ဂကောံဒပ်ဒမၠုက်လ္တူဍုၚ်တံ သွက်ဂွံဒတူလိုၚ်ဂှ် ခက်ခုဲကၠုၚ်

လ္ဂုၚ်၊ မေ (၂၄)

ဂကောံဒပ်ပၠန်ဂတးသၟဝ်တိ မချဳဒရာၚ်ဒၟံၚ် လ္တူဍုၚ်ဂမၠိုၚ် အလုံကၟိန်ဍုၚ်မွဲဂှ်ဝွံ အပ္ဍဲကာလပၠန်ဂတး ပွိုၚ် (၂) သၞာံဏံ မ္ၚးနူဒးဒုၚ်ရပ်ဂှ် အရီုဗၚ်ဂမၠိုၚ်လေဝ် ကလိဂွံအောန်ကၠုၚ်ဂှ်ရ သွက်ဂွံဒတူလိုၚ်ဂှ် သာခက်ခုဲကၠုၚ်ရောၚ် ဂကောံဒပ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကောန်ဂကောံဒပ်ဒမၠုက်လ္တူဍုၚ်တံဝွံ အပ္ဍဲသၞာံ ၂၀၂၂ တုဲကၠုၚ်တေံ ဟိုတ်နူဟွံဂွံလဝ်အထံက်ပၚ်တုဲ ဆုဲပြံၚ်ဗွဲမဂတာပ်အခိၚ်ဟွံမာန်ဂှ်ရ ဂကောံဒးဒုၚ်ရပ်ကၠုၚ်တံ နွံကၠုၚ်တုဲ ဟိုတ်နူဟွံဂွံအထံက်ပၚ်တုဲ ကၠောန်သ္ပပရေၚ်ပြုပြေၚ်ပၞာန်တံ ဟွံမာန်ဂှ်ရ ဂကောံဒးပလီုထောံတံလေဝ် နွံကၠုၚ်လဝ်ရ။

မွဲလ္ပာ်ပၠန်ဂှ် ကောန်ဂကောံဒပ်ဒမၠုက်လ္တူဍုၚ်ဂမၠိုၚ်ဝွံ ဟိုတ်နူပရေၚ်ဂၠိုက်ဂၠါဲရက်ဒက် ဒပ်ကံၚ်ဇြဳပၞာန် တံဂှ်ရ ထောံလသာဍုၚ်ဇၞော်တုဲ ဒးဆေၚ်ဒၟံၚ်မုက် ကုအကာဲအရာ ဒးကလေၚ်လုပ်စိုပ်ကၠုၚ် အပ္ဍဲတိဍာ်ပၠန်ဂတးကောန်ဍုၚ်အရၚ်တံဂှ်ပၠန်ရ။

ညးဒုၚ်တာလျိုၚ် ဂကောံဒပ်ဒမၠုက်လ္တူဍုၚ် ကိုဝ်ရုၚ်ဗိုဝ်ဂှ် နကဵုကောန်ဂကောံဒပ်ဒမၠုက်လ္တူဍုၚ်တံ သွက်ဂွံဂွံဒၞါဲမံၚ်စံၚ်ဂီုဂီုကၠီုကၠီုဂှ်ကဵု သွက်ပရေၚ်ပလံၚ်ဗစိုပ် လွဟ်လက်နက်မကမ်တံဂှ်ဝွံ ဒဵုကဵုအခိၚ်လၟုဟ် ဒှ်ဒၟံၚ်တၚ်ကော်ဆဴဇၞော်ဇၞော်မွဲရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“UG လ္တူဍုၚ်ပိုယ်တံဂှ် မၞိဟ်ဂွံဂၠိုၚ်တိုန်ကၠုၚ်ဂှ် ဟွံမွဲပုဟ်။ ပ္ဍဲကဵုအကာဲအရာသာ်ဏံဂှ် မၞိဟ်ဂှ် ဒးဒုၚ်ရပ်ဒၟံၚ်အရိုဟ်ဒဒှ်တ္ၚဲဏောၚ်။ ယဝ်ရမၞိဟ်မွဲတၠ ဒးဒုၚ်ရပ်မ္ဂး သၟေဟ်တံဂှ်တှ်ေ ပါအာဖအိုတ် ရဏောၚ်။ မူဟိုတ်ဂွံပါအာဂှ်ရော။ မူဟိုတ်ပါဲဒလေတ်ဟွံမာန်ဟီုမ္ဂး ဒၟါနူကဵုသြန်လှုဲရဏောၚ်၊ ဒၞါဲလဵုအာအာ ဒးရပ်လှုဲဏောၚ်။ လှုဲဟွံမွဲတှ်ေ ဍေံတံ ပါဲဒလေတ်ဟွံမာန်ပုဟ်။ လ္ၚဵုတံပၠန်ဂှ်လေဝ် ဂီုကၠီုဟွံမွဲတုဲ စာ်စ္ဍးတိတ်အာနူလ္ဂုၚ်အိုတ်ရ။ အခါဏံတှ်ေ ပ္ဍဲလ္ဂုၚ်ဂှ် UG တံ ဟွံဂၠိုၚ်တိုန်ကၠုၚ်မွဲသာ် ယအ်အာမံၚ်သိုက်က်ရ” သာ်ဝွံ ညးသ္ဂးရ။

