လံၚ်လုၚ်၊ မေ (၂၄)
ပ္ဍဲဂိတုမေ (၂၃) အခိၚ်လဒေါဝ်တ္ၚဲဂှ် ဂကောံဒပ်ပံၚ်ကောံပၠန်ဂတးတံ မွဲအခိၚ်ဓဝ် လုပ်စိုပ်ဗ္တိုက်လဝ် ရုၚ်အလဵုအသဳ (၃) ရုၚ် သီုကဵုပါလုပ်ဗ္ဒိုပ်ဗၠာဲသၟိၚ်ၝောံဍုၚ်လံၚ်လုၚ် မၞုံလ္တူဍုၚ်လံၚ်လုၚ်၊ ရးဒေသ ဇၞော်တၞၚ်သဳတံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲ ၜိုတ် (၁၂) နာဍဳဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်ၝောံဍုၚ် ကံၚ်ဇြဳပၞာန်၊ ရုၚ်ကောပ်ကာဲပရေၚ်မၞိဟ်လုပ်တိတ် (လဝက) ၊ ရုၚ်ပရေၚ်ဂီုကၠီုစပ်ကဵုလ္ပာ်ပၞာန် (စရဖ) တံရ။
ပ္ဍဲကဵုပရေၚ်ဗ္တိုက်ရုၚ်လဝကဂှ် သၞာဲဒဴမွဲတၠ ဒးချိုတ်အာလဝ်တုဲ ညးယိုက်ဝန်မွဲတၠ ကလိဂွံလဝ်ဝပ် နွံဂှ် ညးဒေသတံ ဟီုဂးဒၟံၚ်ကီုလေဝ် နကဵုသြၚ်လောန်တိုၚ်(မ်) သ္ပဒတန်တၞဟ်ခြာ ဟွံမာန်ဏီရ။
သ္အာၚ်နူဂှ်ပၠန် ပ္ဍဲကဵုပရေၚ်ဗ္တိုက်ဗ္ဒိုပ်ဗၠာဲသၟိၚ်ၝောံဍုၚ် ကဵု ရုၚ်စရဖဂှ် လ္ပာ်ကံၚ်ဇြဳပၞာန် ကလေၚ်ပန်ပှော် နၚ်တံ နွံကီုလေဝ် ဂကောံဒပ်ပံၚ်ကောံပၠန်ဂတးတံ ဇီုကပိုက်ဒးဟွံမွဲမွဲသာ် ဆုတ်ကလေၚ်မာန်လဝ်ဂှ် ဂွံတီကေတ်ရ။
ကြဴနူရုၚ်အလဵုအသဳ နူဌာနမဆေၚ်စပ်တံ ဒးဒုၚ်ဗ္တိုက်တုဲဂှ် ကောန်ဂကောံဒပ်ကံၚ်ဇြဳပၞာန်တံ ကၟာတ်ဆိုအ်အပ္ဍဲဍုၚ်လံၚ်လုၚ်ဂှ်တုဲ ပွမဂၠိုက်ဂၠါဲစၟဳစၟတ်တံ ကၠောန်ၜိုတ်ဒၟံၚ်တုဲ ဒဵုကဵုအခိၚ်ဇိုၚ်သဝ်တ္ၚဲ ပတေၚ်ဂြတ်လဝ်ပရေၚ်ဂီုကၠီုဂှ် ညးဒေသတံ သ္ဂးရ။
ပရေၚ်ဗ္တိုက်ဏံဂှ် ဂကောံလဵု ကၠောန်လဝ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ် ဟွံမွဲဏီရ။
ပ္ဍဲပွိုၚ်ဍုၚ်လံၚ်လုၚ်ဂှ် ကြဴနူဒပ်ပၞာန်သီအဝဵုတုဲ ဗ္ဒိုပ်ကၚ်ဗၠာဲသၟိၚ်၊ ဗ္ဒိုပ်ဗၠာဲသၟိၚ်ၝောံဍုၚ်၊ ရုၚ်နူကဵုဌာန မဆေၚ်စပ်တံ ကေုာံ ဒၞါဲဒပ်ကံၚ်ဇြဳပၞာန် မဖျေံလဝ်ဒပ်တံဂှ် ဒးဒုၚ်ဗ္တိုက်ဒၟံၚ်မွဲဏှမွဲဏှတုဲ ပရေၚ်ဇီုကပိုက်ချိုတ်ဂျိုၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Social Media
sanlontai