မုမ်၊ မေ (၂၄)
ပ္ဍဲပွိုၚ်ဍုၚ်မုမ် ဗော်သွးကောန်ဂကူကရေၚ် KNU ဂှ် ပ္တဝ်လဝ်ကဵုကောန်အရာပ်ညးဍုၚ်ကွာန်တုဲ ဟိုတ်နူပရေၚ်ချဳဒရာၚ်ပၞာန် ကေုာံ ပရေၚ်ဖံက်ပ္ကဝ်အခေါၚ်အရာမၞိဟ်ဒပ်ကံၚ်ဇြဳပၞာန်တုဲ ပွိုၚ် (၂) သတ္တာဟဂှ် လၟိဟ်ညးပါဲဘဲပၞာန် နူ(၁၈)ကွာန် စဵုကဵု(၂၀,၀၀၀) ပြၚ်နွံကၠုၚ်ရဂှ် ဗဟဵု KNU လလောၚ်တြးလဝ် ပ္ဍဲဂိတုမေ စၟတ်တ္ၚဲ (၂၂)ဏံရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်မုမ် တိဍာ် KNU ခရိုၚ်ညံၚ်လေဝ်ပေန် ဒပ်မဟာ(၃)ဂှ် ဗတိုက်ပန်ပှ်ော ပ္တဝ်လဝ်ကဵု ညးဍုၚ်ကွာန်တုဲ ကၠောန်သ္ပဒၟံၚ် ပရေၚ်ပန်ဖျေံလွဟ်ဇၞော် ပ္ဍဲကွာန်၊ စံၚ်ဂစိုတ်ညးဍုၚ်ကွာန်ဂကောံဂကောံဗွဝ်ဗွဝ်၊ ရပ်ဒက်သုၚ်စောဲဒၟံၚ် နဒဒှ်ဒေၚ်ဒုၚ်ဒၞာမၞိဟ်ရဂှ် ဟီုသ္ဂးလဝ်ရ။
ပ္ဍဲဂိတုမေ စၟတ်တ္ၚဲ (၂၁) တုဲကၠုၚ်တေံ အခိၚ်ဒေါဝ်တ္ၚဲ (၁)နာဍဳဂှ် ဒပ်ကံၚ်ဇြဳပၞာန် ဗတိုက်လဝ် ကွာန်နောၚ်ကုမ် ပွိုၚ်ဍုၚ်မုမ် နကဵုဒရုမ် (၁) ဝါ၊ အခိၚ်ၜိုတ်(၂)နာဍဳ တ္ၚဲစေၚ်ဂှ် (၁)ဝါ ပံၚ်လၟိဟ် (၂)ဝါတုဲ သ္ၚိဒၟံၚ်မၞိဟ် (၂)မ သီုဘာဗ္တောန်လိက် (၁)ဘာ၊ တာဲအှော်(၁)မ ဒးလီုလာ်လဝ်တုဲ ညးဒေသ ကောန်ညးဍုၚ်ကွာန်နောၚ်ကုမ် လၟိဟ်မၞိဟ်မၞုံ (၈၇၂)တၠ ဒးဂြိပ်ဒဴဒၟံၚ် သီုအလုံမွဲကွာန်ဖိုဟ်ရဂှ် KNU လလောၚ်တြးလဝ်ရ။
ပွိုၚ်ဍုၚ်မုမ်ဂှ် သ္ပတမ်နူဂိတုမေ စၟတ်တ္ၚဲ (၁၀) ဒပ်ကံၚ်ဇြဳပၞာန် စံၚ်ဂစိုတ်လဝ်ကောန်ညးဍုၚ်ကွာန်တုဲ ညးဍုၚ်ကွာန် နူ(၁၈)ကွာန် မပ္တံကဵုညံၚ်ပေန်တာ၊ နောၚ်ဇျှော၊ ဒိုက်ပုမ်၊ မဳတိုၚ်တဝ်၊ အံၚ်ဆာန်တာ၊ ကျောၚ်သု၊ မျောၚ်ဥူ၊ ယျေအိုဝ်ဇြေန်၊ ကအ်ပျေန်၊ ကျောက်ကာန်၊ နောၚ်ကုမ်၊ ဝေသု၊ သဝေ၊ ညံၚ်ပေန်ဇြုက်၊ မျောၚ်ယိုဝ်ဂျဳ၊ ယွာဟောၚ် ကေုာံတာပ်ကုမ် မၞုံပွိုၚ်ဍုၚ်မုမ်တအ် ပံၚ်လၟိဟ်၂၀၀၀၀ တၠပြၚ် ဒးပါဲဓလေတ်ဒၟံၚ် ဘဲပၞာန်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ကြဴနူဒပ်ပၞာန်သီအဝဵုတုဲဂှ် ဒၟာနူဒပ်ကံၚ်ဇြဳပၞာန် ပန်ဖျေံလွဟ်ဇၞော်၊ ဍောတ်ပ္ဍဲကွာန်၊ ဗတိုက်ပန်ပှော် ကဵုဒရုမ်၊ ဂြာတ်ထောံဖျေံဗုမ် ကဵုက္ၜၚ်ကျာ၊ ထ္ပက်လုပ်ကၠုၚ်ပၞာန် ပ္ဍဲကွာန်တုဲ ကၠောန်သ္ပကၠုၚ် ပရေၚ် ပြိုက်ဂစိုတ်ညးဍုၚ်ကွာန်တအ်ဂှ်ရ ညးဍုၚ်ကွာန် မံၚ်တန်တဴဒၟံၚ် ပွိုၚ်ဍုၚ်မုမ်တအ်ဂှ် ထောံဌာန်ဒၟံၚ်တုဲ ဒးဂြိပ်ဒဴပါဲဓလေတ်ဒၟံၚ်ရ။
ပ္ဍဲတိဍာ် KNU ဂှ်မ္ဂး လၟိဟ်ညးပါဲဘဲပၞာန် ဒးဂြိပ်ဒဴပါဲဓလေတ်ဒၟံၚ် ဒဵုအခိၚ်လၟုဟ်ဏံ နွံကၠုၚ် စဵုကဵု (၅၀၀,၀၀၀)တုဲ အရီုဗၚ်ဗ္စာရဏာပရေၚ်မၞိဟ်လေဝ် ဆက်နွံဒၟံၚ်ပၟိက်ရဂှ် ဂကောံညးအရာပ် ကောန်ဂကူ ကရေၚ်တအ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် -KNU
sanlontai