တုဲကၠုၚ် ပ္ဍဲဂိတုမေ (၂၀) တေံဂှ်လေဝ် နကဵုတၚ်စောတ်စောဲ ပန်ဂစိုတ်လဝ် ဥူသာၚ်ကျဝ်တူ ဒုသ္ကိုပ်ဗိုလ်ဇၞော်ဒေါအ်ဇူ ဒုသ္ကိုပ်စၞောန်ပ္ညုၚ် ကမ္မယှေန်ပေါဲရုဲမာဲကၟိန်ဍုၚ် သၟဝ်တဲကံၚ်ဇြဳပၞာန်ဂှ် ရပ်ဒက်ဂွံလဝ် ကောန်ဂကောံ YRF (၁၀) တၠရောၚ် ကံၚ်ဇြဳပၞာန် လလောၚ်ပ္တိတ်လဝ်ရ။

သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ သၞာံတုဲကၠုၚ်တေံဂှ်လေဝ် ကောန်ဂကောံဒပ်စဵုဒၞါလ္တူဍုၚ် ဖျေံသ္ဇိုၚ်ပွိုၚ်ဍုၚ်ဒလ (၂၁) တၠဂှ်ကဵု ကောန်ဂကောံဒပ်ဒမၠုက်လ္တူဍုၚ်အေန်လျာ စဵုကဵု (၁၀) တၠ ဒးဒုၚ်ရပ်လဝ်ရ။

ပ္ဍဲလ္တူဍုၚ်လ္ဂုၚ် ဒၞါဲပရေၚ်ဂီုကၠီု မတေၚ်ဂြတ်ကၠုၚ်ဂှ် သွက်ဂွံချဳဒရာၚ်ကီု သွက်ဂွံဒတူလိုၚ်ကီုဂှ် ခက်ခုဲကၠုၚ်ကီုလေဝ် နကဵုဂကောန်ဂကောံဒပ်ဒမၠုက်လ္တူဍုၚ်တံ ပရေၚ်ပၠန်ဂတးလ္တူဍုၚ်ဂှ် ဆက်ကၠောန်အာ နကဵုအသိၚ်အလိုန်ထေက်ဂှ် ညးဒုၚ်တာလျိုၚ် လလောၚ်ပရိုၚ် ပရေၚ်ကောပ်ကာဲ ဒေသပၞာန် ရးလ္ဂုၚ် ဗိုလ်မဵုဂျဵု ဖ္တိုက်ဖ္အောဝ်လဝ်ရ။

မွဲလ္ပာ်ပၠန်ဂှ်လေဝ် သွက်ဂွံရပ်ဒက် UG နူကဵုလ္တူဍုၚ်လ္ဂုၚ်တံဂှ် ကံၚ်ဇြဳပၞာန် ဖျေံလဝ်ကိုန်အစဳဇန် ပရိုၚ်ဏံဂှ်လေဝ် ပ္ဍဲအကြာတ္ၚဲတံဏံ မံက်တိတ်ကၠုၚ်လဝ်ဏီရ။

ကိုန်အစဳဇန်ဏံဂှ် စလဝ် နူဂိတုဂျာန္နဝါရဳ စၟတ်တ္ၚဲ(၁၁) သၞာံဏံဂှ်တုဲ စဵုကဵုဂိတုမေအိုတ်ဂှ် အရာပလွေဟ်ဂၠိုက်ဂၠါဲတံ၊ မၚ်တောပ်ဗ္တိုက်တံဂှ် ကၠောန်ၜိုတ်ဒၟံၚ်ရောၚ် ပရိုၚ်နူကဵုအပ္ဍဲဒပ်တံ သ္ဂးလဝ်ရ။

လ္ပာ်ကံၚ်ဇြဳပၞာန် ၜိုန်ရပလေဝ်ပလေတ်ဒၟံၚ်သာ်ဏံကီုလေဝ် နကဵုဂကောံဒပ်ဒမၠုက် လ္တူဍုၚ်တံ အပ္ဍဲကာလကၠုၚ်စိုပ်ဏံ စွံပွန်ဗ္တိုက်အာ ကုသၞာဲဒဴကံၚ်ဇြဳပၞာန်တံဏောၚ်ဂှ် လလောၚ်တြးလဝ်ရ။

ကြဴနူပရေၚ်ပၠန်ဂတးလအ်ဂွံ (၂) သၞာံပြၚ်တုဲ ဂကောံဇြဟတ်ပၠန်ဂတး မဒးဂဗလဝ် အခက်အခုဲ လ္တူဍုၚ်တံဂှ်ဝွံ ဒးဒုၚ်ရပ်ကဵု ကံၚ်ဇြဳပၞာန်ကီု၊ ဒးပလီုလဝ် ဂကောံတံကီု၊ ကောန်သ္ဂံၚ်ဒမၠုက် မ္ဒးထောံလသာအာဍုၚ်ဇၞော်တံဂှ် နွံဒၟံၚ်ဂၞန်ကဵုကၠံယျဂှ် ဂကောံ UG တံ ဟီုလဝ်ရ။

ဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဥူယဳမန်ဂှ် အလုံမွဲဍုၚ် ပ္ဍဲကဵု (၂၅၀) ပွိုၚ်ဍုၚ်ဂှ် ဒက်လဝ် ဂကောံဒပ်ဒမၠုက်လ္တူဍုၚ်တံ (၄၀၀) ပြၚ်တုဲ ဗွဲမဂၠိုၚ်ဂှ် ကဵု NUG အဆက်နွံဒၟံၚ်တုဲတုဲရဂှ် ဟီုဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−MM News