတုမေ ၁၅ တေံဂှ်လေဝ် သွက်အထံက်အပၚ် ပရေၚ်ဗ္စာရဏာမၞိဟ် စပ်ကဵုပရေၚ်ဍုၚ်ဗမာတံဂှ် ထ္မံက်အာဒေသ အပိုၚ်အခြာ ပေါဲပၞာန်ဟွံမွဲတံဂှ်တုဲ ရီုဗၚ်ကဵုအာဏောၚ်ဂှ် ဟီုဂးလဝ်ရ။

သ္အာၚ်နူဂှ်ပၠန် တၚ်တုပ်စိုတ် အာဇြဳယာန် (၅) တၚ်ဂှ်လေဝ် သွက်ဂွံထ္မံက်ရုပ်ရဴ ရေၚ်တၠုၚ်အာဂှ် ဖ္တိုက်ဖ္အောဝ်အာဏောၚ်တုဲ ပံၚ်တောဲကဵု ဂကောံဗွိုၚ်ဍုၚ်သ္အာၚ်တံတုဲ ညံၚ်ညးဍုၚ်ကွာန်ဍုၚ်ဗမာတံ ဂွံသောၚ်ကလးကၠုၚ် ပရေၚ်ဍုၚ်ကွာန်ညးတံမာန်ဂှ် ကဵုအာဇြဟတ်ဂရိုဟ်ဏောၚ် သ္ဂးလဝ်ရ။

ဍုၚ်သေံဝွံ ပပၞဒဳမဝ်ကရေဇြဳတုဲ ပရေၚ်ပၞာန်သီအဝဵု လလအ်ဗ္ဒါဲစှ်သၞာံပြၚ်တံ က္တဵုဒှ်လဝ်ဂၠိုၚ်ၚ်ကဵုဝါတုဲ ဒှ်ဒၟံၚ်သၞောတ်ဒပ်ပၞာန်အုပ်ဓလီုတုဲ တၠအဝဵုအဆက်က်တံဂှ်လေဝ် စပ်ကဵုပရေၚ်ဍုၚ်ဗၟာတုဲ ပါဲနူဒတုဲဖဵုဇကုတုဲ ပွမစိုတ်လုပ်စလေဝ် ဟွံမွဲရ။

မူဝါဒကာဍုၚ်သ္အာၚ် ကေုာံ ပရေၚ်ရေၚ်တၠုၚ်စွံက္ဍိုပ် စပ်ကဵုပရေၚ်ဍုၚ်ဗၟာ နူကဵုက္ဍိုပ်သ္ကိုပ်ဗော် Move Forward မဂွံဇၞးလဝ် ပ္ဍဲပေါဲရုဲမာဲသေံလၟုဟ်ဂှ်ဝွံ ပ္တောံၜတ်ကဵုပရာယုတ် သ္ကိုပ်ဝန်ဇၞော်ဍုၚ်သေံကၠာတေံမ္ဂး ဂွံဒၟံၚ်စေဝ်လ္တူရ။

ဥက္ကဌ ဇာဇၞိက်အခေါၚ်အရာသၟာကမၠောန်ဆုဲပြံၚ် ဖျေံသ္ဇိုၚ်ဍုၚ်သေံ ဥူအံၚ်ကျဝ်ဂှ်လေဝ် နကဵုမေဿတာပဳတာ သွက်ဂွံဒှ်သ္ကိုပ်ဝန်ဇၞော် ပြဟ်ဟ်ဏံ ဟွံလောဲသွာဏီဂှ် ဂွံဆဵုကေတ်ဒၟံၚ်တုဲ ယဝ်ရညးဟေၚ် ဒှ်ကၠုၚ်သ္ကိုပ်ဝန်ဇၞော်မ္ဂး ကိစ္စကေၚ်ကာအပ္ဍဲဍုၚ် ဍုၚ်ဗၟာတံဂှ် ရေၚ်တၠုၚ်အာ နဒဒှ်သ္ၚိရေၚ်ကၟေၚ်ဆက်မွဲ ဍာံဍာံပြပြၚ်ဏောၚ်ဂှ် သ္ၚဳဂၠိပ်လဝ်ရ။

