သဓီု၊ မေ (၂၄)
ပ္ဍဲတွဵုရးဍုၚ်မန်၊ ပွိုၚ်ဍုၚ်သဓီု၊ အကြာကွာန်ကၟာဇြိုၚ်ကဵု ကေုာံ ကွာန်ဇြယိတ်တံဂှ် ဟိုတ်နူကွဳစက် ဖ္ဍိုက်ဗၞိက် သၠာ ၂၂ မွဲဖ္ဍိုက် ဒးအာမာၚ်တုဲ ကောန်ကဵုယာဲ (၂) တၠ ဒးအာကဝေက်မာၚ် ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ (၂၂) အခိၚ်ဗ္တံ ၜိုတ် (၉) နာဍဳဂှ် ကွဳစက်ဖ္ဍိုက်ဗၞိက် နူတွဵုရးကရေၚ် မဒဳကၠုၚ် လ္ပာ်နေဗျဳဒဝ်ဂှ်ဝွံ ဒးအာလဝ်မာၚ် ပ္ဍဲကဵုဗ္ဒါဲဆေၚ်ကၠေၚ်ယှိုဲမိုဝ်ဂှ်ရ။
ဟိုတ်နူကွဳစက်ဖ္ဍိုက်ဗၞိက် ဒးအာမာၚ်ဂှ်ရ မခေန်န်ကျအ် မဒှ်သမ္ဘာညးဒဳကွဳစက်ဂှ်ကဵု ကောန်ဝုတ်ညး အာယုက် (၂) သၞာံ မထောန်ဝတဳမာၚ် မပါကၠုၚ် လ္တူကွဳစက်တံ ဒးအာလဝ်ကဝေက်မာၚ် ပ္ဍဲကဵုဇိုၚ်တုဲ ကလိဂွံလဝ်ဝပ်ရ။
ညးမဇီုကပိုက် ကလိဂွံလဝ်ဝပ်တံဂှ် ညးဒေသတံ ပလံၚ်ဗစိုပ်လဝ် ရုၚ်ဂဥုဲပွိုၚ်တိုက် ဒုၚ်သုက်တုဲ ဒုၚ်လွဳလွတ်လဝ်ရောၚ်ဂှ် ဂွံတီကေတ်ရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ကွဳစက်ဖ္ဍိုက်ဗၞိက် ဒးမာၚ်တိုပ်တိဂှ်ဝွံ ဒၟါနူကဵုဗော်သွးကောန်ဂကူကရေၚ် KNU ကဵု ဂကောံဒပ်စဵုဒၞါညးဍုၚ်ကွာန်တံ ဖံက်ဗ္တိုဟ်လဝ်မာၚ် ဏောၚ်ဂှ် တြးဒၟံၚ်ဝါဒတံ နွံဒၟံၚ်ရ။
တုဲကၠုၚ် ပ္ဍဲဂိတုမေ (၂၁) တေံဂှ်လေဝ် ပ္ဍဲကဵုပွိုၚ်ဍုၚ်သဓီု၊ ကွာန်ကၟာဇြိုၚ် လ္တူဂၠံၚ်ကွဳစက် လ္ဂုၚ်−မတ်မလီုဂှ် ကွဳစက်ညးအာတရဴမွဲဖ္ဍိုက် ဒးအာလဝ်မာၚ်တုဲ ညးအာတရဴ မပါကၠုၚ် လ္တူကွဳစက်ဂှ် (၃) တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ
sanlontai