“လညာတ်ပိုယ်ဂှ်တှ်ေ ညး သွက်ဂွံဒှ်သ္ကိုပ်ဝန်ဇၞော်ဂှ် ပြဟ်ဟ်ဏံ ဟွံလောဲသွာဏီဂှ် ဂွံဆဵုကေတ်ရ။ မူဟိုတ်ရောဟီုတှ်ေ ပ္ဍဲကၠတ်ထဝ်လ္တူဂှ် ညံၚ်ကဵုဍုၚ်ဗၟာပိုယ်တံဏံကီု ညးလဵုမွဲမှ ဟွံရုဲစှ်လဝ်မွဲသာ် အမာတ်ကၠတ်ထဝ်လ္တူ မၞုံဒၟံၚ် automatic ၂၅၀ ဇြဟတ်ညးတံ ပါကၠုၚ်လ္ပာ်ညးတေံမှ ဒက်အလဵုအသဳဂွံဏောၚ်။ ပြဟ်ဟ်ဏံ ၜိုတ်ညးတေံသၟဟ်အစောံ ဂကောံလစွံစိုတ်တုပ်ကဵုညး၊ မူဝါဒတုပ်ကဵုညးတေံ (၈) ဗော်ဂှ် ပံၚ်ဖျပ်ထောံတုဲ ပ္ဍဲကဵုကၠတ်ထဝ်သၟဝ်ဂှ် ဂွံဒၟံၚ် ၃၁၃ ဒၞါဲဂှ် ပြေပြံၚ်ဒၟံၚ်ယျ။ ဆ္ဂး တန်တဴကဵု ၜိုတ်လဵုတံၚ်ဂြဲ မၞိဟ်ကၠတ်ထဝ်လ္တူတံမာန်ရောဟီုဂှ်တုဲ ဒှ်သ္ကိုပ်ဝန်ဇၞော်ဏောၚ်။ ယဝ်ရညးဟေၚ် ဒှ်ကၠုၚ်သ္ကိုပ်ဝန်ဇၞော်မ္ဂး ကိစ္စအပ္ဍဲဍုၚ် ကၟိန်ဍုၚ်ဗၟာပိုယ်ဏံဂှ် နကဵုအသိၚ်အလိုန်ခိုဟ်ဟ် ရေၚ်တၠုၚ်အာ နဒဒှ်သ္ၚိရေၚ်ကၟေၚ်ဆက် ဍာံဍာံပြပြဏောၚ်ဂှ် နကဵုအဲ သ္ၚဳဂၠိပ်ကေတ်ရ” သာ်ဝွံ ညးသ္ဂးရ။

က္ဍိုပ်သ္ကိုပ်ဗော် Move Forward ပဳတာလေမ်ဂျာရိုဝ်ရက်ဝွံ သွက်ဂွံဆက်ယိုက်ဂၠေၚ်တာလျိုၚ် နဒဒှ်သ္ကိုပ်ဝန်ဇၞော်ဍုၚ်သေံဂှ် ဒှ်ဒၟံၚ်ဒဂူယျ သာ်ဝွံ ဟီုဂးလဝ်တုဲ သွက်ဂွံဒက်အလဵုအသဳပံၚ်ကောံဂှ် ကၠောန်သ္ပပ္ညဳပ္ညပ်ဒၟံၚ်ကဵု ဗော်ပရေၚ်ဍုၚ်ကွာန်တၞဟ်သ္အာၚ် (၇) ဂကောံတံတုဲ ပ္ဍဲကဵုကၠတ်ထဝ်သၟဝ် ဍုၚ်သေံဂှ် ကလိဂွံလဝ်ဒၞါဲအမာတ် ၃၁၃ မာဲယျရောၚ် သ္ဂးလဝ်ရ။

ပ္ဍဲကဵုကၠတ်ထဝ်သၟဝ်ဍုၚ်သေံဂှ် ညးစၞးအပံၚ် ၅၀၀ နွံဂှ်ရ သွက်ဂွံဒက်အလဵုအသဳမာန် လ္ဂောံကဵုသၞောဝ်သ္ဇိုၚ်ဍုၚ်သေံမ္ဂး နွံပၟိက်ဒၟံၚ် မာဲဆန္ဒထံက်ဂလာန် ညးစၞး ၃၇၆ တၠရောၚ် မဒှ်ရ။

ပ္ဍဲဍုၚ်ဗၟာ ကြဴနူသီထောံအဝဵုတုဲဂှ် ဟိုတ်နူပရေၚ်ပါ်ထ္ကးပကီုပရာပ် ဒပ်ကံၚ်ဇြဳပၞာန်တံဂှ်တုဲ ညးမပါလုပ်လဝ် ပ္ဍဲပရေၚ်ဒစဵုဒစးသၞောတ်တၠအဝဵု မပ္တံကဵု ညးချဳဒရာၚ် ပရေၚ်ဒဳမဝ်ကရေဇြဳ၊ သၞာဲဒဴ ဇြဳဒဳအာမ်တံကဵု ညးစၞးလ္ၚဵုတံဝွံ ဒးလုပ်စိုပ်စ္ၜုဲစ္ၜော်ဒၟံၚ် အပ္ဍဲဍုၚ်သေံအိုတ်ရ။

ပ္ဍဲကဵုအကာဲအရာ မက္တဵုဒှ်ဒၟံၚ်သာ်ဏံဂှ် သ္ကိုပ်ဝန်ဇၞော်ဍုၚ်သေံ မလျောဝ်အာဒၟံၚ် လ္ပာ်ကံၚ်ဇြဳပၞာန်ဂှ်ဝွံ ဟိုတ်နူလၟေၚ်ဒဒှ် လုပ်စိုပ်ဂၠိုက်ဂၠါဲရပ်ဒက် ပ္ဍဲသ္ၚိဒၟံၚ် ညးချဳဒရာၚ်ပရေၚ်ဍုၚ်ဗၟာ မသ္ပဒတဴဒၟံၚ် ပ္ဍဲဍုၚ်သေံတံ နွံဒၟံၚ်ဂှ်ရ ဗော် Move Forward ညံၚ်သ္ဂောံကလိဂွံမာဲဂှ် ညးဍုၚ်ကွာန်ဍုၚ်ဗၟာတံ စၟဳစဒၟံၚ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Social Media